តាមសេចក្ដីជូនដំណឹងការិយាល័យអប់រំ យុវជន និងកីឡាស្រុកពួក ចុះថ្ងទី១១ ខែមីនា ឆ្នាំ២០២១នេះ បានបញ្ជាក់ថា ក្រោយការស្រាវជ្រាវ និងពិនិត្យសំណាកលើកទី១ ចំពោះអ្នកពាក់ព័ន្ធផ្ទាល់ និងប្រយោល ជាមួយស្ត្រី ដែលផ្ទុកជំងឺកូវីដ-១៩ លទ្ធផល គឺអវិជ្ជមាន កូវីដ -១៩ ទាំងអស់នោះ ហេតុនេះ ដើម្បីជៀសវាងផលប៉ះពាល់ដល់ ការសិក្សារបស់សិស្សានុសិស្ស និង មានការយល់ព្រមពីថ្នាក់ដឹកនាំផង ការិយាល័យអប់រំយុវជន និងកីឡាស្រុក សម្រេចបើកដំណើរការការសិក្សារបស់សាលាទាំង១៩ ជាធម្មតាវិញ ដោយអនុវត្តតាមវិធានការ ៣ការពារ និង ៣កុំ ឱ្យបានខ្ជាប់ខ្លួន ។
លោក លី ប៊ុនណា ប្រធានមន្ទីរអប់រំយុវជន និងកីឡាខេត្ដសៀមរាប បានមានប្រសាសន៍ថា តាមសំណើរបស់ការិយាល័យអប់រំ យុវជន និងកីឡាស្រុកពួក និង តាមការស្រាវជ្រាវ និងពិនិត្យសំណាកលើកទី១ ចំពោះអ្នកពាក់ព័ន្ធផ្ទាល់ និងប្រយោល ជាមួយស្ត្រីដែលផ្ទុកជំងឺកូវីដ-១៩ លទ្ធផល គឺអវិជ្ជមាន កូវីដ -១៩ ទាំងអស់នេះ មន្ទីរយល់ព្រមតាមសំណើរបស់ការិយាល័យអប់រំស្រុកពួក ដើម្បីជៀសវាងផលប៉ះពាល់ដល់ការសិក្សារបស់សិស្សានុសិស្ស ប៉ុន្ដែត្រូវអនុវត្តតាមវិធានការ ៣ការពារ ៣កុំ ឱ្យបានខ្ជាប់ខ្លួន ។
សូមជម្រាបថា កាលពីថ្ងៃទី០៩ខែមីនាឆ្នាំ២០២១នេះ សាលារៀនចំនួន១៩កន្លែង នៅក្នុងឃុំចំនួន៤ ក្នុងនោះមាន ៖ ឃុំខ្នាត ចំនួន០៦ សាលា , ឃុំពួក ចំនួន០៥ សាលា , ឃុំសំរោងយា ចំនួន០៣ សាលា និង ឃុំកែវព៌ណ ចំនួន ០៥ សាលា បានសម្រេចបិទមិនឲ្យសិស្សចូលរៀនជាបណ្ដោះអាសន្ន ក្រោយពេលស្រ្ដីម្នាក់ឆ្លងជំងឺកូវីដ១៩ មកពីខេត្ដព្រះសីហនុ ចូលក្នុងសហគមន៍នៅស្រុកពួកនោះ ៕
ព័ត៌មានជាតិ ថ្មីៗ
អត្ថបទ និងរូបថត ៖ ឈិត សាវី
កែសម្រួល៖ លោក លីវ សាន្ត
