កាលពីវេលាម៉ោងប្រមាណ២រសៀលថ្ងៃទី២៣ ខែមីនា ឆ្នាំ២០២១ មានករណីគ្រោះថ្នាក់ចរាចរណ៍មួយកើតឡើង រវាងរថយន្តដឹកទំនិញ និងរថយន្តគយចល័ត ស្ថិតក្នុងភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប បណ្ដាលឲ្យមនុស្ស ៤នាក់របួសធ្ងន់ និងស្រាល។
លោកវរសេនីយ៍ឯក ឡុង សំណាង អធិការនគរបាលស្រុកបន្ទាយស្រី បង្ហាញថា រថយន្តដឹកទំនិញម៉ាក ហ៊ីយ៉ាន់ដាយ បើកបរបុរសម្នាក់អាយុ ២៧ឆ្នាំ រស់នៅភូមិប្រស្រែលើ សង្កាត់វិហារហ្លួង ក្រុងសួង ខេត្តត្បួងឃ្មុំ និងអ្នករួមដំណើរម្នាក់ បើកបរមានទិសដៅពីត្បូង ទៅជើង បានបុករថយន្តមន្ត្រីគយចល័យ ពីក្រោយ បើកបរដោយ បុរសវ័យ ៣៤ឆ្នាំ រស់នៅភូមិឪឡោក ឃុំបាគង ស្រុកប្រាសាទបាគង ខេត្តសៀមរាប និងមានអ្នករួមដំណើរចំនួន០៣ នាក់។
លោកអធិការនគរបាលស្រុក សន្និដ្ឋានថា គ្រោះថ្នាក់នេះ បង្កឡើងដោយអ្នកបើកបររថយន្តដឹកទំនិញ បើកបរក្នុងល្បឿនលឿន និងខ្វះការប្រុងប្រយ័ត្ន បណ្តាលអោយបុករថយន្តមន្ត្រីគយចល័ត។
ព័ត៌មានជាតិ ថ្មីៗ
ក្រោយកើតហេតុ សមត្ថកិច្ចជំនាញបានបញ្ជូនជនរងគ្រោះ ទៅមន្ទីរពេទ្យបង្អែកខេត្តសៀមរាប និងប្រមូលវត្ថុតាងមករក្សាទុកនៅអធិការដ្ឋាននគរបាលស្រុកបន្ទាយស្រី ដើម្បីចាត់ការតាមនីតិវិធីបន្ត ៕
អត្ថបទ និងរូបភាព៖ លោក ខេង ឧត្តម
កែសម្រួល៖ លោក សេង ផល្លី
