ដើម្បីរួមចំណែកក្នុងយុទ្ធនាការ បង្ការ និងទប់ស្កាត់ជំងឺកូវីដ១៩ ដែលបាននឹងកំពុងយាយីនៅក្នុងសហគមន៍នៃបណ្ដារាជធានី ខេត្តមួយចំនួននោះ នៅព្រឹកថ្ងៃទី២៦ ខែមីនា ឆ្នាំ២០២១ សមាគមសហគ្រិនវ័យក្មេងកម្ពុជា បាននាំអំណោយមនុស្សធម៌ រួមមាន ៖ មី ៦០កេស , ទឹកសុទ្ធ ២០០យួរ , ម៉ាស៊ីនបាញ់អាល់កុល ០១គ្រឿង , ទឹកសម្លាប់មេរោគ ៣០ដប , អាល់កុល ៦០លីត្រ , នំបុ័ង ៧០០ដើម , ម៉ាស់២៥ ប្រអប់ , ទឹកស៊ីអ៊ីវ ០៥យួរ , ជែល ១កេស , ត្រីខ ២៨យួរ ,ទឹកដោះគោខាប់ ៣កេស និងពងទា ៥០០ពង ប្រគល់ជូនរដ្ឋបាលខេត្តសៀមរាប សម្រាប់ប្រើប្រាស់ក្នុងយុទ្ធនាការប្រយុទ្ធប្រឆាំងនឹងជំងឺកូវីដ១៩ ។
មានប្រសាសន៍នោះដែរ លោក ពិន ប្រាកដ អភិបាលរងខេត្តសៀមរាប បានថ្លែងអំណរគុណចំពោះសមាគមសហគ្រិនវ័យក្មេងកម្ពុជា ដែលបានយកអំណោយមនុស្សធម៌ជាគ្រឿងឧបភោគបរិភោគ និង សម្ភារមួយចំនួនទៀត ប្រគល់ជូនរដ្ឋបាលខេត្តសៀមរាបនាពេលនេះ ស្របពេលដែលស្ថានភាពជំងឺកូវីដ១៩ កំពុងធ្វើការឆ្លងរាតត្បាតនៅក្នុងប្រទេសកម្ពុជា ពិសេសនៅខេត្តសៀមរាប ខណៈពេលដែលរដ្ឋបាលខេត្ត កំពុងបង្កើនសកម្មភាពយ៉ាងខ្លាំងក្នុងការប្រយុទ្ធប្រឆាំងនិងជំងឺកូវីដ១៩ សំខាន់លើវិធានការការពារ និង ទប់ស្កាត់ការឆ្លងជំងឺកូវីដ១៩ ឲ្យកាន់តែមានប្រសិទ្ធភាព ។
លោក ពិន ប្រាកដ បានបញ្ជាក់ទៀតថា បច្ចុប្បន្នរដ្ឋបាលខេត្តសៀមរាប បាននឹងកំពុងយកចិត្តទុកដាក់អនុវត្តវិធានការបង្ការទប់ស្កាត់ការឆ្លងរីករាលដាលជំងឺកូវីដ ១៩ ចូលដល់សហគមន៍ តាមបទបញ្ជារបស់ប្រមុខរាជរដ្ឋាភិបាល និងវិធានការណែនាំរបស់ក្រសួងសុខាភិបាល ក៏ដូចជាក្រសួងមហាផ្ទៃបានយ៉ាងល្អប្រសើរ ។ ជាក់ស្តែងក្រៅពីការរៀបចំមណ្ឌលចត្តាឡីស័កនៅតាមបណ្តាក្រុង ស្រុក អាជ្ញាធរ ខេត្តក៏បានធ្វើការរឹតបណ្តឹង នៅតាមបណ្តាច្រកព្រំប្រទល់រវាងខេត្តសៀមរាប និង កំពង់ធំ និង បន្ទាយមានជ័យ ក្នុងការ ពិនិត្យតាមដានសុខភាពបឋម របស់ក្រុមការងារស្រាវជ្រាវតាមដានបុគ្គលសង្ស័យមានជម្ងឺកូវីដ-១៩ មុនចូលមកដល់ក្រុង សៀមរាប ។
លោកអភិបាលរងខេត្តសៀមរាប បានបញ្ជាក់បន្ថែមទៀតថា ការប្រយុទ្ធប្រឆាំង និងការបង្ការទប់ស្កាត់ជំងឺកូវីដ ១៩ គឺជាបញ្ហារួមរបស់យើងទាំងអស់គ្នា មិនមែនជាបញ្ហារបស់បុគ្គលណាម្នាក់ឡើយ ទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ព្រះសង្ឃប្រជាពលរដ្ឋទូទៅ ត្រូវតែចូលរួមបង្ការទប់ស្កាត់ជម្ងឺឆ្លងដ៏កាចសាហាវនេះ ព្រោះបច្ចុប្បន្ននេះជម្ងឺនេះបាននឹងកំពុងបន្តតាមយាយីដល់សុខភាពរបស់មនុស្សនៅទូទាំងពិភពលោកនៅឡើយ ដូច្នេះត្រូវគោរពប្រតិបត្តិឲ្យ ខាងតែបាន នូវវិធានការ ៣កុំ និង ៣ការពារ របស់ប្រមុខរាជរដ្ឋាភិបាល ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
