កាលពីព្រឹកថ្ងៃទី២៥ ខែមីនា ឆ្នាំ២០២១ ឯកឧត្តមបណ្ឌិត ស៊ាន បូរ៉ាត រដ្ឋលេខាធិការក្រសួងអប់រំ យុវជននិងកីឡា អនុប្រធានអង្គភាពប្រឆាំងអំពើពុករលួយ និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានស្រុកស្រីស្នំ ខេត្តសៀមរាប បាននាំយកគ្រឿងឧបភោគបរិភោគ និង សម្ភារមួយចំនួន រួមមាន ៖ អង្ករចំនួន០២តោន , ទឹកត្រីកំពតចំនួន២២០យួរ ដែលក្នុង១យួរមាន៦ដប , មីម៉ាម៉ាចំនួន២០០កេស , ម៉ាស់១កេស ស្មើនឹង៣.០០០ម៉ាស់និងអាល់កុល ចំនួន១កាដុង ចំណុះ៣០លីត្រ ជូនរដ្ឋបាលស្រុកស្រីស្នំ ដើម្បីយកចែកជូនដល់បងប្អូនពលករ មកពីប្រទេសថៃ និងមកពីបណ្តាខេត្តមួយចំនួនក្នុងប្រទេស ដែលកំពុងធ្វើចត្តាឡីស័ក នៅតាមមណ្ឌលនានាក្នុងស្រុកស្រីស្នំ ។
មានប្រសាសន៍ក្នុងឱកាសនោះ ឯកឧត្តម បណ្ឌិត ស៊ាន បូរ៉ាត បានបញ្ជាក់ថា អាស្រ័យដោយទីតាំងនៃការធ្វើចត្តាឡីស័កចំនួន៦មណ្ឌលក្នុងស្រុក នៅឆ្ងាញៗពីគ្នាពេកនោះ ដែលនាំឲ្យមានការលំបាកក្នុងការប្រគល់អំណោយជូនដល់ប្រជាពលរដ្ឋដែលកំពុងធ្វើចត្តាឡីស័ក ដូច្នេះអំណោយទាំងនេះ សូមជូនតាមរយ:រដ្ឋបាលស្រុក និងរដ្ឋបាលឃុំ ដើម្បីឱ្យយកទៅចែកជូនពួកគាត់ដោយផ្ទាល់ដៃបន្ត និង សូមឲ្យពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា , សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនិង ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប ដែលជានិច្ចកាលសម្ដេចទាំងពីរ តែងតែយកចិត្តទុកដាក់ និង គិតគូរពីសុខទុក្ខរបស់បងប្អូនប្រជាពលរដ្ឋយើងទាំងអស់ គ្រប់ពេលវេលា ។
ឯកឧត្តម ក៏បានណែនាំដល់ក្រុមការងារថ្នាក់ស្រុក និង ឃុំ ត្រូវពន្យល់បងប្អូនប្រជាពលរដ្ឋដែលកំពុងធ្វើចត្តាឡីស័ក នៅតាមមណ្ឌលនានាទាំង០៦នេះ ឲ្យពួកគាត់បានយល់ថា ការធ្វើចត្តាឡីស័កនេះ គឺមិនមែនជាការឃុំខ្លួនពួកគាត់នោះទេ គឺជាការឃាត់ទុកជាបណ្ដោះអាសន្នដើម្បីឲ្យបានដឹងប្រាកដថា ពួកគាត់មាន ឬមិនមានជំងឺកូវីដ-១៩នៅក្នុងខ្លួនគាត់ ដើម្បីចៀសវាង និង ទប់ស្កាត់បានទាន់ពេលវេលា នូវការឆ្លងរាលដាលជំងឺដ៏កាចសាហាវនេះ ចូលទៅក្នុងក្រុមគ្រួសាររបស់ពួកគាត់ និង សហគមន៍ពួកគាត់ដែលកំពុងរស់នៅ ជាពិសេសត្រូវពន្យល់ណែនាំពួកគាត់បន្ថែម នូវវិធានការរបស់ក្រសួងសុខាភិបាល និងរបស់រាជរដ្ឋាភិបាល គឺ៣ការពារនិង៣កុំ ខណៈបច្ចុប្បន្នជំងឺកូវីដ-១៩ កំពុងតែមានការឆ្លងរាតត្បាតយ៉ាងខ្លាំងទាំងនៅក្នុងប្រទេសកម្ពុជា និង នៅលើសកលលោក ។
ឯកឧត្តម បណ្ឌិត ស៊ាន បូរ៉ាត មានប្រសាសន៍បន្ថែមថា ប្រការសំខាន់នោះគឺ ត្រូវពន្យល់ និង ណែនាំពួកគាត់កុំរត់ចេញពីមណ្ឌល ដែលខ្លួនគាត់កំពុងធ្វើចត្តាឡីស័ក ព្រោះការរត់គេចចេញនេះ ជាអំពើខុសច្បាប់ ហើយពួកគាត់នឹងត្រូវមានទោសដោយចៀសមិនផុតនោះទេ គិតតាំងពីពិន័យជាប្រាក់រាប់លានរៀល រហូតដល់ជាក់គុកអស់រាប់ឆ្នាំផងដែរ ដូច្នេះប្រសិនបើពួកគាត់ប្រព្រឹត្តអំពើនេះមែននេះ នឹងធ្វើប៉ះពាល់កាន់ខ្លាំងថែមទៀតដល់ជីវភាពរស់នៅប្រចាំថ្ងៃរបស់ពួកគាត់ជាមិនខានឡើយ ។
គួររំលឹកថា បច្ចុប្បន្ននៅក្នុងស្រុកស្រីស្នំ មានមណ្ឌលចត្តាឡីស័ក ចំនួន០៩ កន្លែង ប៉ុន្តែនៅសល់តែចំនួន០៦កន្លែងប៉ុណ្ណោះ ដែលមានប្រជាពលរដ្ឋចំនួន ២៨០នាក់ កំពុងធ្វើចត្តាឡីស័ក រួមមាន ៖ ១. មណ្ឌលសាលាបឋមសិក្សាពង្រ មានប្រជាពលរដ្ឋ កំពុងធ្វើចត្តាឡីស័ក ចំនួន៥៣ នាក់ ក្នុងនោះស្រីចំនួន ២៥នាក់ , ២. មណ្ឌលអនុវិទ្យាល័យមោង មានប្រជាពលរដ្ឋ កំពុងធ្វើចត្តាឡីស័ក ចំនួន៤៩ នាក់ ក្នុងនោះស្រីចំនួន ២២នាក់ , ៣. មណ្ឌលសាលាបឋមសិក្សាប្រីយ៍ មានប្រជាពលរដ្ឋ កំពុងធ្វើចត្តាឡីស័ក ចំនួន៥៥ នាក់ ក្នុងនោះស្រីចំនួន ២៤នាក់ , ៤. មណ្ឌលសាលាបឋមសិក្សាភ្នំដី មានប្រជាពលរដ្ឋ កំពុងធ្វើចត្តាឡីស័ក ចំនួន៣៦ នាក់ ក្នុងនោះស្រីចំនួន ១១នាក់ , ៥. មណ្ឌលសាលាបឋមសិក្សាត្រុំ មានប្រជាពលរដ្ឋ កំពុងធ្វើចត្តាឡីស័ក ចំនួន៣៩ នាក់ ក្នុងនោះស្រីចំនួន១៤នាក់ និង ៦. មណ្ឌលអនុវិទ្យាល័យគោកថ្កូវ មានប្រជាពលរដ្ឋ កំពុងធ្វើចត្តាឡីស័ក ចំនួន៤៨នាក់ ក្នុងនោះស្រីចំនួន ២២នាក់ ៕
កែសម្រួលអត្ថបទ ៖ លោក លីវ សាន្ត
