បើតាមសារព័ត៌មាន Reuters នៅថ្ងៃសុក្រនេះបានឲ្យដឹងថា រថភ្លើងមួយខ្សែបានក្រឡាច់ធ្លាក់ចេញពីលើផ្លូវ ក្នុងរូងក្រោមដីមួយកន្លែង នៅភាគខាងកើតតៃវ៉ាន់ ដោយមនុស្សយ៉ាងហោច៣៦នាក់បានបាត់បង់ជីវិត និងរាប់សិបនាក់ទៀត រងរបួស។
អាជ្ញាធរតៃវ៉ាន់បានឲ្យដឹងថា រថភ្លើងខាងលើមានគោលដៅធ្វើដំណើរ ឆ្ពោះទៅកាន់ទីក្រុងថៃទុង (Taitung) ប៉ុន្តែបានធ្លាក់ចេញពីផ្លូវក្នុង រូងក្រោមដីមួយកន្លែងក្បែរទីក្រុងហ័រលៀន (Hualien) ដែលបណ្តាលឲ្យទូររថភ្លើងមួយចំនួន ខ្ទាតទៅបុកនឹងជញ្ជាំងរូងក្រោមដីនោះ។ មនុស្ស៣៦នាក់ ត្រូវគេជឿថាបានបាត់បង់ជីវិត និងរាប់សិបនាក់ទៀតរងរបួស ខណៈរថភ្លើងនោះដឹកមនុស្សសរុបប្រហែល៣៥០នាក់។
គួរបញ្ជាក់ថា ប្រតិបត្តិការជួយសង្រ្គោះកំពុងតែប្រព្រឹត្តទៅ ដោយមនុស្សចន្លោះ៨០-១០០នាក់ គឺត្រូវបានជួយសង្រ្គោះបាន។ កាលពីឆ្នាំ ២០១៨ មនុស្សសរុប១៨នាក់បានស្លាប់ និង១៧៥នាក់បានរងរបួស នៅពេលរថភ្លើងមួយខ្សែបានក្រឡាច់ចេញពីផ្លូវ នៅភាគឦសាននៃកោះតៃវ៉ាន់ ដែលត្រូវចាត់ទុកជា គ្រោះថ្នាក់រថភ្លើងអាក្រក់បំផុតក្នុងរយៈពេល ០៣ទសវត្សរ៍ចុងក្រោយ សម្រាប់ដែនដីកោះនេះ៕
