កាលពីថ្ងៃទី១៧ ខែមីនា ឆ្នាំ២០២១ម្សិលមិញនេះ លោក ស៊ុ សំអន នាយកប្រតិបត្តិសាខាកាកបាទក្រហមកម្ពុជាខេត្តសៀមរាប និង ក្រុកការងារ បានចុះផ្សព្វផ្សាយពីវិធានការការពារខ្លួនពីជំងឺកូវីដ-១៩ លើវិធានការ៣ការពារ និង ៣កុំ ដល់យុវសិស្សដែលជាប្រធានថ្នាក់ អនុប្រធានថ្នាក់ ក្នុងនោះមានយុវជនកាកបាទក្រហមកម្ពុជា សហភាពហព័ន្ធយុវជនកម្ពុជា និងយុវកាយរឹទ្ធិជាតិកម្ពុជា សរុបចំនួន១៤២នាក់ នៅវិទ្យាល័យ១០ មករា ១៩៧៩ ។
លោក ស៊ុ សំអន នាយកប្រតិបត្តិសាខា មានប្រសាសន៍ថា បច្ចុប្បន្ននេះ ការឆ្លងរាត្បាតជំងឺកូវីដ១៩នៅក្នុងប្រទេសកម្ពុជាយើង បានកើតមានឡើងជារៀងរាល់ថ្ងៃ ជាពិសេសពាក់ព័ន្ធនឹងព្រឹត្តិការណ៍សហគមន៍២០កុម្ភៈ ដែលមកទល់ពេលនេះមានវិជ្ជមានជំងឺកូវីដ១៩ ចំនួនជាង១ពាន់ករណីហើយ ក្នុងនោះក្នុងខេត្តសៀមរាបយើងក៏មានមួយករណីដែរ ដូច្នេះ ដើម្បីទប់ស្កាត់ការឆ្លងរាលដាលជំងឺដ៏កាចសាហាវនេះ មានតែចូលរួមរបស់យើងទាំងអស់គ្នានោះទេ តាមការណែនាំរបស់រាជរដ្ឋាភិបាល និង ក្រសួងសុខាភិបាល ក្នុងនោះលើវិធានការ៣ការពារ និង ៣កុំ ដែលក្នុងឱកាសនេះ សាខាកាកបាទក្រហមកម្ពុជាខេត្តសៀមរាប នឹងពន្យល់ណែនាំឲ្យបានលម្អិតដល់ប្អូនៗ ដើម្បីផ្សព្វផ្សាយបន្តដល់មិត្តភក្តិ និង ក្រុមគ្រួសាររបស់ខ្លួនបន្តទៀត ។
លោក ស៊ុ សំអន មានប្រសាសន៍ទៀតថា វិធានការ ៣ការពារ និង ៣កុំ គឺ ៖ ១. វិធានការ ៣ការពារ រួមមាន ៖ ពាក់ម៉ាស់នៅគ្រប់ទីកន្លែងសាធារណៈ , លាងដៃជាមួយសាប៊ូ អាល់កុល ឬជេល និង រក្សាគម្លាតសុវត្ថិភាពសង្គមចាប់ពី១,៥០ម៉ែត្រឡើងទៅ និង ២. វិធានការ ៣កុំ រួមមាន ៖ កុំចូលទៅកន្លែងបិទជិតគ្មានខ្យល់ចេញចូល , កុំចូលទៅកន្លែងមានមនុស្សច្រើនកុះករ និង កុំប៉ះពាល់គ្នា ដូច្នេះសម្រាប់ទីនេះ គឺ បន្ទប់រៀនត្រូវបើកទ្វារ បង្អួចឲ្យមានខ្យល់ចេញចូល កុំទៅកន្លែងមនុស្សច្រើនកុះករបើមិនចាំបាច់ , ប្តូរទម្លាប់កុំចាប់ដៃគ្នា និងកៀកស្មាគ្នាជាដើម ហើយត្រូវចងចាំថា ការពារបានឬមិនបាន ចំពោះការឆ្លងរាត្បាតជំងឺកូវីដ១៩ គឺផ្ដើមចេញពីយើងម្នាក់ៗ ។
សូមជម្រាបថា គិតត្រឹមម៉ោង៧ព្រឹកថ្ងៃទី១៨ ខែមីនា ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន ១.៥៤១នាក់ ក្នុងនោះអ្នកជាសះស្បើយចំនួន ៨៩៨នាក់, អ្នកកំពុងសម្រាកព្យាបាលចំនួន ៦៤០នាក់ និង អ្នកស្លាប់ដោយសារកូវីដ១៩ ចំនួន០១នាក់ ៕
អត្ថបទ និង រូបថត ៖ សាខាកាកបាទក្រហមកម្ពុជាខេត្តសៀមរាប
កែសម្រួលអត្ថបទ ៖ លោក លីវ សាន្ត
