គណៈកម្មការលទ្ធកម្មឃុំសំបួរ ស្រុកក្រឡាញ់ ខេត្តសៀមរាប នៅថ្ងៃទី០៤ ខែកញ្ញា ឆ្នាំ២០២៤នេះ បានប្រកាសបញ្ចប់ការដេញថ្លៃគម្រោងសាងសង់ផ្លូវបេតុងអាមេ១ខ្សែ និងគម្រោងជួសជុលផ្លូវដីសក្រាលក្រួសធម្មជាតិ ១ខ្សែ ប្រកបដោយជោគជ័យ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោកស្រី យូន ចាន់អន ប្រធានគណៈកម្មការលទ្ធកម្មឃុំសំបួរ ស្រុកក្រឡាញ់ បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំសំបួរ បានដាក់ដេញថ្លៃគម្រោងចំនួន២៖ ទី១.គម្រោងសាងសង់ផ្លូវបេតុងអាមេ១ខ្សែ ប្រវែង ៨១ម៉ែត្រ ទទឹង៥ម៉ែត្រ កម្រាស់បេតុង០.១៥ម៉ែត្រ ចាក់ក្រួសស្មាផ្លូវសងខាង និងស្លាកសញ្ញាគម្រោងចំនួន១ ស្ថិតក្នុងតម្លៃប៉ាន់ស្មាន ៥២.៨២៦.៩១៤រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន ពៅ រ៉ាឌី ខនស្រ្តាក់ខិន ក្នុងតម្លៃ ៥១.៦៧៨.០០០រៀល។ ទី២.គម្រោងជួសជុលផ្លូវដីសក្រាលក្រួសធម្មជាតិចំនួន ១ខ្សែ ប្រវែង៣០០ម៉ែត្រ ទទឹង៥ម៉ែត្រ កម្រាសក្រួស០.១៥ម៉ែត្រ និងស្លាកសញ្ញាគម្រោងចំនួន១ ស្ថិតក្នុងតម្លៃប៉ាន់ស្មាន ៥៣.៣៧៤.៩១២រៀល ដោយមានក្រុមហ៊ុនចំនួន ៤បានដាក់ដំណើរ។ ជាលទ្ធផលបានទៅលើក្រុមហ៊ុន ពៅ រ៉ាឌី ខនស្រ្តាក់សិន ក្នុងតម្លៃ ៥១.០០០.០០០រៀល។
ជាមួយនឹងការទទួលបានសិទ្ធិនៃសាងសង់ និងជួសជុលនេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
ព័ត៌មានជាតិ ថ្មីៗ
អត្ថបទ និង រូបភាព៖ លោក ស៊ុ គីន
កែសម្រួល៖ លោក អ៊ុន ណារាជ្យ
