ចាប់តាំងពីមានព្រឹត្តិការណ៍សហគមន៍២០កុម្ភៈ រហូតមកដល់ថ្ងៃទី២៣ ខែមីនា ឆ្នាំ២០២១នេះ មន្ត្រីសុខាភិបាលខេត្តសៀមរាប បានរកឃើញមនុស្ស៥នាក់ហើយ ដែលមានផ្ទុកមេរោគកូវីដ១៩។ នោះបើតាមការបញ្ជាក់ពីលោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប។
លោកវេជ្ជបណ្ឌិត ក្រុស សារ៉ាត់ បានបញ្ជាក់ទៀតថា អ្នកទាំង៥នាក់នោះ គឺស្ត្រីនៅស្រុកពួកដែលធ្វើដំណើរមកពីខេត្តព្រះសីហនុ បុរសនៅសង្កាត់គោកចក ធ្វើដំណើរមកពីខេត្កណ្តាល និងមនុស្ស៣នាក់ក្នុងគ្រួសារមួយដែលមកពីខេត្តកំពង់ស្ពឺ មានទីលំនៅក្នុងភូមិដកពោធិ សង្កាត់ស្លក្រាម ខេត្តសៀមរាប។ បុរសរូបទី៣ត្រូវបានរកឃើញមានវិជ្ជមានកូវីដ-១៩ នៅថ្ងៃទី២១ ខែមីនា ហើយមួយថ្ងៃបន្ទាប់ ប្រពន្ធ និងកូនប្រុសម្នាក់អាយុ១៣ឆ្នាំរបស់បុរសខាងលើ ក៏ត្រូវបានរកឃើញ មានវិជ្ជមានមេរោគកូវីដ១៩ ដែរ។
ជាមួយគ្នានោះដែរ លោកវេជ្ជបណ្ឌិត បានទទូចដល់ប្រជាពលរដ្ឋទាំងអស់ត្រូវបង្កើនការប្រុងប្រយ័ត្នឲ្យបានខ្ពស់ ជាពិសេសអនុវត្តឲ្យបានត្រឹមត្រូវនូវវិធានការរបស់ក្រសួងសុខាភិបាលគឺ៣កុំ និង៣ការពារ៕
អត្ថបទ និង រូបភាព៖ ជា ស្រស់
កែសម្រួល៖ អ៊ុន ណារាជ្យ
