កាលពីរសៀលថ្ងៃទី២៤ ខែមីនា ឆ្នាំ២០២១ម្សិលមិញនេះ ព្រះធម្មានុរ័ក្ខញាណ ស៊ុម ពិសិដ្ឋ ព្រះសមុហ៍គណខេត្ត និងព្រះវិបុលសត្ថា រី សាត ព្រះរាជាគណៈថ្នាក់កិត្តិយសនៃព្រះរាជាណាចក្រកម្ពុជា និង ជាព្រះចៅអធិការវត្តកេសរារាម បានដឹកនាំក្រុមការងារមន្ត្រីសង្ឃសាលាគណខេត្តសៀមរាប និង ព្រះគ្រូចៅអធិការវត្តក្នុងខេត្តមួយចំនួនទៀត បាននាំយកអាល់កុល១ធុង ចំណុះ៣០លីត្រ , ម៉ាស់៥ប្រអប់ និងភេសជ្ជៈ រួមមាន ៖ ទឹកសុទ្ឋ១៣កេស , ទឹកផ្លែឈើ២កេស , ទឹកវីតាល់៣កេស ជូនអាជ្ញាធរឃុំកំពង់ឃ្លាំង ស្រុកសូទ្រនិគម ដើម្បីជួយសម្រួលដល់ការលំបាក់របស់ក្រុមការងារ ដែលបានប្រើប្រាស់ក្នុងកិច្ចការងារប្រចាំថ្ងៃ ។
ព្រះតេជគុណ ព្រះវិបុលសត្ថា រី សាត មានថេរដីកាថា ៖ សម្ភារនិងភេសជ្ជៈបន្តិចបន្តួចនេះបានមកពីការចូលរួមរបស់ព្រះសង្ឃក្នុងខេត្ត និងប្រជាពុទ្ឋបរិស័ទជិតឆ្ងាយយកមកប្រគេនហើយ ក្រុមការងារសាលាគណខេត្តបានធ្វើការបែងចែកទៅតាមលទ្ឋភាពដែលព្រះសង្ឃមាន ដើម្បីចែករំលែក និងចូលរួមជាមួយរាជរដ្ឋាភិបាល ក្នុងការទប់ស្កាត់ កាត់បន្ថយការឆ្លងជម្ងឺឆ្លងកូវីដ-១៩ (COVID-19) ដែលកំពុងបង្កហានិភ័យដោយគម្រាមកំហែងមកលើសុខភាព និង អាយុជីវិតប្រជាជនកម្ពុជានាពេលបច្ចុប្បន្ន ដូច្នេះក្នុងឱកាសនេះ សូមឱ្យក្រុមការងារជួយពន្យល់ណែនាំបន្ថែម ដល់ប្រជាពលរដ្ឋទាំងអស់ ត្រូវប្រកាន់ខ្ជាប់នូវវិធានការរបស់ក្រសួងសុខាភិបាល និងសេចក្តីអំពាវនាវរបស់រាជរដ្ឋាភិបាល៣ការពារនិង៣កុំ ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩នេះ ចូលក្នុងសហគមន៍របស់យើង ។
មានប្រសាសន៍ក្នុងឱកាសនោះដែរ លោក ទូច សុផុន មេឃុំកំពង់ឃ្លាំង បានថ្លែងអំណរព្រះគុណនូវព្រះទ័យយកចិត្តទុកដាក់របស់មន្ត្រីសាលាគណខេត្ត បានជួយឧបត្ថម្ភសម្ភារទាំងនេះ សម្រាប់ក្រុមការងារប្រើប្រាស់ដើម្បីជួយគ្នា ក្នុងការ កាត់បន្ថយ ទប់ស្កាត់ជម្ងឺឆ្លងកូវីដ-១៩ (COVID-19) ដែលកំពុងបង្កហានិភ័យដោយគម្រាមកំហែងមកលើសុខភាព និង អាយុជីវិតប្រជាជនកម្ពុជានាពេលបច្ចុប្បន្ន ខណៈកន្លងមកអាជ្ញាធរមូលដ្ឋានយើងតែងតែសហការគ្នាជាមួយសមត្ថកិច្ចមូលដ្ឋាន ក្រុមយុវជនឃុំនិងប្រជាការពារ ក្នុងការណែនាំ ពន្យល់ជូនដល់ប្រជាពលរដ្ឋក៏ដូចជាអ្នកធ្វើដំណើរឆ្លងកាត់ភូមិសាស្ត្រនេះ ឱ្យយល់បន្ថែមទៀតនូវវិធានការរបស់ក្រសួងសុខាភិបាល និងរាជរដ្ឋាភិបាល ពិសេស បានណែនាំពួកគាត់ ឲ្យប្រកាន់ខ្ជាប់នូវវិធានការ អនាម័យស្អាត ត្រូវពាក់ម៉ាស់ឱ្យបានត្រឹមត្រូវ លាងដៃជាមួយសាប៊ូ អាល់កុលឬជែល និងត្រូវរក្សាគម្លាតសុវត្ថិភាពសង្គមឱ្យបានត្រឹមត្រូវ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
