នៅវេលាព្រឹកម៉ោង៥ និងម៉ោង ១១ ថ្ងៃទី២៤ ខែមីនា ឆ្នាំ២០២១នេះ នៅតាមវត្តអារាម នៃបណ្ដាក្រុងស្រុក ក្នុងខេត្តសៀមរាប បានចាប់ផ្ដើមធ្វើការវាយគង វាយជួង និងទូងស្គរ ដើម្បីរំលឹកដល់ប្រជាពលរដ្ឋក្នុងខេត្ត ចងចាំពីវិធានសុវត្ថិភាព ៣កុំ ៣ការពារ ដើម្បីចូលរួមទប់ស្កាត់ការរីករាលដាល នៃជំងឺកូវីដ-១៩ ក្នុងសហគមន៍ នៃព្រឹត្តិការណ៍ ២០កុម្ភៈ។
លោក វណ្ណ ប៊ុនណា ប្រធានមន្ទីរធម្មការ និង សាសនាខេត្តសៀមរាប បញ្ជាក់ថា ការទូងស្គរនៅតាមវត្តអារាមក្នុងខេត្តនេះ ស្របតាមសារាចរណែនាំស្តីពីការវាយគង ជួង រគាំង ទូងស្គរ តាមវត្តអារាម ដើម្បីចូលរួមទប់ស្កាត់ការរាលដាលនៃជំងឺកូវីដ១៩ ក្នុងសហគមន៍ នៃព្រឹត្តិការណ៍២០កុម្ភៈ កាលពីថ្ងៃទី២៣ ខែមីនា ឆ្នាំ២០២១ របស់ក្រសួងធម្មការ និងសាសនា និងយោងតាមអនុសាសន៍ ដ៏ខ្ពង់ខ្ពស់របស់សម្ដេចសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
តាមរយៈសារាចរដដែលនេះ ការវាយគង ជួង រគាំង ទូងស្គរ នៅតាមវត្តអារាម នឹងធ្វើឡើងចំនួន៥លើក ជារៀងរាល់ថ្ងៃ នៅវេលាម៉ោង ៥:០០ព្រឹក ម៉ោង១១:០០ព្រឹក ម៉ោង២:០០រសៀល ម៉ោង៥:០០ល្ងាច និងម៉ោង៨:០០យប់ រហូតដល់ព្រឹត្តិការណ៍សហគមន៍២០កុម្ភៈ ត្រូវបានបញ្ចប់។
ព្រះវិបុលសត្ថា រី សាត ព្រះរាជគណៈថ្នាក់កិត្តិយសនៃព្រះរាជាណាចក្រកម្ពុជា និងជាព្រះចៅអធិការវត្តកេសរារាម ស្ថិតក្នុងក្រុងសៀមរាប មានថេរដីកាថា ជាទំនៀមទម្លាប់ខ្មែរពីបុរាណមកដល់បច្ចុប្បន្ននេះ ការវាយជួង និងទូងស្គរតាមវត្តអារាមនានានៅតែជាជំនឿមួយដែលព្រះសង្ឃ និងប្រជាពុទ្ឋបរិស័ទតែងតែជឿនិងអនុវត្តតៗមក ដើម្បីពញ្ញាក់ស្មារតីអ្នកភូមិស្រុក បានដឹងពីហេតុភេទមិនល្អ គ្រោះភ័យចោររខ្មួយចូលភូមិ ឬព្រះចៅអធិការវត្តទទួលអនិច្ចធម្ម ដើម្បីជាសញ្ញាបណ្តេញនូវឧបទ្រុឌចង្រៃផ្សេងៗ រួមទាំងការអបអរសាទរនូវសមិទ្ឋផលនានា ឬក៍ជោគជ័យផ្សេងៗក្នុងមូលដ្ឋានស្រុកភូមិ និងទីអារាមនានាផងដែរ ជាពិសេសសំឡេងទូងស្គរ ជានិច្ចការតែងប្រើនៅក្នុងរដូវចូលព្រះវស្សា ដើម្បីជាសញ្ញាប្រាប់ម៉ោងពេល ហើយឲ្យបរិស័ទ បានដឹងឱ្យដឹងថាដល់វេលា ឈប់សម្រាកពីការងារហើយ និងដាស់ឱ្យភ្ញាក់ពីនិន្ទ្រាបន្តកិច្ចការរៀងៗខ្លួនទៀត។
សូមជម្រាបថា វិធានសុវត្ថិភាព ចូលរួមទប់ស្កាត់ការរីករាលដាល នៃជំងឺកូវីដ-១៩ រួមមាន៖ “៣ការពារ” ១- ពាក់ម៉ាស់, ២- លាងដៃ, ៣- គម្លាតសុវត្ថិភាពសង្គម និងគម្លាតសុវត្ថិភាពបុគ្គល ដោយចាប់ពី ១ម៉ែត្រកន្លះឡើងទៅ ឱ្យបានគ្រប់គ្នា នៅគ្រប់ទីកន្លែង និងអនុវត្តឱ្យបានគ្រប់គ្នា។ រីឯ “៣កុំ” រួមមាន៖ ១- កុំចូលទៅកន្លែងបិទជិតគ្មានខ្យល់ចេញចូល និងប្រើម៉ាស៊ីនត្រជាក់ច្រើនពេក រកកន្លែងមានខ្យល់ចេញចូល ។ ២- កុំទៅកន្លែងមានមនុស្សច្រើនកុះករ ។ ៣- កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំឱបគ្នាជាដើម ពេលជួបគ្នា អ្នកមានផ្តាសាយ ឬសង្ស័យមានជំងឺកូវីត-១៩ កុំចេញក្រៅ ឬកុំមកកន្លែងធ្វើការ ហើយត្រូវទាក់ទងទៅគ្រូពេទ្យ៕
រូបភាព៖ មន្ត្រីនៃមន្ទីរព័ត៌មាន
