នៅរសៀលថ្ងៃទី០២ ខែមេសាឆ្នាំ២០២១នេះ លោក ង៉ាន់ ភិរុណ អភិបាលរង នៃគណៈអភិបាលខេត្ត បានដឹកនាំក្រុមការងារ ចុះត្រួតពិនិត្យមើលសកម្មភាពការចាក់វ៉ាក់សាំងបង្ការជម្ងឺកូវីដ១៩ (Sinovac) នៅស្រុកអង្គរធំ ស្រុកបន្ទាយស្រី និង ស្រុកវ៉ារិន ខេត្តសៀមរាប។
ឯកឧត្តម ង៉ាន់ ភិរុណ បានបញ្ជាក់ថា យុទ្ធនាចាក់វ៉ាក់សាំងការពារជម្ងឺកូវីដ១៩ ប្រភេទ Sinovac បានចាក់ជូនដល់មន្ត្រីរាជការអាជ្ញាធរមូលដ្ឋាន ក្នុងនោះមាននៅមណ្ឌលសុខភាពអង្គរធំ ស្រុកអង្គរធំ មណ្ឌលសុខភាពបន្ទាយស្រី ស្រុកបន្ទាយស្រី និងមណ្ឌលសុខភាពស្រែណូយ ស្រុកវ៉ារិន ដែលមានក្រុមគ្រូពេទ្យចាក់វ៉ាក់សាំងថ្នាក់ខេត្តនិងស្រុក។ ទាំងនេះគឺជាការយកចិត្តទុកដាក់ដ៏ធំធេង ចំពោះសុខភាពអាយុជីវិតរបស់ប្រជាពលរដ្ឋ ទូទាំងប្រទេសកម្ពុជាក៏ដូចជាប្រជាពលរដ្ឋ មន្ត្រីរាជការ មន្ទីរអង្គភាព អាជ្ញាធរ ក្រុង/ស្រុក ឃុំ/សង្កាត់ទាំងអស់របស់រាជរដ្ឋាភិបាល ដែលមានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានទិញខ្លះ និងជំនួយខ្លះនូវវ៉ាក់សាំងការពារជម្ងឺកូវីដ-១៩ ដើម្បីចាក់ជូនដល់បងប្អូនទាំងអស់ ក្នុងការបង្ការទប់ស្កាត់កុំឲ្យមានការឆ្លងរីករាលដាលនៃជម្ងឺកូវីដ១៩ មកខ្លួនយើងក៏ដូចជានៅក្នុងសហគមន៍នោះ។
ឯកឧត្តម ក៏បានបន្ថែមទៀតថា ចំពោះការចាក់វ៉ាក់សាំងលើកនេះ គឺរៀបចំជាបញ្ជីឈ្មោះ មានការហៅឈ្មោះចែកម៉ោង ពេលវេលាបានយ៉ាងត្រឹមត្រូវដោយមិនឲ្យមានការកកស្ទះនោះទេ។ ទោះបីជាយើងគ្រាប់គ្នាបានចាក់នៅវ៉ាក់សាំងការពារជម្ងឺកូវីដ១៩ ក៏ពិតមែន ក៏ប៉ុន្តែយើងត្រូវតែបន្តអនុវត្ត តាមប្រសាសន៍របស់រាជរដ្ឋាភិបាល ក៏ដូចជាក្រសួងសុខាភិបាលដោយត្រូវអនុវត្តតាម ៣កុំ និង ៣ការពារ ឲ្យបានខ្ជាប់ខ្ជួន ដោយមិនត្រូវភ្លេចខ្លួននោះទេ ។
បើតាមលោក ឡុង រដ្ឋារក្ស អភិបាលស្រុកអង្គរធំ បានបញ្ជាក់ថា ក្នុងយុទ្ធនាការចាក់វ៉ាក់សាំងបង្ការជម្ងឺកូវីដ១៩ (Sinovac) ដែលមានមន្ត្រីរាជការ អាជ្ញាធរមូលដ្ឋាន និងលោកគ្រូអ្នកគ្រូ គឺដំណើរការបានទៅដោយរលូន ដោយមានអ្នកចុះឈ្មោះមានចំនួន៤៦០នាក់ នៅស្រុកបន្ទាយស្រី មាន១ពាន់៥០នាក់ និងស្រុកវ៉ារិនចំនួន៩១៥នាក់។
គួរជម្រាបផងដែរថា វ៉ាក់សាំងស៊ីណូវ៉ាក់នេះ ចាក់បានចាប់ពីមនុស្សអាយុ១៨ឆ្នាំឡើងទៅ ហើយយុទ្ធនាការចាក់ថ្នាំបង្ការជម្ងឺកូវីដ១៩ប្រភេទ Sinovac ដែលបានប្រព្រឹត្តិទៅក្នុងក្របខ័ណ្ឌទូទាំងប្រទេស៕
អត្ថបទ និង រូបភាព៖ ទ្រា ពន្លឺ
