អ្នករត់ម៉ូតូឌុប ផាសអាប់ និងអ្នករត់ធុកៗ នៅក្នុងខេត្ដសៀមរាប បានអះអាងថា ពួកគាត់បានអនុវត្ដវិធានការណ៍ ការពារជំងឺកូវីដ-១៩ បានប្រមាណ៩០ភាគរយ ជាពិសេសបានអនុវត្ដការពារបីកុំបីការពារជាប់ជានិច្ច ទៅតាមការណែនាំរបស់ប្រមុខរាជរដ្ឋាភិបាល ខណៈដែលខេត្ដនេះ រកឃើញអ្នកឆ្លងជំងឺសាហាវនេះក្នុងសហគមន៍ចំនួន៥នាក់។ វិធានការណ៍បីការពារ ៣កុំ រួមមាន ពាក់ម៉ាស់ លាងដៃ គម្លាតសុវត្ថិភាពសង្គម និងគម្លាតសុវត្ថិភាពបុគ្គលចាប់ពី១មែត្រកន្លះឡើង។ ដោយឡែកបីកុំ រួមមាន កុំចូលកន្លែងបិទជិតគ្មានខ្យល់ចេញចូល ប្រើម៉ាស៊ីនត្រជាក់ច្រើនពេក រកកន្លែងខ្យល់ចេញចូលល្អ កុំទៅកន្លែងមនុស្សច្រើនកុះករ និងកុំប៉ះពាល់គ្នា កុំចាប់ដៃគ្នា កុំគៀកស្មាគ្នា កុំអោយថើបគ្នា។
អ្នករត់ផាសអាប់មួយរូប លោក សន សុខរ៉ាត់ នៅក្រុងសៀមរាប លោកបានលើកឡើងនៅថ្ងៃទី២៤ ខែមីនា ឆ្នាំ២០២១នេះ វិធានការណ៍៣ការពារបីកុំនេះ លោកយល់ថា គឺជាវិធានការណ៍ដ៍ល្អប្រសើរសម្រាប់ការពារជំងឺឆ្លងកូវីដ១៩ ដោយលោកថា លោកបានអនុវត្ដន៍ជាប់ខ្លួនជានិច្ច ដូចជាបានដាក់ទឹកអាកុលជាប់ខ្លួនតាមផាសអាប់ ដើម្បីអោយភ្ញៀវលាងដៃ ព្រមទាំងអោយភ្ញៀវពាក់ម៉ាស់ជាប់ជាប្រចាំ ជាពិសេសណែនាំអោយប្រាប់ភ្ញៀវអោយអនុវត្ដពេលឡើងជិះផាស់អាប់ផងដែរ។ លោកបានបន្ដថា វិធានការណ៍នេះ លោកបានអនុវត្ដជាប់ជានិច្ច ក្រោយពេលផ្ទុះមេរោគកូវីដ១៩ចូលក្នុងខេត្ដសៀមរាបខ្លាំង ចាប់ពីថ្ងៃ២០ខែមីឆ្នាំ២០២១នេះ។ បន្ទាប់ពីមានព្រឹត្ដិការណ៍សហគមន៍២០កុម្ភៈលោកមើលឃើញថា ប្រជាពលរេដ្ឋខ្មែរបានអនុវត្ដវិធានការណ៍ការពារនេះស្ទើរ១០០ភាគរយ ដូចនៅតាមភោជនីយដ្ឋានពេលដើរចូលផ្សារជាដើម។
ដោយឡែកអ្នករត់ធុកៗ និងម៉ូតូឌុបពីររូបទៀត បានអោយដឹងស្រដៀងគ្នាដែរថា តាមការសង្កេតឃើញរបស់ពួកគាត់ មានអ្នកធ្វើដំណើរនៅក្រុងសៀមរាប តាមម៉ូតូផ្ទាល់ខ្លួនក្ដី ជិះផាស់អាប់ ឬម៉ូឌុបក្ដី ពួកគេបានពាក់ម៉ាស់ការពារជាប់ខ្លួនជានិច្ច ដោយតាមការប៉ាន់ប្រមាណ៩០ភាគរយ ឡើងទៅ១០០ភាគរយហើយ ព្រោះបារម្ភខ្លាចឆ្លងមេរោគដ៍កាចសាហាវនេះ ចូលដល់ក្រុមគ្រយសារបស់គាត់។ ពួកគាត់បន្ដថា ព្រឹត្ដិការណ៍សហគមន៍២០កុម្ភៈនេះ បានធ្វើអោយប៉ះពាល់ដល់ជីវភាពគ្រួសារខ្លាំង ជាងព្រឹត្ដិកាណ៍សហគមន៍មុនៗទៅទៀត ធ្វើអោយប៉ះពាល់ដល់ជីវភាព ដោយសារអ្នកធ្វើដំណើរមានការធ្លាក់ចុះជាបន្ដបន្ទាប់។ ប៉ុន្ដែយ៉ាងនេះក្ដីពួកគាត់ជាប្រជាពលរដ្ឋក៍នៅតែបន្ដចូលរួមអនុវត្ដវិធានការណ៍ការជំងឺឆ្លងនេះជានិច្ច ជាពិសេសចូលរួមអនុវត្ដវិធានការណ៍៣ការពារ និង៣កុំ តាមការណែនាំរបស់រាជរដ្ឋាភិបាល ដើម្បីទប់ស្កាត់ការាត្បាតជំងឺកូវីដ១៩នេះចូលក្នុងសហគន៍របស់ពួកគាត់បន្ថែមទៀត។
ព័ត៌មានជាតិ ថ្មីៗ
សូមជម្រាបថា នៅក្នុងព្រឹត្ដិការណ៍សហគមន៍២០កុម្ភៈ ខេត្ដសៀមរាប បានរកឃើញវិជ្ជមានចំនួន០៥នាក់ ក្នុងនោះមានកុមារអាយុ១៣ឆ្នាំម្នាក់ និងមានពលរដ្ឋបានធ្វើចត្ដាឡីស័កជាងពីរពាន់នាក់។ ប្រធានមន្ទីរសុខាភិបាលខេត្ដសៀមរាប លោកវេជ្ជបណ្ឌិត ក្រុស សារ៉ាត់ បានអោយដឹងថា ចំនួនអ្នកឆ្លងជំងឺកូវីដ១៩ទាំង៥នាក់នោះ ទី១មានឈ្មោះ ហ៊ន ស្រីនឿត អាយុ៣៥ឆ្នាំរស់នៅភូមិព្រៃវែង ឃុំសំរោងយា ស្រុកពួក ខេត្ដសៀមរាប ធ្វើដំណើរមកពីខេត្ដព្រះសីហនុ ដោយបានរកឃើញវិជ្ជមាននៅថ្ងៃទី០៩ ខែមីនា ឆ្នាំ២០២១។ ទី២ ឈ្មោះ ម៉ាប់ វុន ភេទប្រុសអាយុ៣៥ឆ្នាំ រស់នៅភូមិគោកត្នោត សង្កាត់គោកចក ក្រុងសៀមរាប ធ្វើដំណើរមកពីខេត្ដកណ្ដាល រកឃើញផ្ទុកមេរោគកូវីដ១៩នៅថ្ងៃទី២០ ខែមីនា ឆ្នាំ២០២១។ ទី៣ឈ្មោះ អ៊ឹង ឡាង ភេទប្រុស អាយុ៤០ឆ្នាំរស់នៅភូមិដកពោធិ៍ សង្កាត់ស្លក្រាម ក្រុងសៀមរាប មកពីខេត្ដកំពង់ស្ពឹ បានរកឃើញមេរោគនៅថ្ងៃទី២១ ខែមីនា ហើយនៅថ្ងៃទី២២ ខែមីនានេះ បានរកឃើញប្រពន្ធនិងកូនប្រុសអាយុ១៣ឆ្នាំម្នាក់។ លោកវេជ្ជបណ្ឌិត ក្រុស សារ៉ាត បានទទូចដល់ប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នឲ្យបានខ្ពស់ ជាពិសេសអនុវត្តឲ្យបានត្រឹមត្រូវនូវវិធានការ ” ៣កុំ ៣ការពារ”៕
អត្ថបទ និង រូបភាព៖ ឈិត សាវី
