អ្នកលក់នំបញ្ចុកនៅភូមិព្រះដាក់ ស្រុកបន្ទាយស្រីចំនួន២គ្រួសារ មានសមាជិក៨នាក់ ដែលបានពាក់ព័ន្ធនឹងអ្នកជំងឺកូវីដ-១៩ បន្ទាប់ពីយកសំណាកទៅធ្វើតេស្តលើកទី១ លទ្ធផលបង្ហាញថា ពួកគាត់អវិជ្ជមានទាំងអស់។ នេះបើតាមការបញ្ជាក់នៅលើបណ្ដាញសង្គម ហ្វេលប៊ុកផេកផ្ទាល់ខ្លួនរបស់លោក ឃឹម ហ្វីណង់ អភិបាលស្រុកបន្ទាយស្រី នៅព្រឹកថ្ងៃទី២៩ ខែមីនា ឆ្នាំ២០២១នេះ ។
ក្នុងខ្លឹមថានោះដែរលោក ឃឹម ហ្វីណង់ បានបន្ថែមថា ទោះជាយ៉ាងណាក៏ដោយ ក៏យើងនៅតែបន្តចត្តាឡីស័កពួកគាត់បន្តទៀត ហើយត្រូវយកសំណាក់ និងរង់ចាំលទ្ធផលជាលើកទី២មួយទៀត ទើបអាចធានាសុវត្ថិភាពបានទាំងស្រុង។
ដើមចមដែលនាំឲ្យមានការយកសំណាកពីអ្នកលក់នំបញ្ចុកនេះ ដោយសារកាលពីថ្ងៃទី២៧ ខែមីនា ឆ្នាំ២០២១កន្លងទៅ មានបុរសជាអ្នកបើកបររថយន្តដឹកភ្ញៀវ ត្រូវបានក្រុមគ្រូពេទ្យខេត្តសៀមរាមរកឃើញថា គាត់មានវិជ្ជមានមេរោគកូវីដ១៩។ បន្ទាប់ពីសាកសួរ បុរសរូបនេះ បានប្រាប់គ្រូពេទ្យថា រូបគាត់ធ្លាប់ទៅទទួលទាននំបញ្ចុកនៅភូមិព្រះដាក់ និងទៅទីកន្លែងមួយចំនួនទៀត ដូចជាហាងកាហ្វេលឹង្គ១០០០ នៅក្រុងសៀមរាប។
បន្ទាប់ពីទទួលព័ត៌មាននេះ រដ្ឋបាលស្រុកបន្ទាយស្រី បានសម្រេចបិទផ្ទះលក់នំបញ្ចុកនៅក្នុងភូមិព្រះដាក់ចំនួន២ និងបានយកសំណាកពីសមាជិកគ្រួសារលក់នំបញ្ចុកចំនួន៨នាក់ទៅធ្វើតេស្ត ដែលលទ្ធផលលើកទី១ គឺអវិជ្ជមាន។
ដោយឡែកអ្នកពាក់ព័ន្ធបុរសខាងលើនៅហាងកាហ្វេលឹង្គ១០០០ អាជ្ញាធរសុខាភិបាលបានរកឃើញមនុស្ស២នាក់ មានវិជ្ជមាមេរោគកូវីដ-១៩។
សូមជម្រាបថា បើតាមឯកឧត្តម ទៀ សីហា អភិបាលខេត្តសៀមរាប កាលពីថ្ងៃទី២៨ ខែមីនាម្សិលមិញបានឲ្យដឹងថា គិតចាប់តាំងពីមានផ្ទុះព្រឹត្តិការណ៍សហគមន៍២០កុម្ភៈ មកដល់ថ្ងៃទី២៨ ខែមីនា ឆ្នាំ២០២១ ខេត្តសៀមរាបបានរកឃើញអ្នកផ្ទុកកូវីដ១៩ ចំនួន១០នាក់ ក្នុងនោះមានម្នាក់បានជាសះស្បើយ។ ជាមួយការកឃើញនេះឯកឧត្តមអភិបាលខេត្ត ក៏បានអំពាវនាវដល់ប្រជាពលរដ្ឋ ក៏ដូចជាអាជ្ញាធរគ្រប់ជាន់ថ្នាក់ត្រូវអនុវត្តឲ្យបានជាប់ជាប្រចាំ ចំពោះវិធានការនានារបស់ក្រសួងសុខាភិបាល ជាពិសេសវិធានការ”៣កុំ និង៣ការពារ”៕
អត្ថបទ និង រូបភាព៖ ជា ស្រស់
