មន្ត្រីសង្ឃនៃសាលាគណខេត្តសៀមរាប ដឹកនាំដោយព្រះពិជ័យរង្សី ឡាច លាង ព្រះធម្មធរគណខេត្តសៀមរាប និងព្រះធម្មានុរ័ក្ខញាណ ស៊ុម ពិសិដ្ឋ ព្រះសមុហ៍គណខេត្ត នៅព្រឹកថ្ងៃទី២៦ ខែមីនា ឆ្នាំ២០២១នេះ បានយកស្បៀងអាហារមួយចំនួនជូនដល់ប្រជាការពារភូមិ និងនគរបាលនៅតាមគោលដៅការពារព្រំប្រទល់ភូមិគោកបេង និងភូមិគោកត្នោត សង្កាត់គោកចក ខេត្តសៀមរាប បន្ទាប់មកអាជ្ញាធរខេត្តបានផ្អាកបណ្តោះអាសន្ន នូវការចរាចរណ៍ចេញ-ចូល ចំពោះប្រជាពលរដ្ឋរស់នៅក្នុងសង្កាត់គោកចក ក្រុងសៀមរាប ក្នុងគោលបំណងដើម្បីទប់ស្កាត់ការរីករាលដាលជំងឺកូវីដ-១៩ បន្ទាប់ពីបានរកឃើញវិជ្ជមានកូវីដ-១៩ លើបុគ្គលម្នាក់ ស្នាក់នៅភូមិគោកត្នោត សង្កាត់គោកចក ក្រុងសៀមរាប ហើយប្រកាសជាផ្លូវការនៅថ្ងៃទី២០ ខែមីនា ឆ្នាំ២០២១។
ព្រះសច្ចានុបាលភទ្ទកោ នឿម វុទ្ធី ព្រះរាជាគណកិត្តិយស និងជាព្រះចៅអធិការវត្តបារាយមហានទីរតនារាម (ស្វាយរមៀត) មានថេរដីកាថា ស្បៀងអាហារដែលបានយកមកចែកជូនដល់កម្លាំងប្រជាការពារភូមិ និងនគរបាលទាំងនេះ បានមកពីការចូលរួមរបស់ព្រះសង្ឃក្នុងខេត្ត និងប្រជាពុទ្ឋបរិស័ទជិតឆ្ងាយយកមកប្រគេនហើយ ក្រុមការងារសាលាគណខេត្តបានធ្វើការបែងចែកទៅតាមលទ្ឋភាពដែលព្រះសង្ឃមាន ដើម្បីចែករំលែក និងចូលរួមជាមួយរាជរដ្ឋាភិបាល ក្នុងការទប់ស្កាត់កាត់បន្ថយការឆ្លងជំងឺឆ្លងកូវីដ-១៩ ដែលកំពុងបង្កហានិភ័យដោយគម្រាមកំហែងមកលើសុខភាព និងអាយុជីវិតប្រជាជនកម្ពុជា។
ព្រះតេជគុណ មានថេរដីកាទៀតថា បច្ចុប្បន្ននេះប្រជាពលរដ្ឋនៅក្នុងសង្កាត់គោកចក គឺត្រូវបានផ្អាកការធ្វើដំណើរចេញចូលជាបណ្តោះអាសន្ន ក្នុងគោលបំណងដើម្បីទប់ស្កាត់ការរីករាលដាលជំងឺកូវីដ-១៩។ ជាមួយគ្នានេះ អាជ្ញាធរបានប្រើប្រាក់កម្លាំងជាច្រើន សម្រាប់ការពារនៅតាមព្រំប្រទល់នានា ដោយក្នុងនោះដែលពួកគាត់ក៏ត្រូវការស្បៀងសម្រាប់ផ្គត់ផ្គង់ប្រចាំថ្ងៃ ដូច្នេះហើយបានជាមន្រ្តីសង្ឃនៃសលាគណខេត្តសៀមរាប បាននាំយកស្បៀងអាហារមួយចំនួនផ្តល់ជូនពួកគាត់នៅតាមគោលដៅនានា ដើម្បីជាការចូលរួមជាមួយអាជ្ញាធរខេត្ត។ ជាមួយនោះព្រះតេជគុណ ក៏បានអំពាវដល់ប្រជាពលរដ្ឋទាំងអស់ ត្រូវប្រកាន់ខ្ជាប់នូវវិធានការរបស់ក្រសួងសុខាភិបាល និងសេចក្តីអំពាវនាវរបស់រាជរដ្ឋាភិបាលគឺ ៣ការពារ និង៣កុំ ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ នៅក្នុងសហគមន៍របស់យើង។
សូមបញ្ជាក់ផងដែរថា ស្បៀងអាហារដែលត្រូវយកមកផ្តល់ជូនដល់កម្លាំងប្រជាការពារភូមិ និងនគរបាលនាឱកាសនោះដែរ រួមមាន៖សណ្តែកគួរ៦០គីឡូក្រាម ត្រសក់៦០គីឡូក្រាម ននោង៦០គីឡូក្រាម ឃ្លោក៤២គីឡូក្រាម ជីនាងវង៩គីឡូក្រាម ទឹកសុទ្ធ៣០០យួរ អង្ករ៦ការរ៉ុង ត្រីងៀត៦គីឡូក្រាម មី៦កេះ និងត្រីខ៦យួរ៕
អត្ថបទ និង រូបភាព៖ ឃុត សៅ
កែសម្រួល៖ អ៊ុន ណារាជ្យ
