ទោះបីមានពិការភាព សិស្ស គ ថ្លង់ និងពិការភ្នែក នៅវិទ្យាល័យអប់រំពិសេសសៀមរាប បាននិងកំពុងអនុវត្តន៍យ៉ាងពេញលេញ នូវវិធានការសុវត្ថិភាពនានា ដើម្បីចូលរួមការប្រឆាំងទប់ស្កាត់ជំងឺកូវីដ-១៩ នេះបើតាមការលើកឡើងពី សិស្សនារី គ ថ្លង់ ឈ្មោះ សោម វណ្ណៈ រៀនថ្នាក់ទី១២ និងប្រែសម្រួលដោយអ្នកគ្រូប្រចាំថ្នាក់។
ក្នុងនោះសិស្សមានពិការភាព (គថ្លង់ និងពិការភ្នែក) បានគោរពតាម សារអប់រំ ស្ដីពីវិធានការ ការពារ កូវិដ-១៩ ៣ការពារ និង៣កុំ របស់ប្រមុខរាជរដ្ឋាភិបាល ដូចជា ពាក់ម៉ាស់ លាងដៃ រក្សាគម្លាតសុវត្ថិភាពសង្គម និងបុគ្គល កុំចូលទៅកន្លែងបិទជិត គ្មានខ្យល់ចេញចូល ប្រើម៉ាស៊ីនត្រជាក់ច្រើន កុំទៅកន្លែងមានមនុស្សច្រើនកុះករ កុំប៉ះពាល់ ចាប់ដៃគ្នា កៀកស្មាគ្នា និងកុំអោបគ្នាជាដើម។
ជាមួយនឹងការលើកឡើងរបស់យុវតីរូបនេះ នៅក្នុងពិធីសំណោះសំណាលជាមួយកុមារមានពិការភាព (គថ្លង់ និងពិការភ្នែក) នៅវិទ្យាល័យអប់រំពិសេសសៀមរាប ស្ថិតក្នុងសង្កាត់ស្លក្រាម ក្រុងសៀមរាប ដើម្បីអបអរសាទរ ខួបលើកទី១១០ ទិវាអន្តរជាតិនារី ៨មីនា‘ ក្រោមប្រធានបទ“ស្ត្រី និងការអភិវឌ្ឍន៍ក្នុងបរិយាការណ៍កូវីដ-១៩” នាថ្ងៃ០៨ ខែមីនា ឆ្នាំ២០២១ ឯកឧត្តម ទៀ សីហា អភិបាលខេត្តសៀមរាប បានកោតសរសើរ ដល់ការខិតខំប្រឹងប្រែងរបស់ លោកគ្រូ-អ្នកគ្រូ និងការចូលរួមរបស់សិស្សានុសិស្ស ដែលសកម្មភាពនេះ ជាជ្រុងមួយនៃភាពកក់ក្តៅ ក្នុងការចូលរួម ប្រជាពលរដ្ឋគ្រប់មជ្ឈដ្ឋាន ក្នុងការប្រឆាំងទប់ស្កាត់ ជំងឺកូវីដ-១៩។
ឯកឧត្តមអភិបាលខេត្ត ក៏បានបង្ហាញពីការព្រួយបារម្ភ ពីការគេចវស មិនព្រមធ្វើចត្តាឡីស័ក ដែលនេះជាការបង្កគ្រោះថ្នាក់ នៃការចម្លងជំងឺកូវីដ-១៩ ចូលក្នុងសហគមន៍។ ជាមួយក្ដីបារម្ភនេះ អាជ្ញាធរខេត្ត បានបង្កើតគណៈកម្មការ ស្រាវជ្រាវ តាមដាន បុគ្គលសង្ស័យជាប់ពាក់ព័ន្ធកូវីដ-១៩ ព្រមទាំងបំផុសដល់ប្រជាពលរដ្ឋប្រើប្រាស់ QR Code បញ្ឈប់កូវីដ-១៩ បន្ថែមពីលើវិធានសុខាភិបាល ដែលបានអនុវត្តន៍នាពេលកន្លងមកផងដែរ។
សូមជ្រាបថា ក្នុងពិធីសំណេះសំណាល សួរសុខទុក្ខ រៀបចំម្ហូបអាហារ និងផ្តល់អំណោយ ដល់កុមារគថ្លង់ និងកុមារពិការភ្នែក នៅវិទ្យាល័យអប់រំពិសេសសៀមរាប មានការអញ្ជើញជាអធិបតីពីសំណាក់ ឯកឧត្តម អ្នកឧកញ៉ា សៀង ណាំ អ្នកតំណាង រាស្ត្រមណ្ឌលសៀមរាប ឯកឧត្តម អ៊ាន ឃុន ប្រធានក្រុមប្រឹក្សាខេត្ត ឯកឧត្តម ទៀ សីហា អភិបាលខេត្តសៀមរាប និងចូលរួមពីសំណាក់ ឯកឧត្តម-លោកជំទាវ លោក-លោកស្រី សមាជិក-សមាជិកាក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពជុំវិញខេត្តនិង ថ្នាក់ដឹកនាំសហភាព សហព័ន្ធ យុវជនកម្ពុជាខេត្តសៀមរាប សាខាកាកបាទក្រហមខេត្តផងដែរ។
អត្ថបទ និង រូបថត ៖ លោក ងិន គឹមឡេង និងលោក ស៊ាន សុផាត
កែសម្រួលអត្ថបទ ៖ លោក សេង ផល្លី
