រថយន្តទំនើបសល់ពីសម័យមុនៗដែលមានអាយុចាប់ពី៣៥ឆ្នាំ ដល់៦០ឆ្នាំវាមិនត្រឹមតែមិនត្រូវបានគេបំភ្លេចចោលនោះទេ ក៏ប៉ុន្តែវាត្រូវបានក្លាយជារថយន្តដ៏មានចំណាប់អារម្មណ៍ទៀតផងក្នុងវិស័យទេសចរណ៍។
បើតាមលោក រស់ សាយ នាយកគ្រប់គ្រងទូទៅរបស់សណ្ឋាគារ វីរតន៏ លំដាប់អន្តរជាតិ នៅក្រុងសៀមរាប នៅព្រឹកថ្ងៃទី០៥ ខែមេសា ឆ្នាំ២០២១ បានឲ្យដឹងថា នៅក្នុងសណ្ឋាគារនេះមានវត្តមានរថយន្តទំនើបសល់ពីសម័យបូរាណចំនួន៧គ្រឿង។ នៅក្នុងឆ្នាំ២០១៥ សណ្ឋាគារឯកជនមួយនេះ បង្កើតឡើងរួមគ្នាដោយវិនិយោគិនខ្មែរនិងបារាំង ដោយមានរែរថយន្តបូរាណតែមួយគ្រឿងប៉ុណ្ណោះ ដាក់តាំងបង្ហាញភ្ញៀវដោយក្តីស្រឡាញ់ និងដោយបេះដូងអភិរក្ស បន្ទាប់មកត្រូវបានដាក់ឲ្យបំរើជាសេវាកម្មដឹកជញ្ជូនភ្ញៀវ (សណ្ខាគារ-ព្រលានយន្តហោះ) ដោយបានពង្រីកសេវាកម្ម និងចំនួនរថយន្តជាបន្តបន្ទាប់ឆ្លើយតបតាមតម្រូវការរបស់ភ្ញៀវដោយមកទល់នឹងពេលនេះ មានរថយន្តរហូត៧គ្រឿងហើយមានសកម្មភាពយ៉ាងមមាញឹកជាប្រចាំថ្ងៃកាលមុនព្រឹត្តិការណ៍កូវីដ-១៩។
លោក រស់ សាយ បានឲ្យដឹងដែរថា ជាង១ឆ្នាំនៃការផ្ទុះឡើងវិបត្តិកូវីដ-១៩ នៅទូទាំងពិភពលោក និងធ្វើឲ្យប៉ះពាល់មុនគេ ខ្លាំងជាងគេទៅលើវិស័យទេសចរណ៍នោះ មកទល់ពេលនេះសណ្ឋាគារ វីរតន៏ មិនបានបិទទ្វារនៅឡើយនោះទេ។ បើទោះជាស្ថិតក្នុងស្ថានភាពដ៏លំបាកយ៉ាងណាក៏ដោយ បុគ្គលិកកម្មកររបស់សណ្ឋាគារមួយនេះ ក្នុងចំនួនប្រមាណជា៥០% នៃចំនួនសរុបជាង១០០នាក់នៅតែបានបន្តការងាររបស់ខ្លួន។ សេវាកម្មនានានៅតែបន្តរង់ចាំទទួលភ្ញៀវជានិច្ច រួមទាំងសេវាកម្មជិះកំសាន្តតាមរថយន្តទំនើបបូរាណ ក្នុងតំបន់អង្គរនេះផងដែរដោយមិនគិតថ្លៃ បើសិនជាអតិថិជន កក់ ឬជួយបន្ទប់ ចាប់ពី២យប់ ឡើងទៅ។
លោកបន្ថែមថា អ្វីដែល វីរតន៏ តស៊ូបើកទ្វាសណ្ឋាគារ ក្នុងកាលៈទេសៈដ៏លំបាកនេះ គឺអាស្រ័យដោយមានការលើកទឹកចិត្តពីរាជរដ្ឋាភិបាល ដោយគោលនយោបាយអនុគ្រោះពន្ធដាសម្រាប់វិស័យទេសចរណ៍នោះ៕
អត្ថបទ និង រូពភាព៖ ងឹន គឹមឡេង
