នៅថ្ងៃសុក្រនេះ នាយករដ្ឋមន្ត្រីចិនលោក លី ខឺជាំង (Li Keqiang) បានថ្លែងថា ប្រទេសចិននឹង បន្តរារាំងយ៉ាងដាច់ខាត ចំពោះសកម្មភាពរបស់ក្រុមបំបែកខ្លួនណាមួយ ដែលចង់ទាមទារឯក រាជ្យឲ្យកោះតៃវ៉ាន់ ប៉ុន្តែចិនក៏នៅតែប្តេជ្ញាចិត្តផងដែរ ក្នុងការលើកស្ទួយទំនាក់ទំនងសន្តិភាព។ នេះបើតាមការចេញផ្សាយ ដោយសារព័ត៌មាន CNA ។
នៅក្នុងសមាជប្រចាំនៃសភាប្រជាជនចិន លោកនាយករដ្ឋមន្ត្រី លឺ ខឺជាំង ក៏បានរំលឹកផងដែរ អំពីការអនុវត្តយ៉ាងខ្ជាប់ខ្ជួននូវ «គោលនយោបាយចិនតែមួយ» ដោយមានចែងយ៉ាងច្បាស់ថា កោះតៃវ៉ាន់គឺជាផ្នែកមួយរបស់ប្រទេសចិន។ បន្ថែមពីនេះ លោកនាយករដ្ឋមន្ត្រីចិនរូបនេះ ក៏បានសង្កត់ធ្ងន់អំពីការប្តេជ្ញាចិត្ត ក្នុងការលើកស្ទួយទំនាក់ទំនង ឆ្លងកាត់ច្រកសមុទ្រតៃវ៉ាន់ និងការបង្រួបបង្រួមប្រជាជាតិចិន។
បន្ថែមពីខាងលើនេះទៀត លោក លី ខឺជាំង ក៏បានលើកឡើងផងដែរ អំពីការប្រុងប្រយ័ត្នក្នុង កម្រិត ខ្ពស់់របស់ចិន ដើម្បីប្រឆាំងនឹងក្រុមបំបែកខ្លួន ដែលកំពុងមានចេតនាស្វែងរកឯករាជ្យភាព ឲ្យកោះ តៃវ៉ាន់។
គួរបញ្ជាក់ថា កាលពីអំឡុងពេលលោក ដូណាល់ ត្រាំ នៅកាន់អំណាច ទំនាក់ទំនងមិនមែនផ្លូវការ ទូតរវាងកោះតៃវ៉ាន់ និងសហរដ្ឋអាមេរិក ត្រូវបានបង្កើនទៅកាន់កម្រិតថ្មីមួយទៀត ដោយមន្ត្រីជាន់ ខ្ពស់អាមេរិកមួយចំនួន ត្រូវបានបញ្ជូនឲ្យមកបំពេញទស្សនកិច្ច នៅកោះនោះ ចំពោះមុខការព្រមាន ធ្ងន់ៗពីទីក្រុងប៉េកាំង។ ដោយឡែកសម្រាប់ រដ្ឋបាលលោក ចូ បៃដិន វិញក៏ត្រូវបានគេមើលឃើញថា នឹងតែនៅតែបន្តរក្សាភាពតានតឹងជាមួយចិន ជុំវិញបញ្ហាកោះតៃវ៉ាន់នេះ ដដែលផងដែរ៕