នាព្រឹកថ្ងៃទី០៤ ខែកញ្ញា ឆ្នាំ២០២៤នេះ អាជ្ញាធរខេត្តសៀមរាប បានរៀបចំវេទិកាពិគ្រោះយោបល់ស្តីពីការរៀបចំ និងកសាងកម្មវិធីវិនិយោគបីឆ្នាំរំកិល ២០២៥-២០២៧ របស់រដ្ឋបាលខេត្ត ក្រោមវត្តមាន លោកជំទាវ យូ សុភា សមាជិកក្រុមប្រឹក្សាខេត្ត និង លោក សុខ ថុល អភិបាលរងខេត្ត ដោយមានការចូលរួមពីលោកលោកស្រីតំណាងមន្ទីរអង្គភាពក្នុងខេត្ត អាជ្ញាធរក្រុងស្រុក កងកម្លាំងប្រដាប់អាវុធ និងអង្គការដៃគូជាច្រើននាក់។
លោក សុខ ថុល មានប្រសាសន៍ថា ការរៀបចំវេទិកាពិគ្រោះយោបល់នៅពេលនេះ គឺដើម្បីផ្តល់ឱកាសឱ្យបានពេញលេញ ជូនដល់សមាជិកសមាជិកានៃអង្គវេទិកាទាំងមូល បានធ្វើការពិនិត្យ និងមានភាពសុីគ្នានូវគម្រោងសកម្មភាពអាទិភាពដែលបានលើកឡើងដោយមន្ទីរអង្គភាព រដ្ឋបាលក្រុងស្រុក ទីចាត់ការអង្គភាពចំណុះសាលាខេត្ត អង្គការសង្គមស៊ីវិល អង្គការដៃគូអភិវឌ្ឍនានាក្នុងខេត្ត ក្នុងការស្នើសុំបញ្ចូលគម្រោង សកម្មភាពជាអាទិភាពទៅក្នុងកម្មវិធីវិនិយោគបីឆ្នាំរំកិលរបស់រដ្ឋបាលខេត្តសៀមរាប និងដើម្បីធ្វើការផ្សព្វផ្សាយទៅដល់គ្រប់អ្នកពាក់ព័ន្ធទាំងអស់ ក្នុងការកៀរគរនូវប្រភពមូលនិធិសម្រាប់គាំទ្រលើគម្រោងសកម្មភាពរបស់រដ្ឋបាលខេត្ត និងរដ្ឋបាលក្រុងស្រុក ដែលពុំទាន់មានប្រភពថវិកាសម្រាប់អនុវត្តនៅឡើយ។
លោកមានប្រសាសន៍ទៀតថា វេទិកានេះក៏ជាការប្រមូលផ្តុំនូវរាល់មតិយោបល់ និងបទពិសោធនៅតាមបណ្តាក្រុងស្រុក និងមន្ទីរអង្គភាព ក៏ដូចអង្គការដៃគូ ដែលបានលើកឡើងបង្កើតបានជាធាតុចូល ក្នុងការឆ្លុះបញ្ចាំងទៅលើការអនុវត្តនៅឆ្នាំខាងមុខ ឱ្យទទួលបានជោគជ័យ។ កម្មវិធីវិនិយោគបីឆ្នាំរំកិល និងរួមចំណែកយ៉ាងសំខាន់ក្នុងការអនុវត្តនូវគោលនយោបាយកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាលកម្ពុជា ហើយគោលនយោបាយនេះ គឺជាមុំមួយដែលបានកំណត់នៅក្នុងយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា ហើយគោលបំណងដ៏ចម្បងនៃគោលនយោបាយនេះ គឺតម្រូវឱ្យមានការឆ្លើយតបទៅនឹងតម្រូវការជាក់ស្តែងរបស់បងប្អូនប្រជាពលរដ្ឋនៅមូលដ្ឋាន ការបង្ខិតសេវាឱ្យចូលកៀកទៅជិតប្រជាពលរដ្ឋ និងចូលរួមលើកកម្ពស់កម្រិតជីវភាពរស់នៅរបស់ប្រជាពលរដ្ឋ សំដៅកាត់បន្ថយភាពក្រីក្រសម្រាប់ប្រទេសយើង។
លោកអភិបាលរងខេត្ត បានជំរុញឱ្យអង្គវេទិកាព្យាយាមត្រង់ត្រាប់ស្ដាប់ និងកត់ត្រាព័ត៌មានសំខាន់ៗ ពិសេសពាក់ព័ន្ធទៅនឹងឈ្មោះមន្ទីរអង្គភាព ដៃគូអភិវឌ្ឍន៍ អង្គការសង្គមស៊ីវិល និងអ្នកពាក់ព័ន្ធនានា ដើម្បីអនុវត្តន៍គម្រោងក្នុងដែនដីរបស់ខ្លួន ព្រមទាំងឈ្មោះគម្រោងទីតាំងគម្រោង ដែលត្រូវអនុវត្តន៍ក្នុងដែនដីរបស់ខ្លួនប្រកបដោយតម្លាភាព។ លោកក៏សង្ឃឹមថា អង្គវេទិកានឹងឈានទៅដល់ការសម្របសម្រួលគ្នា ដើម្បីឱ្យការវិនិយោគ ការអភិវឌ្ឍនៅមូលដ្ឋានប្រព្រឹត្តទៅដោយរលូនដោយសង្គតិភាព និងមានប្រសិទ្ធភាព៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
