ព្រះតេជគុណ ព្រះសទ្ធម្មប្បកាសនី តាត មហាទី ព្រះចៅអធិការវត្តព្រះឥន្ទ្រកោសា ក្រុងសៀមរាប មានសង្ឃីដីកានៅថ្ងៃទី២៩ ខែមីនានេះថា ក្រោយពីមានការណែនាំ ពីក្រសួងធម្មការ និងសាសនា គ្រប់វត្ដអារាមទាំងអស់បានអនុវត្ដសកម្មការងារនេះជាប់ជាប្រចាំនូវការទូងស្គរ វាយជួង វាយរគាំង ជាប្រចាំតាមម៉ោងកំណត់ និងប្រចាំថ្ងៃរបស់ក្រសួងធម្មការបានជូនដំណឹង។ ការអនុវត្ដវិធានការណ៍តាមគោលការណែនាំ របស់ប្រមុខរាជរដ្ឋាភិបាលនេះ គឺធ្វើឡើងមិនមែននៅតែក្នុងប្រទេសកម្ពុជានោះទេ សូម្បីលើពិភពលោក៍មានការដាស់ស្មារតីពលរដ្ឋ របស់ប្រទេសនីមួយៗដូចគ្នា តែគ្រាន់តែធ្វើឡើងរបៀបខុសគ្នា។
ព្រះអង្គមានសង្ឃដីកាទៀតថា ក្រៅពីវាយជួង វាយរគាំង ទូងស្គរ ព្រះអង្គក៍បានណែនាំដល់ប្រជាពលរដ្ឋតាមរយៈការទេសនា ដូចជាដាស់តឿនអោយពុទ្ធបរិសទ្ធត្រូវចូលរួមអនុវត្ដសារណែនាំរបស់ប្រមុខរាជរដ្ឋាភិបាល ៣ការពារ និង៣កុំ ឲ្យបានខ្ជាប់ខ្ជួនទើបប្រសើរ និងលុបបំបាត់ការរីករាលដាលនៃជំងឺកូវីដ១៩នេះ។
ព្រះគ្រូ ស រ៉ា ព្រះចៅអធិការវត្ដប្រាសាទត្រាំនាគ មានសង្ឃដីកាដែរថា តាមការសង្កេតឃើញនៅគ្រប់អាវត្ដអារាម ក្នុងខេត្ដសៀមរាប មានការអនុវត្ដជាប្រចាំក្នុងវាយជួង វាយរគាំង ទូងស្គរ ដើម្បីជាការក្រើនរំលឹកពលរដ្ឋប្រុងប្រយ័ត្នពីជំងឺកូវីដ១៩។ ជាមួយគ្នានោះការវាយរគាំង ទូងស្គរនេះ គឺមានតាំងពីបុរាណមកម្លេះ ដើម្បីដាស់តឿនដល់ប្រជាសាស្ដ្រខ្មែរអោយធ្វើអ្វីមួយតាមកាលពេលវេលា ដូចជាទូងស្គរនៅពេលចូលវស្សា ពេលព្រឹក ពេលល្ងាចជាដើម។ ក្នុងនោះតាមការសង្កេតរបស់ព្រះអង្គឃើញថា បច្ចុប្បន្នប្រជាពុទ្ធបរិស័ទ្ធចូលវត្ដ ពិតជាបានអនុវត្ដវិការធានការការពារនេះបានល្អប្រសើរផងដែរ។
សូមជម្រាបថា កាលពីថ្ងៃទី២៤ ខែមីនា ឆ្នាំ២០២១កន្លងទៅ ក្រសួងធម្មការ និងសាសនា បានចេញសេចក្ដីណែនាំដោយយោងតាមអនុវសាសន៍ណែនាំដ៍ខ្ពស់ខ្ពស់ របស់សម្ដេចតេជោ ហ៊ុន សែន នាករដ្ឋមន្ដ្រីនៃព្រះរាជណាចក្រកម្ពុជា ដោយតម្រូវឲ្យគ្រប់វត្ដអារាមទាំងអស់នៅទូទាំងប្រទេសត្រូវវាយគង រគាំង ជួង ទូងស្គរ ព្រមៗគ្នា ដើម្បីជាសញ្ញាផ្សព្វផ្សាយដល់ប្រជាពលរដ្ឋ ឲ្យបង្កើនការប្រុងប្រយ័ត្ន ដោយការអនុវត្ដ០៥ដងក្នុង ០១ថ្ងៃ ដោយលើកទី១ នៅម៉ោង៥:០០នាទីព្រឹក ,លើកទី២ នៅម៉ោង១១:០០នាទីព្រឹក ,លើកទី៣ នៅម៉ោង២:០០នាទីរសៀល លើកទី៤ នៅម៉ោង៥: ០០នាទីល្ងាច និងលើកទី៥ នៅម៉ោង ៨:០០នាទីយ៕
អត្ថបទ និង រូបភាព៖ ឈិត សាវី
