គិតមកដល់ថ្ងៃទី២៨ ខែមីនា ឆ្នាំ២០២១នេះ ខេត្តសៀមរាបមានមនុស្ស១០នាក់បានឆ្លងជំងឺកូវីដ១៩ ក្នុងព្រឹត្តិការណ៍”សហគមន៍ ២០កុម្ភៈ” ។ នេះបើតាមករបញ្ជាក់ពីឯកឧត្តម ទៀ សីហា អភិបាលខេត្តសៀមរាប ក្នុងឱកាសដែលឯកឧត្តម អញ្ជើញចូលរួមក្នុងពិធីប្រគេនទេយ្យវត្ថុរបស់អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប ជូនចំពោះព្រះសង្ឃដែលនិមន្តមកពី៤៦វត្ត ក្នុងក្រុងសៀមរាប នៅព្រឹកថ្ងៃទី២៨ ខែមីនា ឆ្នាំ២០២១ ។
ឯកឧត្តម ទៀ សីហា បានបញ្ជាក់បន្ថែមថា ក្នុងចំណោមអ្នកទាំង១០នាក់នេះ មានស្ត្រីជាជនជាតិចិនម្នាក់ បានជាសះស្បើយ និងអនុញ្ញាតឲ្យចេញពីមន្ទីរពេទ្យរួចហើយ។ ជាមួយនឹងការឆ្លងមេរោគដ៏កាចសាហាវនេះ ឯកឧត្តមអភិបាលខេត្ត បានថ្លែងនូវការកោតសរសើរ និងអរគុណដល់ក្រុមគ្រូពេទ្យ ក៏ដូចជាអាជ្ញាធរពាក់ព័ន្ធនានា ដែលបានយកចិត្តទុកដាក់បំពេញការងារបានយ៉ាងល្អ។ ជាមួយគ្នានេះ ក្នុងនាមអាជ្ញាធរខេត្ត ក៏សូមអំពាវនាវដល់ប្រជាពលរដ្ឋចូលរួមអនុវត្តនូវវិធានការ “៣កុំ ៣ការពារ” របស់រាជរដ្ឋាភិបាល និងក្រសួងសុខាភិបាលឲ្យបានគ្រប់ៗគ្នា ហើយបើក្នុងករណីដែលបងប្អូនមិនបានអនុវត្តអាជ្ញាធរ នឹងធ្វើការអនុវត្តច្បាប់ដែលមានចែងជាធរមាន។
សូមជម្រាបថា ពាក់ព័ន្ធនឹងព្រឹត្តិការណ៍ “សហគមន៍២០កុម្ភៈ”នេះ កាលពីថ្ងៃទី០៩ ខែមីនា ឆ្នាំ២០២១ ខេត្តសៀមរាប បានរកឃើញជាដំបូងនូវស្ត្រីម្នាក់រស់នៅស្រុកពួក ដែលមានវិជ្ជមានកូវីដ-១៩ និងបានរកឃើញជាបន្តបន្ទាប់ទៀត ដែលមកដល់ថ្ងៃទី២៨ ខែមីនានេះ បានរកឃើញជាបន្តបន្ទាប់នូវអ្នកមានជំងឺកូវីដ-១៩ ចំនួន១០នាក់៕
អត្ថបទ៖ ជា ស្រស់
កែសម្រួល៖ អ៊ុន ណារាជ្យ
