បើតាមសារព័ត៌មានចិនស៊ិនហួ នៅថ្ងៃអង្គារនេះបានឲ្យដឹងថា មនុស្ស៦នាក់ ក្នុងនោះរួមមានមន្ត្រីប៉ូលិម្នាក់ត្រូវបានខ្មាន់កាំភ្លើងម្នាក់បាញ់សម្លាប់នៅឯផ្សារទំនើបមួយកន្លែង ក្នុងទីក្រុងប៊ូលឌ័រ (Boulder) នៃរដ្ឋខូឡូរ៉ាដូ Colorado សហរដ្ឋអាមេរិក កាលពីថ្ងៃចន្ទម្សិលមិញ(ពេលវេលានៅសហរដ្ឋអាមេរិក) ។
ភ្លាមៗនោះមិនទាន់មានការបញ្ជាក់ពីចេតនា ឬមូលហេតុនៅពីក្រោយការបាញ់ប្រហារខាងលើនៅឡើយនោះទេ ខណៈមានសេចក្ដីរាយការណ៍ថាជនសង្ស័យម្នាក់ត្រូវ បានចាប់ខ្លួន។ ការបាញ់ប្រហារនេះគឺជាការបាញ់ប្រហារយ៉ាងរង្គាលជាលើកទី២ ក្នុងរយៈពេលត្រឹមតែមួយសប្ដាហ៍ប៉ុណ្ណោះនៅក្នុងសហរដ្ឋអាមេរិក បន្ទាប់ពីខ្មាន់កាំភ្លើងម្នាក់បានបាញ់សម្លាប់មនុស្ស៨នាក់ ក្នុងនោះមាន៦នាក់ជាស្ត្រីអាមេរិកមានដើមកំណើតអាស៊ី ក្នុងទីក្រុងអាត្លង់តា នៃរដ្ឋចចចៀ។
គួរបញ្ជាក់ថា ការបាញ់ប្រហារទាំង២ករណីខាងលើ បានកើតឡើងនៅចំពេលចរន្តនៃអំពើហិង្សប្រឆាំងពលរដ្ឋអាមេរិក ដើមកំណើតអាស៊ី កំពុងកើនឡើងខ្លាំង នៅក្នុងសហរដ្ឋអាមេរិក។ ប្រធានាធិបតី លោក ចូ បៃដិន បានអំពាវនាវឱ្យប្រជាជនអាមេរិកទាំងអស់ក្រោកឈរឡើងប្រឆាំងនឹងការរើសអើងពូជសាសន៍ និងត្រូវ ធានាឱ្យបានថាគ្មានចន្លោះទំនេរណាមួយសម្រាប់ការរើសអើងពូជសាសន៍នៅក្នុងសហរដ្ឋអាមេរិកជាដាច់ខាត៕
