មន្ត្រីបសុពេទ្យ នៃមន្ទីរកសិកម្មខេត្តសៀមរាប បានចុះទៅបិទហាងលក់សាច់ពិសេស( សាច់សុនខ) មួយកន្លែងនៅក្បែរវត្តពោធិ៍ពីរដើមក្នុងក្រុងសៀមរាប ខេត្តសៀមរាប ដែលតែងតែបើកប្រកបរបរលក់សាច់សុនខនេះ អស់រយ:ពេលជាង១០ឆ្នាំមកហើយ ការចុះបិទទីតាំងនេះ ម្ចាស់ហាងឈ្មោះ ជី សុជាតិ គឺជាលើកទី២ហើយ ដោយលើកទី១ មន្ត្រីជំនាញបសុពេទ្យសត្វបានធ្វើកិច្ចសន្យាឲ្យបិទម្តង នឹងទុកឱកាសផ្លាស់ប្តូរមុខរបររកស៊ីផ្សេងទៀតទៅវិញ។ ប៉ុន្តែមកដល់ពេលថ្មីៗនេះ ម្ចាស់ហាងនៅតែមិនព្រមធ្វើតាមកិច្ចសន្យាហើយក៏មិនទាន់បានប្តូរមុខរបរដែរ ទើបនៅរសៀលថ្ងៃទី០២ ខែមេសា ឆ្នាំ២០២១ មន្ត្រីជំនាញបសុពេទ្យសត្វខេត្តបានសម្រេចចុះបិទតែម្តង បើម្ចាស់ហាងមិនអនុវត្តទៅតាមនិតិវិធីទេ អាចប្រឈមមុខនឹងច្បាប់ជាធរមាន។
មន្ទីរកសិកម្ម រុក្ខាប្រមាញ់ និងនេសាទខេត្ត: ចំពោះបញ្ហាពាក់ព័ន្ធនឹងករណីនេះ ដើម្បីអនុវត្តតាមគោលការណ៍ច្បាប់ និងលិខិតបទដ្ឋានគតិយុត្ត ក៏ដូចជាវិធានការកន្លងមករដ្ឋបាលខេត្តស្នើឲ្យ លោក ប្រធានមន្ទីរកសិកម្មខេត្ត សហការជាមួយរដ្ឋបាលក្រុង ស្រុក មន្ទីរ អង្គភាព អាជ្ញាធរមូលដ្ឋាន និងសមត្ថកិច្ចជំនាញពាក់ព័ន្ធ ដើម្បីបន្តចូលរួមអប់រំផ្សព្វផ្សាយ ណែនាំដល់អាជីវករ ដែលបាននឹងកំពុងប្រកបអាជីវកម្មសត្វសុនខនៅតាមបណ្តាក្រុង-ស្រុក ក្នុងខេត្ត ឱ្យពួកគាត់ពិនិត្យលទ្ធភាពផ្លាស់ប្តូរមុខរបរផ្សេងជំនួសវិញ ក្នុងរយ:ពេល០៣ខែ។ ប៉ុន្តែក្នុងករណីអាជីវករនៅតែបន្តធ្វើអាជីវកម្មប្រភេទនេះ មន្ទីរត្រូវពិនិត្យចាត់ចែងអនុវត្តតាមនីតិវិធីច្បាប់ និងលិខិតបទដ្ឋានគតិយុត្តជាធរមាន។
លោក ព្រំ វិច ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្មខេត្ត បានបង្ហាញថា កាលពីថ្ងៃទី២១ ខែកុម្ភ: ឆ្នាំ២០២១កន្លងទៅនោះ ដោយទទួលបានការណែនាំពីលោក ទា គឹមសុទ្ធ ប្រធានមន្ទីរកសិកម្ម ខេត្តសៀមរាប មន្ត្រីបសុពេទ្យខេត្ត បានចុះអនុវត្តផ្ទាល់ ដោយសហការជាមួយស្នងការនគរបាលខេត្ត (ការិយាល័យចរាចរណ៏ផ្លូវគោក) បានឃាត់ចាប់សត្វសុនខ (ឆ្កែ) ចំនួន ៦១ក្បាល ដឹកតាមរថយន្តម៉ាកសាំយ៉ុង ពាក់ស្លាកលេខ ២S-២១៥៨ ចេញពីខេត្តបន្ទាយមានជ័យឆ្ពោះទៅខេត្តកំពង់ចាម ។ លោក បន្តថា សត្វសុនខទាំង ៦១ក្បាលនេះ មន្រ្តីជំនាញបសុពេទ្យបានយកមករក្សាទុកធ្វើចត្តាឡីស័ក តាមលក្ខណ:បច្ចេកទេស ដោយសហការជាមួយអង្គការ ( Four Paws ) នៅស្ថានីយស្រាវជ្រាវសុខភាពសត្វ និងផលិកម្មសត្វទឹកវិលផងដែរ។ បើតាមការលើកឡើងពីលោកស្រី ឯក សុធា តំណាងអង្គការ (Four Paws) បានឲ្យដឹងថា ការចំណាយក្នុងការថែទាំសុខភាព និងជម្រកសត្វសុនខ (ឆ្កែ) ទាំង ៦១ក្បាល ក្នុងរយ:ពេល ២ខែនេះ គឺយើងចំណាយអស់ប្រមាណ ២០,០០០ដុល្លាអាមេរិក។
គួររំលឹកថា ជុំវិញករណីខាងលើកន្លងមកមានអ្នកសារព័ត៌មានមួយចំនួនបានចុះផ្សាយតាមបណ្តាញសង្គម ក៏ដូចជាគេហទំព័រនានាថា ការបើកហាងអាជីវកម្មលក់សាច់សុនខដោយខុសច្បាប់ទាំងនេះបានដោយរលូននោះ ក៏ព្រោះតែមន្ត្រីបសុពេទ្យសត្វបានឃុបឃាត់គ្នាស៊ីសំណូកសូកប៉ាន់ជាមួយម្ចាស់ហាងហើយ បានជាមិនអនុវត្តទៅតាមការស្នើរបស់រដ្ឋបាលខេត្ត។ ប៉ុន្តែ កន្លងមកលោក ប្រធានមន្ទីរកសិកម្មខេត្ត សហការជាមួយរដ្ឋបាលក្រុង ស្រុក មន្ទីរ អង្គភាព អាជ្ញាធរមូលដ្ឋាន និងសមត្ថកិច្ចជំនាញពាក់ព័ន្ធ បានចុះអប់រំផ្សព្វផ្សាយ ណែនាំដល់អាជីវករ ដែលបាននឹងកំពុងប្រកបអាជីវកម្មសត្វសុនខ នៅតាមបណ្តាក្រុង-ស្រុក ក្នុងខេត្តសៀមរាប យ៉ាងទូលំទូលាយរួចហើយ ដោយព្រមានចាត់វិធានការតាមច្បាប់ទៀតផង បើមិនអនុវត្តទេ។ លោក ជី សុជាតិ ម្ចាស់ហាង នៅក្បែរវត្តពោធិ៍ពីរដើមនោះ លើកឡើងថា ចំពោះការចោទប្រកាន់ពាក់ព័ន្ធស៊ីសំណូកសូកប៉ាន់នោះ គឺវាមិនពិតឡើយ បើចង់ដឹងច្បាស់អាចមកជួបខ្ញុំបាន ៕
អត្ថបទនិងរូបភាព: លោក ស៊ាន សុផាត កែសម្រួលដោយ លីវ សុខុន!!! ។
