រយៈពេល ៣ថ្ងៃ ចាប់ពីថ្ងៃទី៩ ដល់ថ្ងៃទី១១ ខែមីនា ឆ្នាំ២០២១ អាជ្ញាធរខេត្តសៀមរាប បានត្រួតពិនិត្យសុខភាពបឋម និងស្រង់ស្ថិតិអ្នកដំណើរ ចូលមកខេត្តសៀមរាប នៅព្រំប្រទល់ខេត្តសៀមរាប ជាមួយខេត្តកំពង់ធំ បានចំនួន៤,៧៧០នាក់ នេះបើតាមការបង្ហា្ពញពីលោក ចិក គឹមជុន នាយករងរដ្ឋបាលខេត្ត នៅព្រឹកថ្ងៃទី១២ ខែមីនានេះ។
តាមប្រសាសន៍នៅប៉ុស្តិត្រួតពិនិត្យក្នុងស្រុកជីក្រែង លោកនាយករងរដ្ឋបាលខេត្ត បញ្ជាក់ថា ក្នុងចំណោមប្រជាពលរដ្ឋ ដែលបានត្រួតពិនិត្យសុខភាពទាំងអស់នោះ មានជនបរទេសចំនួន០៧នាក់ ប៉ុន្តែអាជ្ញាធរ នៅពុំទាន់មិនរកឃើញ ករណីសង្ស័យពាក់ព័ន្ធនឹងជំងឺកូវីដ-១៩ ឬដាក់ឲ្យធ្វើចត្តាឡីស័កនៅឡើយទេ។
លោកសង្កេតឃើញថា កាលពីរសៀលម្សិលមិញ ប្រជាពលរដ្ឋធ្វើដំណើរតាមផ្លូវជាតិ៦ ពីខេត្តកំពង់ធំ មកខេត្តសៀមរាប មានការប្រុងប្រយ័ត្នខ្ពស់ជាងមុន និងមានការកាត់បន្ថយការធ្វើចរាចរណ៍តាមរថយន្តដឹកអ្នកដំណើរ ដោយភាគច្រើន មានតែរថយន្តដឹកទំនិញធំៗតែប៉ុណ្ណោះ។
ទោះជាចំនួនមានការថយចុះក្ដី លោកនាយករងរដ្ឋបាលខេត្ត គូសបញ្ជាក់ថា កម្លាំងចម្រុះ នៃគណៈបញ្ជាការឯកភាពរដ្ឋបាលស្រុក-ខេត្ត និងអ្នកពាក់ព័ន្ឋ សរុបចំនួន៦៥នាក់ នៅតែបំពេញការងារ ២៤ម៉ោងលើ២៤ម៉ោងមិនធ្វេសប្រហែសឡើយ ដើម្បីរក្សាសុខសុវត្ថិភាពប្រជាពលរដ្ឋក្នុងខេត្ត ក៏ដូចជាទូទាំងប្រទេស ចៀសផុតពីជំងឺកូវីដ-១៩។
គួររំលឹកថា តាមរយៈសារសំឡេងក្នុងបណ្តាញសារអេឡិកត្រូនិក កាលពីថ្ងៃទី៩ ខែមីនានេះ ឯកត្តម ទៀ សីហា អភិបាលខេត្តសៀមរាប បញ្ចាក់ថា៖ ការរៀបចំប៉ុស្តិត្រួតពិនិត្យនេះ ពុំមែនជាការបិទផ្លូវធ្វើដំណើររបស់បងប្អូនប្រជាពលរដ្ឋនោះទេ គឺគ្រាន់តែធ្វើការត្រួតពិនិត្យសុខភាពបឋម និងស្រង់ស្ថិតិ នៅចំណុចព្រំប្រទល់ប៉ុណ្ណោះ។ រីឯការដឹកទំនិញ និងប្រជាពលរដ្ឋ អាចធ្វើដំណើរឆ្លងកាត់បានជាធម្មតា ដោយមិនមានការហាមឃាត់នោះឡើយ ។
អត្ថបទ និងរូបថត ៖ លោក ជា ស្រស់ និង លោក យូ វង្ស
កែសម្រួល៖ លោក សេង ផល្លី
