មន្ត្រីជំនាញ នៃមន្ទីរកសិកម្មមរុក្ខាប្រម៉ាញ់ និងនេសាទខេត្ត ចុះពិនិត្យមើលសហគមន៍ទេសចរណ៍វប្បធម៌ធម្មជាតិ បឹងពារាំង និងសហគមន៍នេសាទចុងឃ្នៀស តាមការសម្រេចរបស់រដ្ឋបាលខេត្តសៀមរាប ក្នុងការជីកស្តារបឹងពារាំង ដើម្បីរក្សាទឹកទុកសម្រាប់ជម្រកត្រីមេពូជ និងសត្វស្លាបគ្រប់ប្រភេទ កាលពីព្រឹកថ្ងៃទី០២ ខែមេសា ឆ្នាំ២០២១នេះ ។ យោងតាមសេចក្តីជូនដំណឹងរបស់សាលាខេត្តសៀមរាបលេខ ៤២៣.សជណ/២១ ចុះថ្ងៃទី៣១ ខែមីនា ឆ្នាំ២០២១ បានបង្ហាញថា សហគមន៍ទេសចរណ៍វប្បធម៌ធម្មជាតិ បឹងពារាំង និងសហគមន៍នេសាទចុងឃ្នៀស ដែលជាកន្លែងអភិរក្សពូជត្រី និងទីជម្រកសត្វស្លាបកម្រជាច្រើនប្រភេទ ដោយសារមានបញ្ហាទឹកគោករាក់ជារៀងរាល់ឆ្នាំមកនោះ ធ្វើឲ្យប្រឈមនឹងការបាត់បងត្រីពូជ និងទីជម្រកសត្វស្លាបទៅអនាគត។ រដ្ឋបាលខេត្តសៀមរាប បានរៀបចំជីក បូម ស្តារ នឹងពារាំងនេះឡើងវិញ ដើម្បីរក្សាទឹកទុកសម្រាប់អភិរក្សត្រីពូជ និងជម្រកសត្វស្លាបកម្រជាច្រើន ដែលរស់នៅក្នុងទីតាំងបឹងពារាំងនេះ ដោយមានការអនុញ្ញាតពីក្រសួងកសិកម្ម រុក្ខាប្រម៉ាញ់ និងនេសាទ និងរដ្ឋបាលខេត្តសៀមរាប ដែលនឹងចាប់ផ្តើមអនុវត្តគម្រោង ជីក បូម ស្តារ តាមផែនការ ចាប់ពីថ្ងៃជូនដំណឹងរហូតដល់ថ្ងៃបញ្ចប់គម្រោង។
លោក គង់ មង្គល ប្រធានសហគមន៍បឹងពារាំង បានឲ្យដឹងថា ជាការពិតណាស់សហគមន៍ទាំងពីរ និងធ្វើការជីក បូម ស្តារ បឹងពារាំងចាប់ពីថ្ងៃទី០១ ខែមេសានេះតទៅ ។ បឹងពារាំងនេះ គឺវាស្ថិតក្នុងសង្កាត់ចុងឃ្នៀស និងសង្កាត់ជ្រាវផង។ គឹសង្កាត់ចុងឃ្នៀស យើងអាចបូមយកល្បាប់ភក់ចេញ។ ដោយឡែក ចំពោះសង្កាត់ជ្រាវយើងអាចជីកស្តារទាំងស្រុង ព្រោះមួយផ្នែកធំ ទឹកបានរីងស្ងួតអស់ទៅហើយ។ ក្នុងការជីកស្តារនេះ បើយើងជីកបានហើយ ទឹកនឹងចេញមកវិញ នៅនោះយើងរក្សាទឹកជាធម្មតា តែបើមិនមានទឹកចេញទេ គឺយើងត្រូវបូមទឹកពីទន្លេសាបបញ្ចូលក្នុងបឹងវិញ ធ្វើបែបនេះ ទើបយើងអាចរក្សាត្រីមេពូជ និងសត្វស្លាប់គ្រប់ប្រភេទបាន។
លោក បញ្ជាក់ទៀតថា បឹងពារាំង គឺជាតំបន់ទេសចរណ៍ដ៏ទាក់ទាញបំផុត តាមរយ:ទេសភាពព្រៃលិចទឹក ហ្វូងត្រីចម្រុះ ពិសេសជាងនេះទៅទៀតនោះ គឺសត្វស្លាបទឹកគ្រប់ប្រភេទ ដែលវាអាចហែលទឹក និងហោះហើរប្រឡែងគ្នាលេង និងរស់នៅយ៉ាងសុខសាន្ត។ បឹងនេះមានចម្ងាយពីទីប្រជុំជន នៃសង្កាត់ជ្រាវប្រមាណជាង៦គីឡូម៉ែត្រ មានទំហំសរុប ២,៦០៧.៧១ហិកតា។ ប៉ុន្តែនៅរដូវប្រាំងផ្ទៃទឹកបង្រួមនៅសល់ត្រឹមតែជាង ២២៣ហិកតាប៉ុណ្ណោះ។ តែក្នុងទំហ៊ំខាងលើនេះ ទឹកក៏ផ្តើមស្រកយ៉ាងឆាប់រហ័សដែរ។ លោកថា បើយើងមិនមានវិធានការសង្គ្រោះទាន់ពេលវេលាទេ ទាំងត្រី និងសត្វ អាចនឹងបាត់បង់ក្នុងរដូវប្រាំងនេះតែម្តង។ ជាចុងក្រោយ លោក ប្រធានសហគមន៍ ក៏បានបង្ហាញនូវការដឹងគុណដល់រដ្ឋមន្ត្រីក្រសួងកសិកម្ម ជាពិសេសអភិបាលខេត្តសៀមរាប ដែលបានគិតគូអំពីធនធានជលផល និងយកចិត្តទុកដាក់ក្នុងការអភិរក្សធនធានធម្មជាតិនេះ ៕ អត្ថបទ និងរូបភាព: លោកស៊ាន សុផាត កែសម្រួលដោយ លីវ សុខុន ។
