លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត នៃរដ្ឋបាលខេត្តសៀមរាប បានមានប្រសាសន៍ថា ករណីព្រឹត្តិការណ៍សហគមន៍ ២០កុម្ភៈ បានធ្វើឲ្យចំនួនអ្នកឆ្លងជំងឺកូវីដ១៩ មានការកើតឡើងជារៀងរាល់ថ្ងៃ ដែលបញ្ហានេះ ទាំងប្រមុខរាជរដ្ឋាភិបាលកម្ពុជា ក៏ដូចជាក្រសួងសុខាភិបាល បានយកចិត្តទុកដាក់ជាខ្លាំងក្នុងវិធានការទប់ស្កាត់ការឆ្លងរាលដាលនៃជំងឺនេះ ដូចជាការបិទតំបន់កំសាន្តខ្លះៗ និង តំបន់រដ្ឋបាលមួយចំនួនផងដែរ ជាពិសេសបានធ្វើការណែនាំដល់ប្រជាពលរដ្ឋទូទៅសូមឲ្យអនុវត្តឲ្យបានខ្ជាប់ខ្ជួននូវវិធានការ៣ការពារ និង៣កុំ។ លោកវេជ្ជបណ្ឌិត មានប្រសាសន៍យ៉ាងដូច្នេះ ក្នុងឱកាសចូលរួមធ្វើជាវាគ្មិនក្នុងកម្មវិធីបច្ចុប្បន្នភាពសៀមរាប-អង្គរ របស់វិទ្យុនិងទូរទស្សន៍នៃមន្ទីរព័ត៌មានខេត្តសៀមរាប ដែលបានផ្សាយផ្ទាល់កាលពីរសៀលថ្ងៃទី១០ ខែមីនា ឆ្នាំ២០២១កន្លងទៅថ្មីៗនេះ។
លោកវេជ្ជបណ្ឌិត ក្រុស សារ៉ាត់ មានប្រសាសន៍ទៀតថា ដើម្បីចូលរួមជាមួយរាជរដ្ឋាភិបាលក្នុងការទប់ស្កាត់ការឆ្លងរាលដាលនៃជំងឺ១៩នេះ រដ្ឋបាលខេត្តសៀមរាប ក្រោមការដឹកនាំរបស់ឯកឧត្ដម ទៀ សីហា អភិបាលខេត្ត បានផ្ដួចផ្ដើមបង្កើតប៉ុស្តិ៍ត្រួតពិនិត្យសុខភាពបឋម នៅចំណុចព្រំប្រទល់ស្រុកជីក្រែង ខេត្តសៀមរាប និងស្រុកស្ទោង ខេត្តកំពង់ធំ ដើម្បីត្រួតពិនិត្យសុខភាពពលរដ្ឋដែលមានបំណងចូលមកក្នុងខេត្តសៀមរាប ដូចជាការវាស់កំដៅខ្លួន និង ស្កែន QR Code Stop COVID-19 «ទប់ស្កាត់ ជំងឺកូវីដ១៩ » ដូច្នេះក្នុងឱកាសនេះ សូមសំណូមពរដល់បងប្អូនប្រជាពលរដ្ឋទាំងអស់ដែលបានចូលមកក្នុងខេត្តសៀមរាប មេត្តាអធ្យាស្រ័យ និង ចូលរួមសហការជាមួយរដ្ឋបាលខេត្តក្នុងការអនុវត្តការងារនេះប្រកបដោយភាពរលូន ព្រោះគោលបំណងសំខាន់នៃការត្រួតពិនិត្យនេះ គឺការការពារ និង ទប់ស្កាត់ការឆ្លងរាលដាលជំងឺកូវីដ១៩ ទៅក្នុងក្រុមគ្រួសាររបស់យើង និង សហគមន៍របស់យើង បានទាន់ពេលវេលា ។
បើតាមប្រសាសន៍របស់លោក ពៅ ប៊ុនធឿន អភិបាលស្រុកជីក្រែង ដែលបានប្រចាំការនៅប៉ុស្តិ៍ត្រួតពិនិត្យសុខភាពបឋម នៅព្រំប្រទល់ខេត្តសៀមរាបជាមួយខេត្តកំពង់ធំ បានឱ្យដឹងថា ក្នុងរយៈពេល២ថ្ងៃ គឺចាប់ពីថ្ងៃទី០៩ដល់ទី១០ខែមីនាឆ្នាំ២០២១នេះ បានត្រួតពិនិត្យសុខភាពបឋមសម្រាប់ប្រជាពលរដ្ឋចូលមកខេត្តសៀមរាប បានចំនួន២.៧៣១នាក់ ក្នុងនោះបានស្កេនឃ្យូអរកូតបានចំនួន៧៣៩នាក់ ហើយមិនទាន់រកឃើញមានជនណាម្នាក់ ជាប់សង្ស័យពាក់ព័ន្ធកូវីដ១៩ ហើយត្រូវឱ្យធ្វើចត្តាឡីស័កនៅឡើយដែរ ប៉ុន្តែគិតត្រឹមរសៀលថ្ងៃទី១១ម្សិលមិញនេះ ស្ថានភាពប្រជាពលរដ្ឋចូលមកខេត្តសៀមរាប មានការថយចុះជាមុន ដែលកត្តាទាំងនេះអាចបណ្តាលមកពីប្រជាពលរដ្ឋ មានការប្រុងប្រយ័ត្នខ្ពស់ជាងមុន ហើយមិនហានចេញដើរ ដោយសារការរីករាលដាលនៃមេរោគកូវីដកាន់តែខ្លាំង ។
សូមបញ្ជាក់ថា កាលពីថ្ងៃទី០៩ខែមីនា ឆ្នាំ២០២១នេះ ឯកត្តម ទៀ សីហា អភិបាលខេត្តសៀមរាប បានសម្រេចដាក់ចេញវិធានការត្រួតពិនិត្យសុខភាពបឋម នៅចំណុចព្រំប្រទល់ស្រុកជីក្រែង ខេត្តសៀមរាប និងស្រុកស្ទោង ខេត្តកំពង់ធំ ហើយការដឹកទំនិញ និងប្រជាពលរដ្ឋ អាចធ្វើដំណើរឆ្លងកាត់បានជាធម្មតា ដោយមិនមានការហាមឃាត់នោះឡើយ ដោយគ្រាន់តែមានការត្រួតពិនិត្យសុខភាពបឋម ប៉ុន្តែមិនមានតម្រូវឱ្យធ្វើចត្តាឡីស័ក លើកលែងតែករណីសង្ស័យ ហើយក្នុងនោះ ក្រុមការងារក៏បានណែនាំដល់ជាពលរដ្ឋ ឱ្យអនុវត្តការស្កែន QR Code Stop COVID-19 “ទប់ស្កាត់ ជំងឺកូវីដ១៩”ផងដែរ ។
គួររំលឹកថា បន្ទាប់ពីការផ្ទុះករណីព្រឹត្តិការណ៍សហគមន៍ ២០កុម្ភៈមកទល់ព្រឹកថ្ងៃទី១២ ខែមីនា ឆ្នាំ២០២១នេះ មានអ្នកឆ្លងកូវីដ១៩ សម្រាប់ព្រឹត្តិការណ៍នេះ ចំនួន ៧១៦ នាក់ ក្នុងស្រីចំនួន ៣៣៨ នាក់ និង មានអ្នកស្លាប់ចំនួន០១នាក់ ប៉ុន្តែក៏មានអ្នកជាសះស្បើយវិញផងដែរ ដែលមានចំនួនសរុប ១៣១ នាក់ ក្នុងនោះស្រីចំនួន ៦០ នាក់ នេះបើតាមការបញ្ជាក់របស់ក្រសួងសុខាភិបាល ៕
អត្ថបទ និង រូបថត ៖ លោក លីវ សាន្ត និង សហការី
