នៅព្រឹកថ្ងៃទី០២ ខែមេសា ឆ្នាំ២០២១នេះ គ្រួសារក្រីក្រចំនួន៣៨គ្រួសារ មកពីបណ្តាភូមិចំនួន ១១ភូមិ ក្នុងឃុំចាន់ស ស្រុកសូទ្រនិគម បានទទួលអំណោយពីអង្គការទស្សនៈពិភពលោក តាមរយៈរដ្ឋបាលស្រុកសូទ្រនិគម ខេត្តសៀមរាប ដោយក្នុងមួយគ្រួសារទទួលបាន៖ អង្ករ៣០គីឡូក្រាម ,មីម៉ាម៉ា១កេស ,ត្រីខ១យួរ ,ប្រេងឆា២លីត្រ ,ទឹកត្រី១យួរ ,ទឹកស៊ីអីវ១យួរ ,ស្កស១គីឡូ ,អំបិល២គីឡូ ព្រមទាំងបានចែកកង់ចំនួន៤៤គ្រឿងដល់សិស្សក្រីក្រផងដែរ។
ក្នុងឱកាសនោះដែរ លោក ម៉ក់ ប្រុស អភិបាលស្រុកសូទ្រនិគម បានថ្លែងអំណរគុណយ៉ាងជ្រាលជ្រៅ ចំពោះអង្គការទស្សនៈពិភពលោកដែលបានយកអំណោយទាំងនេះចែកជូនប្រជាពលរដ្ឋដែលជាគ្រួសារក្រីក្រដែលរស់នៅក្នុងឃុំចាន់ស ស្រុកសូទ្រនិគម ខេត្តសៀមរាបក្នុងឱកាសនេះ ដើម្បីជួយសំរួលដល់ជីវភាពរស់នៅប្រចាំថ្ងៃរបស់ពួកគាត់។
ជាមួយគ្នានោះលោកអភិបាលស្រុក ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវចូលរួមទប់ស្កាត់ការរីករាលដាលនៃជំងឺកូវីដ-១៩ហើយបើមានករណីសង្ស័យ សូមរាយការបន្ទាន់ជូនអាជ្ញាធរមានសមត្ថកិច្ច ឬខលទៅលេខ១១៥ ដើម្បីមានវិធានការ។ ជាពិសេសត្រូវចូលរួមអនុវត្តឱ្យបានខ្ជាប់ខ្ចួននូវវិធានការសុខាភិបាល ពិសេសប្រសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដោយចូលរួមកុំបីខាននូវវិធានការ ៣ការពារ និង៣កុំ៕
