ព្រឹកថ្ងៃទី២៣ ខែមីនា ឆ្នាំ២០២១នេះ លោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលខេត្តសៀមរាប បានទទួលអំណោយពីលោកស្រី កែវ សុជាតា អគ្គនាយិកាក្រុមហ៊ុន ហ្រ្គីន អង្គរ អ៊ិនធើ អ៊ែតវើថាយស៊ីន ដើម្បីយកទៅប្រើប្រាស់ក្នុងសកម្មភាពបង្ការ ទប់ស្កាត់នូវជម្ងឺកូវីដ-១៩។ ក្នុងនោះរដ្ឋបាលខេត្តទទួលបានអង្ករ១តោន មី៦០កេស និងម៉ាស៣ពាន់ម៉ាស់ និងសាខាកាកបាទក្រហមខេត្ត ទទួលបានអង្ករ១តោន មី៦០កេស និងម៉ាស៣ពាន់ម៉ាស់។
មានប្រសាសន៍ក្នុងឱកាសនោះ លោក ពិន ប្រាកដ បានបង្ហាញថា កន្លងមករដ្ឋបាលខេត្ត និងសាខាកាកបាទក្រហមខេត្ត តែងតែបានទទួលអំណោយផ្សេងៗពីសប្បុរសជនទាំងថវិកា និងសម្ភារៈដែរជាស្មារតីមនុស្សសធម៌ ក្នុងការរួមចំណែកជាមួយរដ្ឋបាលខេត្តសៀមរាប ក្នុងការប្រយុទ្ធប្រឆាំងនឹងជម្ងឺកូវីដ-១៩ដែលបច្ចុប្បន្ននេះជម្ងឺឆ្លងនេះ បាននឹងកំពុងយាយីក្នុងពិភពលោកមិនទាន់បានធូរស្បើយនៅឡើយ។ សម្រាប់កម្ពុជាប្រមុខរាជរដ្ឋាភិបាល ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ថ្នាក់ដឹកនាំមន្ត្រីរាជការ កងកម្លាំងប្រដាប់អាវុធ ប្រជាពលរដ្ឋទូទាំងប្រទេស បាននឹងកំពុងយកចិត្តទុកដាក់រួមគ្នាប្រយុទ្ធប្រឆាំងបង្ការទប់ស្កាត់ជម្ងឺកូវីដ-១៩ ដែលកំពុងឆ្លងក្នុងសហគមន៍នៃបណ្ដាខេត្តរាជធានីមួយចំនួនក្នុងនោះក៏មានខេត្តសៀមរាបផងដែរ។
ក្នុងឱកាសនោះក្នុងនាមឲ្យអាជ្ញាធរខេត្តលោកក៏សូមថ្លែងអំណរគុណ ចំពោះក្រុមហ៊ុន ហ្គ្រីន អង្គរ អ៊ិនធើ អ៊ែតវើថាយ ស៊ីន ឯ.ក ដែលបានប្រគល់ជូនអំណោយជូនដល់រដ្ឋបាលខេត្ត និងសាខាកាកបាទក្រហមខេត្តនាពេលនេះ ព្រោះវាជាតម្រូវការចាំបាច់ ដល់រដ្ឋបាលខេត្តនាពេលនេះ ហើយវាគឺជាការរួមចំណែកមួយយ៉ាងសំខាន់ ដើម្បីរួមគ្នាបង្ការទប់ស្កាត់ជម្ងឺកូវីដ-១៩ ដែលពិភពលោកក៏ដូចជានៅកម្ពុជាយើង បាននឹងកំពុងមានក្ដីព្រួយបារម្ភ និងយកចិត្តទុកដាក់យ៉ាងខ្លាំង។ លោកបន្ថែមថាចំពោះអំណោយទាំងនេះ ក្រុមការងារនឹងចាត់បញ្ជូនឲ្យដល់អង្គភាពស្ថាប័នមូលដ្ឋានគោលដៅសំខាន់ៗ បានប្រើប្រាស់ក្នុងសកម្មភាពបង្ការទប់ស្កាត់ការរីករាលដាលជម្ងឺកូវីដ-១៩ ដើម្បីរួមគ្នាបង្ការទប់ស្កាត់មិនឲ្យមានការឆ្លងចូលដល់ក្នុងសហគមន៍ ខេត្តសៀមរាបបន្តទៅទៀត៕
អត្ថបទ និងរូបភាព៖ ម៉ី សុខារិទ្ធ
កែសម្រួល៖ អ៊ុន ណារាជ្យ
