ក្រសួងធម្មការ និងសាសនា សហការជាមួយមូលនិធិអង្គការសហប្រជាជាតិដើម្បីកុមារ (UNICEF) ប្រចាំនៅព្រះរាជាណាចក្រកម្ពុជា បានរៀបចំបើកវគ្គបណ្តុះបណ្តាលរយៈពេលបីថ្ងៃសម្រាប់គ្រូបង្គោលសុវត្ថិភាពកុមារតាមវត្តអារាមស្តីពីការផ្សព្វផ្សាយយុទ្ធនាការ គ្រួសារ រឹងមាំ សំដៅលើកកម្ពស់ការយល់ដឹងដើម្បីលុបបំបាត់អំពើហិង្សាលើកុមារ និងទប់ស្កាត់ការបំបែកកុមារចេញពីគ្រួសារដោយមិនចាំបាច់។ នេះជាលើកដំបូងសម្រាប់ខេត្តសៀមរាប បានបើកវគ្គបណ្តុះបណ្តាលដល់ព្រះចៅអធិការ ព្រះសង្ឃ អាចារ្យ ចំនួន៥០អង្គ/នាក់ មកពីវត្តចំនួន១៦ក្នុងចំណោមវត្តទាំង៣៣ ក្នុងស្រុកពួកខេត្តសៀមរាប។ ចាប់ពីថ្ងៃទី៣ដល់ទី៥ ខែកញ្ញា ឆ្នាំ២០២៤ នៅវត្តទីមុនីរង្សី (ហៅវត្តព្រះអង្គទ្រង់) ភូមិព្រះអង្គទ្រង់ ឃុំល្វា ស្រុកពួក ខេត្តសៀមរាប ក្រោមគោលបំណង តម្រង់ទិសគ្រូបង្គោលសុវត្ថិភាពកុមារតាមវត្តអារាមអំពីការអនុវត្តការផ្សព្វផ្សាយយុទ្ឋនាការគ្រួសាររឹងមាំនៅតាមវត្តអារាម និងដល់ប្រជាជនសហគមន៍នៅជុំវិញវត្ត និងដើម្បីអនុវត្តពីរបៀបប្រើប្រាស់ឧបករណ៍សម្ភារៈ និងឧបទេសសម្រាប់ផ្សព្វផ្សាយយុទ្ធនាការ គ្រួសាររឹងមាំ។
មានសង្ឃដិការក្នុងពិធីបិទវគ្គបណ្តុះបណ្តាលនារសៀលថ្ងៃទី០៥ ខែសីហាឆ្នាំ២០២៤ ព្រះធម្មសិរី អាភាករោ ជុំ គឹមឡេង ព្រះសុមង្គលសិលាចារ្យ ព្រះមេគណខេត្ត បានបង្ហាញព្រះទ័យគាំទ្រកម្មវិធីនៃវគ្គបណ្តុះបណ្តាលនេះថាជាទុនមួយសម្រាប់យកទៅអប់រំផ្សព្វផ្សាយបន្ត និងបញ្ជ្រាបនៅតាមមូលដ្ឋាន តាមកម្មវិធីបុណ្យ ឬពិធីផ្សេងៗដែលអាចធ្វើទៅបាន ដើម្បីឱ្យម្តាយឱពុក អាណាព្យាបាលយល់ដឹងអំពីសិទ្ឋកុមារ ចេះគិតពិចារណា និងសម្លឹងទៅអនាគតវែងឆ្ងាយរបស់កុមារ និងរួមគ្នាបញ្ចៀសឬបញ្ឈប់អំពើហិង្សា និងការរំលោភបំពានកុមារក្នុងគ្រប់ទម្រង់។
ព័ត៌មានជាតិ ថ្មីៗ
ព្រះមេគណខេត្តមានថេរដីកាថា៖ ព្រះសង្ឃមានតួនាទីសំខាន់ណាស់ក្នុងការតម្រង់ផ្លូវ ដឹកនាំផ្លូវចិត្តប្រជាជននិងជាតំណាងសីលធម៌សង្គម ស្របទៅតាមពុទ្ឋោវាទដែលតែងតែបង្រៀនមនុស្សឱ្យមានភាពថ្លៃថ្នូរ មានករុណាធម៌ចេះទទួលខុសត្រូវនិងបង្រៀនពួកគេឱ្យចេះរស់នៅជាមួយគ្នាប្រកបដោយសុភមង្គល ព្រោះថាព្រះសង្ឃត្រូវបានមនុស្សទូទៅគោរព និងស្តាប់បង្គាប់ ទាំងនេះហើយដែលធ្វើឱ្យព្រះសង្ឃអាចអប់រំមនុស្សទូទៅអំពីបញ្ហាធ្ងន់ធ្ងរទាំងឡាយបានមួយចំណែកធំដែរ។
មុននឹងប្រគេន និងជូនវិញ្ញាបនបត្រដល់សិក្ខាកាម ក្នុងនាម ឯកឧត្តម សេង សុមុនី រដ្ឋលេខាធិការប្រចាំការក្រសួង តំណាងឲ្យ ឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា បានមានប្រសាសន៍ថា៖ការនិមន្តមកចូលរួម របស់ព្រះថេរានុត្ថេរៈ និងអាចារ្យទាំង១៦វត្តនេះបង្ហាញឱ្យឃើញពីព្រះទ័យ និងការយកចិត្តទុកដាក់ដើម្បីក្រេបយកចំណេះដឹងពីផ្នែកអាណាចក្រ យកទៅអប់រំទូន្មានដល់កូនចៅប្រជាពលរដ្ឋនៅតាមសហគមន៍មូលដ្ឋាន ហើយសង្ឃឹមថាតាមរយៈការអប់រំជារឿយៗរបស់គ្រូបង្គោលដែលទទួលបានការបណ្តុះបណ្តាលនៅពេលនេះ នឹងបានជ្រួតជ្រាបរីកសាយបញ្ជា្របការយល់ដឹងទៅដល់ស្រទាប់មហាជនកាន់តែច្រើនឡើងជាលំដាប់។
ឯកឧត្តម មានប្រសាសន៍ថា៖វត្តអារាមនានាគឺបានបណ្តុះនូវភាពភ្លឺស្វាង ស្អាតស្អំ និងស្ងប់ស្ងាត់ដែលនាំទៅដល់ភាពសុខចំរើនក្នុងព្រះពុទ្ឋសាសនា និងសង្គមជាតិ។ ឯកឧត្តម រដ្ឋលេខាធិការបន្ថែមថា៖ ព្រះសង្ឃជាចលករមួយដ៏សំខាន់ និងក៏ជាតួអង្គគំរូក្នុងសង្គម រួមគ្នាទប់ស្កាត់អំពើហិង្សា និងការរំលោភបំពារបំពានផ្សេងៗចំពោះកុមារនិងមនុស្សគ្រប់រូបផងដែរ ហេតុនេះសូមព្រះថេរានុត្ថេរៈនិងអាចារ្យ ទាំងអស់មេត្តាជួយផ្សព្វផ្សាយ អប់រំ ទេសនា ប្រដៅណែនាំដល់ប្រជាសហគមន៍មូលដ្ឋានទាំងក្មេងទាំងចាស់ឱ្យចៀសវាងពីការប្រើអំពើហិង្សាគ្រប់ទម្រង់ ដែលនាំឱ្យខ្លួនមានទោសទាំងផ្លូវលោក និងផ្លូវធម៌៕
អត្ថបទ និងរូបភាព ៖ យូ វង្ស
កែសម្រួល ៖ ហាំ ម៉េងហួត
