នៅថ្ងៃទី២៨ ខែមីនា ឆ្នាំ២០២១ កម្លាំងនគរបាល នៃអធិការដ្ឋាននគរបាលក្រុងសៀមរាប បានចាត់កម្លាំងចុះណែនាំ និងធ្វើកិច្ចសន្យាលើកទី១ ដល់ហាងកាហ្វេ លឹម ឆាយ នៅជិតស្ពានអាងក្រពើ ស្ថិតក្នុងភូមិសាលាកន្សែង សង្កាត់សាលាកំរើក ក្រុងសៀមរាប ក្រោយពិនិត្យឃើញថា ទីតាំងនេះ មិនបានអនុវត្តន៍វិធានការរក្សាគម្លាតបុគ្គល ស្របតាមប្រការ៤ នៃប្រកាសរបស់ក្រសួងសុខាភិបាល ចុះថ្ងៃទី២២ ខែមីនា ឆ្នាំ២០២១ ស្តីពីកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាពក្នុងអំឡុងពេលនៃការឆ្លងរាលដាលនៃជំងឺកូវីដ-១៩ ក្នុងសហគមន៍ នេះតាមការចុះផ្សាយរបស់រដ្ឋបាលខេត្តសៀមរាប។
សម្រាប់កិច្ចសន្យាលើកទី១នេះ កម្លាំងនគរបាល បានអប់រំណែនាំ ដល់ម្ចាស់ទីតាំងហាងកាហ្វេនេះ ត្រូវអនុវត្តនូវវិធានការកាតព្វកិច្ច រក្សាគម្លាតសុវត្ថិភាព ដោយពុំមានដាក់ទោសទណ្ឌឡើយ។ ក្នុងករណី ម្ចាស់ទីរងមិនរាងចាល និងបន្តអនុវត្តន៍បំពាននឹងច្បាប់ និងអនុក្រឹត្យរបស់រាជរដ្ឋាភិបាល ចុះថ្ងៃទី២២ ខែមីនា ឆ្នាំ២០២១ ព្រមទាំងខ្លឹមសារនៃប្រកាស របស់ក្រសួងសុខាភិបាលចុះថ្ងៃទី២២ ខែមីនា ឆ្នាំ២០២១ នោះ ម្ចាស់ទីតាំងនេះ នឹងត្រូវរងការផ្តន្ទាទោស ជាការពិន័យអន្តរការណ៍ពី២លានរៀល ទៅ១០លានរៀល។ ដោយឡែកចំពោះបុគ្គលដែលមិនអនុវត្ត ក៏ត្រូវទទួលទណ្ឌកម្មដូចគ្នាផងដែរ ដោយលើកទី១ ជាការព្រមាន សម្រាប់លើកទី២ នឹងត្រូវរងការផ្តន្ទាទោស ជាការពិន័យអន្តរការណ៍ផងដែរ។
គណៈបញ្ជាការឯកភាពរដ្ឋបាលខេត្ត ក្រោមការដឹកនាំរបស់ ឯកឧត្តម ទៀ សីហា ជាប្រធាន និងជាអភិបាលនៃគណៈអភិបាលខេត្តសៀមរាប បានណែនាំដល់សមត្ថកិច្ចគ្រប់លំដាប់ថ្នាក់ គណៈបញ្ជាការឯកភាពរដ្ឋបាលក្រុង ស្រុក ឃុំ សង្កាត់ ត្រូវចាត់វិធានការ អនុវត្តន៍តាមខ្លឹមសារច្បាប់ និងលិខិតបទដ្ឋានគតិយុត្តពាក់ព័ន្ធទៅនឹងការពង្រឹង ការចាត់វិធានការតឹងរ៉ឹងបំផុតចំពោះការឆ្លងរាលដាលជំងឺកូវីដ-១៩។
រដ្ឋបាលខេត្តនៅតែបន្តអំពាវនាវ ដល់បងប្អូនប្រជាពលរដ្ឋ ចូលរួមអនុវត្តន៍វិធានការ ៣ការពារ ត្រូវពាក់ម៉ាស់ ត្រូវលាងដៃ ត្រូវរក្សាគម្លាតបុគ្គល និង ៣កុំ កុំនៅបន្ទប់បិទជិត កុំនៅកន្លែងកុះករ កុំប៉ះពាល់គ្នា៕