នៅព្រឹកថ្ងៃទី២២ ខែមីនា ឆ្នាំ២០២១នេះ ក្រសួងសុខាភិបាល បានចេញសេចក្តីប្រកាសព័ត៌មាន ដោយបានបញ្ជាក់ពីការបន្តរកឃើញអ្នកឆ្លងកូវីដ១៩ថ្មី រហូតដល់ ចំនួន៧៣នាក់ ក្នុងនោះករណីឆ្លងក្នុងសហគមន៍ «ព្រឹត្តិការណ៍២០កុម្ភៈ» ចំនួន៧១ករណី និងចំនួន២នាក់ជាករណីនាំចូល ខណៈអ្នកជំងឺចំនួន១៧នាក់បានជាសះស្បើយ។ នៅក្នុងចំណោមអ្នកដែលត្រូវបានរកឃើញទាំង៧៣នាក់ក្នុងនោះក៏មានម្នាក់ជាបុរសអាយុ ៣៨ឆ្នាំ ដែលរស់នៅក្នុងក្រុងសៀមរាប ខេត្តសៀមរាប។
លោក ក្រុស សារ៉ាត់ ប្រធានមន្ទីរសុខាភិបាលខេត្ដសៀមរាប នៅថ្ងៃនេះដែរក៏បានបញ្ជាក់ឲ្យដឹងថា ចំពោះករណីបុរសជនជាតិខ្មែរម្នាក់ទៀតមានផ្ទុកមេរោគកូវីដ១៩ នៅក្រុងសៀមរាប គឺបុរសខាងលើបានវិលត្រឡប់មកពីស្រុកភ្នំស្រួច ខេត្ដកំពង់ស្ពឺ កាលពីថ្ងៃទី១៧ ខែមីនា ឆ្នាំ២០២១។ បុរសខាងលើមានទីលំនៅ ស្ថិតនៅភូមិដកពោធិ៍ សង្កាត់ស្លាក្រាម ក្រុងសៀមរាប ហើយបច្ចុប្បន្នក្រុមការងារកំពុងដាក់ឲ្យសំរាកព្យាបាលនៅមន្ទីរពេទ្យខេត្ដសៀមរាប។ ក្នុងនោះដែរអ្នកពាក់ព័ន្ធដោយផ្ទាល់ និងប្រយោលមានជាង២០នាក់ ហើយមន្ដ្រីជំនាញបានយកសំណាកធ្វើតេស្តលើកទី១ហើយ ប៉ុន្ដែមិនទាន់ដឹងលទ្ធផលនៅឡើយទេ។
សូមជម្រាបថា គិតត្រឹមថ្ងៃទី២២ ខែមីនានេះ ក្នុងខេត្ដសៀមរាបមានអ្នកវិជ្ជមានកូវីដ-១៩ ចំនួន៣នាក់ ដែរបានជាប់ពាក់ព័ន្ធក្នុងព្រឹត្ដិការណ៍សហគមន៍ ២០ កុម្ភៈ។ ក្នុងនោះទី១.ឈ្មោះ ហ៊ន់ ស៊ីនឿត ភេទស្រីអាយុជាង៣២ឆ្នាំ រស់នៅក្នុងភូមិព្រៃវែង ឃុំសំរោងយា ស្រុកពួក បន្ទាប់ពីគាត់បានធ្វើដំណើរពីខេត្ដព្រះសីហនុ ឆ្លងកាត់រាជធានីភ្នំពេញហើយមកដល់ខេត្ដសៀមរាបនៅថ្ងៃទី០៧ ខែមីនា ,ទី២.ឈ្មោះ ម៉ាប់ វ៉ុន ភេទប្រុសអាយុ៣៥ឆ្នាំ រស់នៅភូមិគោកត្នោត សង្កាត់គោកចក បានរកឃើញផ្ទុកកូវីដ១៩ កាលពីថ្ងៃទី២០ ខែមីនា ក្រោយវិលត្រឡប់មកពីស្រុកគៀនស្វាយ ខេត្ដកណ្ដាល កាលពីថ្ងៃទី០៧ ខែកុម្ភ និងទី៣.ឈ្មោះ អ៊ឹង ឡាន អាយុ៣៨ឆ្នាំភេទប្រុស នៅភូមិដកពោធិ៍ ក្រុងសៀមរាប ត្រូវបានរកឃើញកាលពីយប់ថ្ងៃទី២១ ខែមីនានេះ៕
អត្ថបទ និងរូបភាព៖ ឈិត សាវី
កែសម្រួល៖ អ៊ុន ណារាជ្យ
