ដើម្បីស្របទៅនឹងយុទ្ធសាស្រ្ដរបស់រាជរដ្ឋាភិបាលកម្ពុជា នីតិកាលទី៧នេះ មណ្ឌលសុខភាព និងមន្ទីរពេទ្យបង្អែកស្រុកជាច្រើននៅតាមបណ្ដាខេត្ត បាននិងកំពុងអភិវឌ្ឍយ៉ាងឆាប់រហ័សឥតឈប់ឈរ ហើយក្នុងនោះមន្ទីរពេទ្យបង្អែកពួក ខេត្តសៀមរាប ក៏កំពុងយកចិត្តទុកដាក់ការតែខ្ពស់ក្នុងការផ្ដល់សេវាជូនពលរដ្ឋ ស្របពេលដែលមន្ទីរពេទ្យបង្អែកមួយនេះ មានឧបករណ៍ និងសម្ភារៈទំនើបបែបឌីជីថលមួយចំនួនធំ សម្រាប់ប្រើប្រាស់ក្នុងការផ្ដល់សេវា។
នេះបើតាមការលើកឡើងរបស់ លោកវេជ្ជបណ្ឌិត ម៉ង់ សម្បត្តិ ប្រធានមន្ទីរពេទ្យបង្អែកពួក ខេត្តសៀមរាប ក្នុងកម្មវិធីសន្ទនាមតិរបស់វិទ្យុ និងទូរទស្សន៍ជាតិខេត្តសៀមរាប នៅព្រឹកថ្ងៃទី០៦ ខែកញ្ញា ឆ្នាំ២០២៤នេះ។
លោកវេជ្ជបណ្ឌិត ម៉ង់ សម្បត្តិ បានបញ្ជាក់ថា សព្វថ្ងៃការផ្សព្វផ្សាយកាន់តែទូលំទូលាយ ធ្វើឱ្យប្រជាពលរដ្ឋយល់ដឹងបានច្រើន ក្នុងការការពារខ្លួនពីជំងឺផ្សេងៗ និងមកពិនិត្យបានទាន់ពេលវេលា ហើយជាមធ្យមមន្ទីរពេទ្យបង្អែកពួក ក្នុងមួយថ្ងៃមានប្រជាពលរដ្ឋមករក និងទទួលសេវាប្រមាណ៨០ ទៅ ១០០នាក់ ដោយសារមន្ទីរពេទ្យមានឧបករណ៍ និងសម្ភារៈទំនើបមួយចំនួន សម្រាប់ប្រើប្រាស់ក្នុងការពិនិត្យជំងឺជូនពួកគាត់។ ប៉ុន្តែយ៉ាងណាមន្ទីរពេទ្យ ក៏នៅខ្វះខាតឧបករណ៍មួយចំនួនបន្ថែមទៀត ដើម្បីសម្រួលឱ្យការអនុវត្តការងារផ្ដល់សេវារបស់ក្រុមគ្រូពេទ្យកាន់តែងាយស្រួលក្នុងការវិនិច្ឆ័យអាការៈរបស់អ្នកជំងឺ។
ប៉ុន្តែទោះជាយ៉ាងណា លោកវេជ្ជបណ្ឌិត ក៏នៅតែទទូចដល់ប្រជាពលរដ្ឋ សូមមកទទួលសេវាព្យាបាលជំងឺនៅតាមមន្ទីរពេទ្យរដ្ឋឱ្យបានច្រើន ព្រោះវាអាចជួយកាត់បន្ថយការចំណាយរបស់បងប្អូន។ មួយវិញទៀតនៅតាមមន្ទីរពេទ្យរដ្ឋបច្ចុប្បន្ន ក៏មានឧបករណ៍ និងសម្ភារៈទំនើបៗ សម្រាប់ពិនិត្យ ព្យាបាលជំងឺជុនបងប្អូនដូចជាបណ្ដាពេទ្យឯកជនមួយចំនួនផងដែរ៕
អត្ថបទ៖ មន្ត្រីវិទ្យុ
កែសម្រួល៖ លោក អ៊ុន ណារាជ្យ
