អាជ្ញាធរខេត្ដសៀមរាប បានណែនាំដល់មន្ដ្រីបំរើការងារតាមសង្កាត់ក្រុងស្រុក ក្នុងខេត្ដសៀមរាប ចូលផ្សព្វផ្សាយវិធានការការណ៍ការពារជំងឺកូវីដ១៩ អោយបានជាប់ជាប្រចាំ ដូចជា៣ការពារ ៣កុំ ដើម្បីទប់ស្កាត់ការឆ្លងជំងឺកូវីដ១៩ នៅក្នុងសហគមន៍បន្ថែមទៀត។ ការណែនាំនេះធ្វើឡើងនៅក្នុងពិធីប្រគេនទ័យទានដល់ព្រះសង្ឃ៤៦វត្ដ ដែលរៀបចំដោយតំណាងរាស្ដ្រខេត្ដសៀមរាប ឯកឧត្ដម សៀង ណាំ កាលពីព្រឹកថ្ងៃទី២៨ ខែមីនា ឆ្នាំ២០២១នេះ។
ឯកឧត្ដម ទៀ សីហា អភិបាលខេត្ដសៀមរាប មានប្រសាសន៍ថា ព្រឹត្តិការណ៍សហគមន៍២០កុម្ភៈ មានអ្នកឆ្លងជំងឺកូវីដ១៩ជាច្រើនរយនាក់ជាបន្ដបន្ទាប់នៅទូទាំងប្រទេស ដោយក្នុងនោះខេត្តសៀមរាប មានអ្នកឆ្លងកូវីដ១៩ចំនួន១០នាក់ បាននឹងកំពុងសំរាកព្យាបាលនៅមន្ទីរពេទ្យខេត្ដ ដូច្នេះក្រុមការងារនៅតាមសង្កាត់ ក្រុង ស្រុក ទូទាំងខេត្ដសៀមរាប ត្រូវចូលរួមផ្សព្វផ្សាយនិងណែនាំអោយប្រជាពលរដ្ឋ ចូលរួមអនុវត្ដវិធានការណ៍បីការពារ បីកុំ តាមការណែនាំរបស់រាជរដ្ឋាភិបាលក៍ជាក្រសួងសុខាភិបាល អោយបានជាប់ជាប្រចាំ ដើម្បីការពារកុំឆ្លងចូលសហគមន៍បន្ដទៀត។
ឯកឧត្ដមបានបន្ដថា អ្នកដែលឆ្លងជំងឺកូវីដ១៩នៅខេត្ដសៀមរាបចំនួន១០នាក់នោះ មានជនជាតិចិនម្នាក់ដែរ ប៉ុន្ដែបានជាសះស្បើយនិង ចេញពីមន្ទីរពេទ្យហើយ។ ជាមួយនឹងការឆ្លងមេរោគដ៏កាចសាហាវនេះ ឯកឧត្តមអភិបាលខេត្ត បានថ្លែងនូវការកោតសរសើរ និងអរគុណដល់ក្រុមគ្រូពេទ្យ ក៏ដូចជាអាជ្ញាធរពាក់ព័ន្ធនានា ដែលបានយកចិត្តទុកដាក់បំពេញការងារបានយ៉ាងល្អ។ ជាមួយគ្នានេះ ក្នុងនាមអាជ្ញាធរខេត្ត ក៏សូមអំពាវនាវដល់ប្រជាពលរដ្ឋចូលរួមអនុវត្តនូវវិធានការ “៣កុំ ៣ការពារ” របស់រាជរដ្ឋាភិបាល និងក្រសួងសុខាភិបាលឲ្យបានគ្រប់ៗគ្នា ហើយបើក្នុងករណីដែលបងប្អូនមិនបានអនុវត្តអាជ្ញាធរ នឹងធ្វើការអនុវត្តច្បាប់ដែលមានចែងជាធរមាន។ ក្នុងនោះក៏សូមឲ្យប្រជាពលរដ្ឋត្រៀមខ្លួនដើម្បីទទួលចាក់វ៉ាក់សាំងការពារជំងឺកូវីដ១៩ ដែលនឹងកមកដល់នាពេលឆាប់ៗខាងមុខនេះផងដែរ។
សូមជម្រាបថា ក្នុងព្រឹត្តិការណ៍សហគមន៍ ២០កុម្ភៈ ខេត្តសៀមរាប អ្នកមានឆ្លងជំងឺកូវីដ១៩បានកើនឡើងដល់ចំនួន១០នាក់ហើយ រួមមាន នៅឃុំសំរោងយា ក្នុងស្រុកពួក ចំនួន០១នាក់ នៅសង្កាត់គោកចក ក្រុងសៀមរាបចំនួ០២ នាក់ នៅសង្កាត់ស្លក្រាម ក្រុងសៀមរាប ចំនួន០៤នាក់ និង នៅសង្កាត់ស្វាយដង្គំ ក្រុងសៀមរាប ចំនួន០២នាក់ ក្នុងនោះមានម្នាក់ ដែលបម្រើការនៅហាងកាហ្វេលឹង្គ១០០០ គឺមានអាសយដ្ឋានស្នាក់នៅភូមិត្រពាំងទឹម ឃុំកណ្ដែក ស្រុកប្រាសាទបាគង និងជនជាតិចិនម្នាក់ទៀតប៉ុន្ដែបានជាសះស្បើយ និងចេញពីមន្ទីរពេទ្យហើយ៕
អត្ថបទ៖ ឈិត សាវី
