រយៈពេល៩ថ្ងៃ ចាប់ពីថ្ងៃទី២៤ ខែកុម្ភៈ រហូតដល់ថ្ងទី០៤ ខែមីនានេះ ដោយក្រុមយុវជនស្ម័គ្រចិត្ត ឈ្មោះថា តោះ! ទៅលេងសៀមរាប ស្ថិតក្នុងខេត្តសៀមរាប បានបញ្ចប់យុទ្ធនាការចុះជួយណែនាំ និងបង្កើត ស្គេន « QR Code ទប់ស្កាត់ជំងឺកូវីដ-១៩ ដែលហៅថា Stop COVID » របស់ខ្លួន ដោយបានបិតផ្សព្វផ្សាយ QR Code StopCOVID-19 នៅតាមទីសាធារណៈក្នុងក្រុងសៀមរាប សរុបចំនួន ៧១កន្លែង។
តាមការឲ្យដឹងពីលោក សុខ មករា តំណាងក្រុមការងារយុវជនស្ម័គ្រចិត្ត យុទ្ធនាការនេះ ធ្វើឡើងដោយក្រុមយុវជន ដែលមានកិច្ចសហការពីអាជ្ញាធរ ដើម្បីទប់ស្កាត់ការឆ្លងរីករាលដាលជំងឺកូវីដ-១៩ ជាពិសេសចូលរួមជាមួយអាជ្ញាធរខេត្ត ក៏ដូចជារាជរដ្ឋាភិបាល បញ្ចប់ព្រឹត្តិការណ៍២០កុម្ភៈ។ បន្ថែមពីការបិតផ្សាយ QR Codeនេះ ក្រុមយុវជន ក៏បានណែនាំ និងបង្កើតQR Code ជូនប្រជាពលរដ្ឋ និងម្ចាស់អាជីវកម្មជាច្រើននាក់ផងដែរ។
តាមរយៈការចុះផ្សព្វផ្សាយនេះ បណ្ដាម្ចាស់ទីតាំង ក៏ដូចជាប្រជាពលរដ្ឋក្នុងក្រុងសៀមរាប បានបង្ហាញនូវការគាំទ្រយ៉ាងពេញទំហឹង ដើម្បីចូលរួមទប់ស្កាត់ការឆ្លងរីករាលដាលជំងឺកូវីដ-១៩ ជាមួយអាជ្ញាធរខេត្ត។ ជាមួយនឹងការចុះផ្សព្វផ្សាយរបស់យុវជនស្ម័គ្រចិត្តនេះ ពួកគាត់រឹតយល់ច្បាស់ពីការប្រើប្រាស់ និងការបង្កើត QR Code ដើម្បីចូលរួមទប់ស្កាត់ជំងឺកូវីដ-១៩។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
