នៅថ្ងៃទី២៥ ខែមីនា ឆ្នាំ២០២១ លោក នាក់ ណេរ៉ុន អភិបាលរងខេត្ត តំណាងដ៍ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្ត បានដឹកនាំក្រុមការងារស្រាវជ្រាវ និងត្រួតពិនិត្យតាមដានបុគ្គលសង្ស័យមានផ្ទុកកូវីដ-១៩ ធ្វើការផ្សព្វផ្សាយ និងណែនាំដល់ក្រុមការងារប៉ុស្តិ៍ត្រួតពិនិត្យសុខភាពបឋម ដែលឈរជើងប្រចាំការនៅតាមដងផ្លូវជាតិលេខ៦ ស្ថិតនៅព្រំប្រទល់ស្រុកស្ទោង ខេត្តកំពង់ធំ-ខេត្តសៀមរាប និងព្រំប្រទល់ស្រុកក្រឡាញ់ នឹងស្រុកព្រះនេត្រព្រះ ខេត្តបន្ទាយមានជ័យ ដើម្បីឱ្យក្រុមការងារប៉ុស្តិ៍ត្រួតពិនិត្យសុខភាពបឋមទាំងពីរ ណែនាំទៅកាន់អ្នកបើកបរ និងអ្នកធ្វើដំណើរតាមរថយន្តឈ្នួលរថយន្តក្រុង និងរថយន្តលក្ខណៈគ្រួសារទាំងអស់ឆ្លងកាត់ចូលខេត្តសៀមរាប ត្រូវតែបំពេញតាមទម្រង់ព័ត៌មានដល់ក្រុមការងារ ដើម្បីងាយស្រួលដល់ក្រុមការងារ ក្នុងការទទួលបានព័ត៌មានច្បាស់លាស់ពីអ្នកដំណើរ។
លោក នាក់ ណេរ៉ុន មានប្រសាសន៍ថា រដ្ឋបាលខេត្តបានរៀបចំជាតារាងទម្រង់ព័ត៌មាននៃបញ្ជីឈ្មោះអ្នកបើកបរនិងអ្នកធ្វើដំណើរក្នុងរថយន្ត ដើម្បីបង្កភាពងាយស្រួលក្នុងការពិនិត្យនិងផ្តល់ព័ត៌មាននៅពេលដែលរកឃើញថាអ្នករួមដំណើរជាមួយមានការសង្ស័យឬមានវិជ្ជមានជំងឺកូវីដ-១៩ ក្រុមការងារនឹងជូនដំណឹងទៅអ្នករួមដំណើរជាមួយ ឬឱ្យក្រុមគ្រួសារគាត់បានដឹង ដើម្បីឱ្យអ្នករួមដំណើរទាំងអស់ធ្វើចត្តាឡីស័កនៅក្នុងផ្ទះដោយខ្លួនឯង ឬក៍ទៅធ្វើតេស្តពិនិត្យសំណាកឱ្យបានទាន់ពេលវេលាកាត់បន្ថយនូវការឆ្លងរីករាលដាលនៃជំងឺដ៍សាហាវនេះ។ ក្នុងការអនុវត្តកន្លងមកបងប្អូនអ្នកធ្វើដំណើរពេលមកដល់ចំណុចប៉ុស្តិ៍ត្រួតពិនិត្យសុខភាពបឋម មានភាពធុញទ្រាន់ដោយសារការវាស់កំដៅ និងកត់ឈ្មោះ និងខ្លះបារម្ភខ្លាចគេយកទៅធ្វើចត្តាឡីស័កខណៈដែលពួកគាត់មិនមានពាក់ព័ន្ឋអ្វីសោះ ឯក្រុមការងារប្រចាំការក៍ជួបបញ្ហាលំបាកច្រើនដែរពេលខ្លះអ្នកដំណើរមកច្រើននាំឱ្យមានការយឺតយ៉ាវ កកស្ទះក្នុងការ Scan QR Code វាស់កំដៅ និងកត់ឈ្មោះមានភាពយឺតយ៉ាវ។
លោក នាក់ ណេរ៉ុន បន្ថែមថា គណៈបញ្ជាការឯកភាពរដ្ឋបាលខេត្ត នឹងចាត់វិធានការតាមផ្លូវច្បាប់ចំពោះអ្នកបើកបរ ឬអ្នកដំណើរណាដែលបានផ្ដល់ព័ត៌មានមិនពិត ឬពុំសហការជាមួយក្រុមការងារជំនាញនៅតាមចំណុចគោលដៅខាងលើ នឹងប្រឈមទទួលខុសត្រូវចំពោះមុខច្បាប់។ ក្នុងនោះក៏សូមឲ្យអ្នកបើកបរអ្នកអ្នកដំណើរឆ្លងកាត់ចូលមកខេត្តសៀមរាបទាំងអស់ ត្រូវប្រកាន់ ខ្ជាប់នូវវិធានការរបស់ក្រសួងសុខាភិបាល និងសេចក្តីអំពាវនាវរបស់រាជរដ្ឋាភិបាលក្នុងការទប់ស្កាត់ការរីករាល ដាលនៃជំងឺកូវីដ-១៩ ។
ព័ត៌មានជាតិ ថ្មីៗ
សូមជំរាបថា គណៈបញ្ជាការឯកភាពរដ្ឋបាលខេត្តសៀមរាប បានរៀបចំដាក់ប៉ុស្តិ៍ត្រួតពិនិត្យសុខភាពបឋមជំហានទី១ នៅចំណុចព្រំប្រទល់ស្រុកជីក្រែង ខេត្តសៀមរាប និងស្រុកស្ទោង ខេត្តកំពង់ធំ កាលពីថ្ងៃទី៩ខែមីនា និងថ្ងៃទី២០ ខែមីនា ឆ្នាំ២០២១ បានរៀបចំជំហានទី២ នៅព្រំប្រទល់ស្រុកក្រឡាញ់ ខេត្តសៀមរាប និងស្រុកព្រះនេត្រព្រះ ខេត្តបន្ទាយមានជ័យ។ ក្នុងនោះបងប្អូនប្រជាពលរដ្ឋអាចដឹកទំនិញ និងធ្វើដំណើរឆ្លងកាត់បានជាធម្មតាដោយមិនមានការហាមឃាត់នោះឡើយ ដោយគ្រាន់តែមានការត្រួតពិនិត្យសុខភាពវាសកំដៅ ស្រង់ស្ថិតិ ស្កែន QR Code Stop COVID-19 “ទប់ស្កាត់ ជំងឺកូនវីដ១៩ ដោយមិនមានតម្រូវឱ្យធ្វើចត្តាឡីស័កលើកលែងតែករណីសង្ស័យ៕
អត្ថបទ និង រូបភាព៖ យូ វង្ស ,ងិន គឹមឡេង
