នៅថ្ងៃទី២៨ ខែមីនា ឆ្នាំ២០២១ ឯកឧត្តម អ្នកឧកញ៉ា សៀងណាំ សមាជិកសភា និងជាតំណាងរាស្ត្រមណ្ឌលសៀមរាប និងលោកជំទាវ ព្រមទាំងបុត្រាបុត្រី បានរៀបពិធីប្រគេនទេយ្យទានដល់ព្រះសង្ឃ ៤៦វត្តក្នុងក្រុងសៀមរាប ក្រោមព្រះវត្តមាន និមន្តទទួលដោយព្រះមេគណ ព្រះគ្រូអនុគណ ព្រះចៅអធិការវត្តទាំង៤៦វត្ត និងមានការចូលរួមពីសំណាក់ឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោកជំទាវ ឯកឧត្តម ទៀ សីហា អភិបាលនៃគណៈអភិបាលខេត្ត ព្រមទាំងវត្តមានឯកឧត្តម លោកជំទាវ សមាជិកសមាជិកាក្រុមប្រឹក្សាខេត្ត លោកលោកស្រជាថ្នាក់ដឹកនាំអង្គភាពមន្ទីរមួយចំនួនក្នុងខេត្តផងដែរ។
ឯកឧត្តម អ្នកឧកញ៉ា សៀង ណាំ មានប្រសាសន៍ថា ពិធីប្រគេនទេយ្យទាននេះកើតឡើងដោយមានការណែនាំដ៏ខ្ពង់ខ្ពស់ ពីសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាល ចុះជួយខេត្តសៀមរាប បានអនុញ្ញាតិឱ្យឯកឧត្តម សហការជាមួយក្រុមប្រឹក្សាខេត្ត និងគណៈអភិបាលខេត្ត ដើម្បីរៀបចំទេយ្យទានប្រគេនព្រះសង្ឃក្នុងក្រុងសៀមរាប ដោយហេតុថាប្រជាពលរដ្ឋក្រុងសៀមរាបភាគច្រើនត្រូវធ្វើចត្តាឡីស័ក តាមផ្ទះ ដើម្បីការពារជំងឺកូវីដ-១៩ ហើយមិនបានចេញក្រៅមិនបានយកចង្ហាន់ទៅវត្ត ដែលធ្វើឱ្យវត្តអារាមទាំងឡាយខ្វះខាតចង្ហាន់ ភេសជ្ជៈ និងបច្ច័យ៤ផងដែរ។ ទេយ្យទាននាឱកាសនេះក៏អាចជួយសម្រាលបន្ទុក និងដោះទ័លដល់ព្រះតេជគុណគ្រប់ព្រះអង្គបានមួយរយៈ។
ឯកឧត្តម សៀង ណាំ បានទូលប្រគេន និងអំពាវនាវដល់ព្រះតេជគុណគ្រប់ព្រះអង្គជួយក្រើនរំលឹកដល់ញាតិញោមពុទ្ធបរិស័ទយើង ឱ្យពង្រឹងការគោរពតាមការណែនាំរបស់ក្រសួងសុខាភិបាល ក៏ដូចជាប្រសាសន៍ណែនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ស្តីពីការចូលរួមប្រយុទ្ធប្រឆាំងនឹងជំងឺកូវីដ-១៩។ ជាពិសេសគោលការណ៍៣កុំ ៣ការពារ ខាងលើឱ្យបានម៉ឺងម៉ាត់បំផុត។
មានប្រសាសន៍ក្នុងឱកាសនោះ ឯកឧត្តម ទៀ សីហា អភិបាលខេត្ត បានសម្តែងក្តីបារម្ភពីបញ្ហានៃការរីករាលដាលជំងឺកូវីដ-១៩ ចូលក្នុងសហគមន៍កាន់តែច្រើនឡើងៗ ដែលទាមទារឱ្យមានការប្រុងប្រយ័ត្ននិងបង្ការទប់ស្កាត់ទាំងអស់គ្នា។ ឥឡូវនេះ ខេត្តសៀមរាបមានការរីករាលដាលជាបន្តបន្ទាប់ដែលស្ថិតក្នុងចំណោម រាជធានី-ខេត្តដែលក្រសួងសុខាភិបាល បានចាត់ទុកជាទីតាំងមានហានិភ័យ និងមានការប្រុងប្រយ័ត្នខ្ពស់ដោយត្រូវអនុវត្តវិធានការ៣កុំ និង៣ការពារ។
ក្នុងនោះក៏សូមឲ្យបងប្អូនប្រជាពលរដ្ឋបន្តការពារ កុំឲ្យជំងឺនេះប៉ះដល់ក្រុមគ្រួសាររបស់លោកអ្នកឲ្យសោះ និងសូមចូលរួមផ្សព្វផ្សាយពីច្បាប់ស្តីពីការទប់ស្កាត់ការឆ្លងរាលដាលនៃជំងឺកូវីដ-១៩ និងអនុក្រឹត្យស្តីពីវិធានការចត្តាឡីស័ក ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ទាំងអស់គ្នា។
សូមបញ្ជាក់ថា ទេយ្យទានដែលត្រូវវេរប្រគេនព្រះសង្ឃទាំង ៤៦វត្តនៅពេលនេះ មានអង្ករ មី អំបិល ប៊ីចេង ត្រីខកំប៉ុង ទឹកត្រី ទឹកស៊ីអ៊ីវ ទឹកដោះគោ ស្កស ទឹកបរិសុទ្ធ និងបច្ច័យ ១លានរៀលក្នុងមួយវត្ត៕
អត្ថបទ ៖ យូ វង្ស
