ថ្ងៃទី២៣ ខែមីនា ឆ្នាំ២០២១ លោកស្រី យូ សុភា អភិបាលរងខេត្ត តំណាងដ៍ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប អញ្ជើញសួរសុខទុក្ខព្រះគ្រូអនុគណនិងព្រះសង្ឃគង់នៅក្នុងវត្តពោធិវង្ស និងបានចុះពិនិត្យស្ថានភាពការផ្លូវដែលបានបិទការធ្វើដំណើរជាបណ្តោះអាសន្ន នៅមុខវត្តទេពពោធិវង្ស សង្កាត់គោកចកក្រុងសៀមរាប បានផ្តាំផ្ញើ និងណែនាំដល់សមត្ថកិច្ច និងកម្លាំងប្រជាការពារដែលឈរជើងនៅគោលដៅនោះកុំធ្វេសប្រហែសត្រូវរឹតបន្តឹង និងត្រួតពិនិត្យដោយម៉ត់ចត់នូវការធ្វើដំណើរចេញចូលរបស់បងប្អូន ឱ្យបានយ៉ាងម៉ត់ចត់ជាទីបំផុត ចៀសវាងនូវការយោគយល់ ជាហេតុនាំឱ្យមានការថ្លោះធ្លោយ បង្កហានិភ័យនាំឱ្យរីករាលដាលនូវជំងឺកូវីដ-១៩ ចូលក្នុងសហគមន៍កាន់តែច្រើនដោយសារការធ្វេសប្រហែស និងយោគយល់។
លោកស្រី យូ សុភា បញ្ជាក់ថា ចាប់ពីថ្ងៃទី២០ ខែមីនា ឆ្នាំ២០២១ខេត្តសៀមរាប រកឃើញអ្នកមានវិជ្ជមានកូវីដ-១៩ចំនួន៣នាក់ សុទ្ឋតែជាករណីនាំចូល ជាហេតុឱ្យគណៈបញ្ជាការរដ្ឋបាលឯកភាពខេត្តបិទការធ្វើដំណើរជាបណ្តោះ នូវផ្លូវមួយចំនួនក្បែរទីតាំងដែលរកឃើញអ្នកមានវិជ្ជមានជំងឺកូវីដ-១៩ និងផ្អាកបណ្តោះអាសន្នទីតាំងដែលប៉ះពាល់ជា មួយអ្នកវិជ្ជមានមេរោគកូវីដ១៩ ដូចជាគ្លីនិក ចាវ ចាន់ នៅផ្សារភូមិភាគ គ្លីនិក ទូច កូ នៅខាងលិចផ្សារដើមក្រឡាញ់ គ្លីនិក៧៧៧ និងគ្លីនិកសុខភាពនៅផ្លូវជាតិលេខ៦។ ចំពោះការផ្អាកចរាចរណ៍ចេញ-ចូលបណ្តោះអាសន្ននេះ នឹងដំណើរការឡើងវិញក្រោយស្ថានភាព ការរីករាលដាលជំងឺកូវីដ-១៩ មានសភាពធូរស្រាល និងវិលមករកប្រក្រតីភាពឡើងវិញ ដោយរដ្ឋបាលខេត្ត នឹងជូនដំណឹងនាពេលក្រោយ។
លោកស្រីអភិបាលរងខេត្ត បន្ថែមថា ក្រៅពីការបិទជាបណ្តោះអាសន្នផ្លូវមួយចំនួននៅក្នុងក្រុងសៀមរាប អាជ្ញាធរខេត្តក៍បានរៀបចំប៉ុស្តិត្រួតពិនិត្យសុខភាពបឋម និងស្រង់ស្ថិតិប្រជាពលរដ្ឋមកពីបណ្តាខត្តផ្សេងៗ ដើម្បីបង្ការទប់ស្កាត់ ការរីករាលដាលនៃជំងឺកូវីដ-១៩ ក្នុងសហគមន៍នៅព្រំប្រទល់ សៀមរាប-កំពង់ធំ សៀមរាប-បន្ទាយមានជ័យ។ លោកស្រីក៏បានអំពាវនាវហើយអំពាវនាវទៀត ឱ្យប្រជាពលរដ្ឋទាំងអស់ចូលរួមទប់ស្កាត់ការឆ្លងជំងឺកូវីដ-១៩ ដើម្បីខ្លួនយើង គ្រួសារយើង មនុស្សជាទីស្រលាញ់ និងខេត្តរបស់យើងតាមរយៈការអនុវត្តនូវវិធានការរបស់ប្រមុខរាជរដ្ឋាភិបាល ៣ការពារ និង៣កុំ។
អត្ថបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ
