នៅយប់ថ្ងៃទី០៣ ខែមេសា ឆ្នាំ២០២១ រដ្ឋបាលខេត្តសៀមរាប បានអនុញ្ញាត ឲ្យអ្នកពាក់ព័ន្ធនឹង មន្ទីរសម្រាកព្យាបាល ៧៧៧ សៀមរាប, មន្ទីពហុព្យាបាលសុខភាព, បន្ទប់ពិគ្រោះព្យាបាលជំងឺ ទូច កូ និងបន្ទប់ថែទាំវេជ្ជសាស្ត្រ ចាវ ចាន់ ក្នុងក្រុងសៀមរាប ត្រឡប់ទៅលំនៅឋានវិញ ដោយពុំមានករណីសង្ស័យ ឬវិជ្ជមានកូវីដ-១៩ ប៉ុន្តែត្រូវបន្តធ្វើចត្តាឡីស័ក ១៤ថ្ងៃទៀត នៅគេហដ្ឋានរៀងៗខ្លួន។
តាងនាមឯកឧត្តម ទៀ សីហា អភិបាលខេត្តសៀមរាប លោកនួន ពុទ្ធារ៉ា អភិបាលក្រុងសៀមរាប និងលោក ស៊ុនចំណាន នាយកទីចាត់ការរដ្ឋបាលខេត្តបាននាំយកសេចក្តីជូនដំណឹង ស្ដីពីការអនុញ្ញាតនេះ ទៅប្រគល់ជូនម្ចាស់ ទីតាំងព្យាបាល និងថែទាំសុខភាពចំនួន ៤កន្លែងនោះ។
លោកនួន ពុទ្ធារ៉ា អភិបាលក្រុងសៀមរាបបានបង្ហាញថា៖ យោងតាម លទ្ធផលធ្វើតេស្ត ចំនួន៤ដង បញ្ជាក់ថាអ្នកពាក់ព័ន្ធនឹងទីតាំងទាំង៤នេះ ពុំមានវិជ្ជមានជំងឺកូវីដ-១៩ឡើយ។ ទន្ទឹមនោះ លោកបានណែនាំដល់គ្រប់អ្នកពាក់ព័ន្ធទាំងអស់ ត្រូវបន្តធ្វើចត្តាឡីស័កដាច់ដោយឡែក រយៈពេល១៤ថ្ងៃ ទៀត នៅតាមលំនៅឋានរៀងៗខ្លួន។
គួរជម្រាបថា៖ មន្ទីរសម្រាកព្យាបាល ៧៧៧ សៀមរាប ស្ថិតនៅភូមិសាលាកន្សែង មន្ទីរពហុព្យាបាលសុខភាព ស្ថិតនៅភូមិតាភុល សង្កាត់ស្វាយដង្គំ បន្ទប់ពិគ្រោះព្យាបាលជំងឺ ទូច កូ ស្ថិតនៅភូមិទក្សិណត្បូង និង បន្ទប់ថែទាំវេជ្ជសាស្ត្រ ចាវ ចាន់ ស្ថិតនៅភូមិគោកតាចាន់ សង្កាត់គោកចក ក្រុងសៀមរាប ខេត្តសៀមរាប។
គួរបញ្ជាក់ដែរថា៖ នៅពេលដំណាលគ្នានេះ រដ្ឋបាលខេត្តក៏បានចេញ សេចក្តីជូនដំណឹងបើកការធ្វើដំណើរចេញ-ចូលឡើងវិញ នៅភូមិគោកត្នោត សង្កាត់គោកចក ក្រុងសៀមរាប ខេត្តសៀមរាប បន្ទាប់ពីភូមិសាស្ត្រនេះ បានបិទការធ្វើដំណើរចេញចូល កាលពីថ្ងៃទី២០ ខែមីនា ឆ្នាំ២០២១ ក្រោយពីរកឃើញករណីវិជ្ជមានជំងឺកូវីដ-១៩ លើបុរសម្នាក់រស់នៅក្នុងភូមិនេះ៕
អត្ថបទ និងរូបភាព: លោក យូ វង្ស និងលោក ងិន គឹមឡេង
កែសម្រួលដោ លោក សេង ផល្លី ។
