នៅវេលាម៉ោង១១ និង៣០នាទីថ្ងៃទី២៣ ខែមីនា ឆ្នាំ២០២១ មានគ្រោះថ្នាក់ចរាចរមួយបានកើតឡើង បណ្ដាលឲ្យបុរសម្នាក់ស្លាប់ភ្លាមៗនៅនឹងកន្លែង នៅលើកំណាត់ផ្លូវជាតិលេខ៦ ជាប់ស្តុបចុងកៅស៊ូ ស្ថិតក្នុងសង្កាត់ស្លក្រាម ក្រុងសៀមរាបខេត្តសៀមរាប។
តាមសមត្ថកិច្ចនៅកន្លែងកើតហេតុបានឲ្យដឹងថា មានរថយន្តមួយគ្រឿងមិនស្គាល់ម៉ាក បានបើកស្របទិសគ្នាជាមួយម៉ូតូមួយគ្រឿងទៀតម៉ាក ហុងដាឌ្រីមពណ៌ខ្មៅស្លាកលេខសៀមរាប 1L.5811 ក្នុងទិសដៅពីកើតមកលិច លុះមកដល់ចំណុចកើតហេតុរថយន្តបុកចំពីក្រោយពេញទំហឹង បណ្តាលឲ្យអ្នកបើកម៉ូតូស្លាប់នៅនឹងកន្លែងកើតហេតុតែម្ដង។
ក្រោយកើតហេតុសមត្ថកិច្ចបានចុះធ្វើការពិនិត្យ និងវាស់វែង ប៉ុន្តែចំពោះជនរងគ្រោះសមត្ថកិច្ចនៅមិនទាន់ស្គាល់អត្តសញ្ញានៅឡើយទេ ដោយសារជនរងគ្រោះពុំមានអត្តសញ្ញាណប័ណ្ឌជាប់ខ្លួន ហើយទូរស័ព្ទជាប់លេខកូដសម្ងាត់ទើបសមត្ថកិច្ចមិនអាចបើកដើម្បីរកលេខទូរស័ព្ទ ហៅរកសាច់ញាតិបាន ដោយឡែករថយន្តបង្កមិនស្គាល់បានបើកគេចបាត់៕
អត្ថបទ និង រូបភាព៖ ខេង ឧត្តម
កែសម្រួល៖ អ៊ុន ណារាជ្យ
