ដើម្បីជំរុញ និងបង្កើនភាពទាក់ទាញដល់អ្នកទេសចរមកកម្សាន្តនៅក្នុងខេត្តសៀមរាប នៅរដូវភ្លៀងធ្លាក់ ជាពិសេសក្នុងខែកញ្ញានេះ អាជ្ញាធរខេត្តសៀមរាប រួមនិងវិស័យឯកជន បានសហការផ្ដួចផ្ដើមគំនិតបង្កើតព្រឹត្តិការណ៍នានា ដើម្បីទាក់ទាញអ្នកទេសចរបន្ថែមទៀត។
ក្នុងកិច្ចប្រជុំត្រៀមរៀបចំពិធីអបអរសាទរទិវាទេចរពិភពលោក នាព្រឹកថ្ងៃទី០៤ ខែកញ្ញា ឆ្នាំ២០២៤នេះ លោក ង៉ូវ សេងកាក់ អភិបាលរងខេត្តសៀមរាប បានឱ្យដឹងថា នៅថ្ងៃទី២៧ ខែកញ្ញា ឆ្នាំ២០២៤ខាងមុខនេះ អាជ្ញាធរខេត្តសៀមរាប សហការជាមួយវិស័យឯកជន នឹងរៀបចំពិធីអបអរសាទរទិវាទេចរពិភពលោក ក្រោមប្រធានបទ “ទេសចរ និងសន្តិភាព” ដែលពិធីនេះនឹងចាប់ផ្តើមពីម៉ោង៥ល្ងាច រហូតដល់ម៉ោង៩យប់ ដោយមានការដង្ហែក្បួន ការសម្តែងសិល្បៈ ការតាំងបង្ហាញផលិតផលទេសចរណ៍ជាដើម។
លោកអភិបាលរងបន្តថា នេះជាព្រឹត្តិការណ៍មួយក្នុងចំណោមព្រឹត្តិការណ៍ផ្សេងទៀតដែលមាននៅក្នុងខែកញ្ញា ឆ្នាំ២០២៤នេះ ដោយខែនេះដែរ យើងមានព្រឹត្តិការណ៍សំខាន់ៗ៣ រួមមាន៖ ការរៀបចំទទួលស្វាគមន៍ព្រឹត្តិការណ៍ Gumball 3000 Rally in Cambodia ថ្ងៃទី១៦ និង១៧, ព្រឹត្តិការណ៍សមរាត្រី (ព្រះអាទិត្យរះចំកំពូលកណ្តាលប្រាសាទអង្គរ) នៅថ្ងៃទី២១ ដល់ថ្ងៃទី២៣ និងពិធីអបអរសាទរទិវាទេចរពិភពលោកដែលធ្វើនៅថ្ងៃទី២៧ ខែកញ្ញានេះ។ សម្រាប់ព្រឹត្តិការណ៍ទាំង៣ នឹងជួយផ្សព្វផ្សាយពីផលិតផលទេសចរណ៍កម្ពុជា ជាពិសេសនៅខេត្តសៀមរាប ទៅកាន់ពិភពលោក។
លោកក៏បានបញ្ជាក់ថា ក្រៅពីការរៀបចំព្រឹត្តិការណ៍នានាហើយនោះ អាជ្ញាធរក៏ដូចជាភាគីពាក់ព័ន្ធនានា ក៏បានផ្តួចផ្តើមនូវការអំពាវនាវដល់វិស័យឯកជន ក្នុងវិស័យទេសចរណ៍ ធ្វើការបញ្ចុះតម្លៃសេវាកម្ម ទាំងការស្នាក់នៅ ការធ្វើដំណើរ និងថ្លៃម្ហូបអាហារពេញមួយខែកញ្ញានេះផងដែរ ដែលនេះក៏ជាការទាក់ទាញអ្នកទេសចរមកកម្សាន្តក្នុងរដូវភ្លៀងនេះផងដែរ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
