អាជ្ញាធរខេត្ដសៀមរាប បានអនុញ្ញាតអោយបើកដំណើរការឡើងវិញ នូវផ្សារគោគធ្លក និងផ្ទះអាជីវកម្មដ្ឋានចំនួន១៥កន្លែង នៅក្នុងក្រុងសៀមរាប និងស្រុកប្រាសាទបាគង ខេត្ដសៀមរាប បន្ទាប់ពីរកមិនឃើញអ្នកដែលបានជាប់ពាក់ព័ន្ធទីតាំងទាំងនោះ មានផ្ទុកជំងឺកូវីដ១៩។
ការបិទទីតាំងទាំងនេះ ក្រោយពេលលោក ហ៊ឹម វណ្ណៈ មុខរបរជាអ្នកបើកបររថយន្តឈ្នួល ដែល វិជ្ជមានជំងឺកូវីដ-១៩ កាលពីថ្ងៃទី២៤ ខែមីនា ឆ្នាំ២០២១ និងមានការឆ្លងបន្តទៅអ្នកពាក់ព័ន្ធចំនួន ៤នាក់ទៀត ក្នុងនោះក៏មានជាប់ពាក់ព័ន្ធជាមួយពលរដ្ឋនៅស្រុកប្រាសាទបាគងផងដែរ។
យោងតាមសេចក្ដីជូនដំណឹងរបស់រដ្ឋបាលខេត្ដសៀមរាប បានបង្ហាញថា គណៈបញ្ជាការ ឯកភាព
រដ្ឋបាលខេត្ត សម្រេចបើកការចេញ-ចូល ឬដំណើរការឡើងវិញនូវទីតាំងចំនួន១៥ទីតាំង ក្នុងនោះស្រុកប្រាសាទបាគងមាន៣ផ្ទះ និងក្រុងសៀមរាបមាន១២ទីតាំង ដែលមាន៨ផ្ទះ និងអាជីវកម្មដ្ឋាន៤ផ្ទះសំណាក់វិមានស្ពាននាគ ហាងលក់គោដុត ហាងកាហ្វេលឹង្គ១០០០ និងផ្សារគោកធ្លក។
សេចក្ដីជូនដំណឹងដដែល បានបន្ដថា ការអោយបើកដំណើរការឡើងវិញនេះ ចាប់ពីថ្ងៃទី១១ ខែមេសា ឆ្នាំ២០២១នេះ។ប៉ុន្តែទីតាំងផ្ទះចំនួន៦ទៀត ត្រូវបន្តបិទឲ្យធ្វើចត្តាឡីស័កក្នុងផ្ទះ និងដាក់ឲ្យស្ថិតក្នុងការត្រួតពិនិត្យរបស់កងកម្លាំង រួមមាន ១-យានដ្ឋាន ឡាយ ជីវែង ២-ផ្ទះ លោក សាន ប៉ោលាង ៣-ផ្ទះ
លោក ខេង សុវណ្ណភក្តី ៤-ផ្ទះ លោក វិន ឡុន ៥-ផ្ទះ លោក ញ៉ុន កាព និង ៦-ផ្ទះ លោក វ៉ាត យ៉ត រហូតដល់មានការជូនដំណឹងនាពេលបន្ទាប់។រដ្ឋបាលខេត្តសៀមរាបជម្រាបជូនដល់ប្រជាពលរដ្ឋ និងសាធារណជន ដែលមានការពាក់ព័ន្ធនឹង លោក ហ៊ឹម វណ្ណៈ មុខរបរជាអ្នកបើកបររថយន្តឈ្នួល ដែល វិជ្ជមានជំងឺកូវីដ-១៩ កាលពីថ្ងៃទី២៤ ខែមីនា ឆ្នាំ២០២១ និងមានការឆ្លងបន្តទៅអ្នកពាក់ព័ន្ធចំនួន ៤នាក់ រដ្ឋបាលខេត្ត បានស្វែងរកអ្នកពាក់ព័ន្ធ និងបិទទីតាំងអាជីវកម្ម ផ្សារគោកធ្លក និងផ្ទះសរុបចំនួន២១ទីតាំង នៅក្នុងក្រុងសៀមរាប និងស្រុកប្រាសាទបាគង។
រដ្ឋបាលខេត្ត សូមអំពាវនាវដល់បងប្អូនប្រជាពលរដ្ឋ និងសាធារណជន មេត្តាយកចិត្តទុកដាក់ អនុវត្តនូវវិធានការរបស់ក្រសួងសុខាភិបាល និងអនុសាសន៍ដ៏ខ្ពង់ខ្ពស់របស់ សម្តេចតេជោ នាយក រដ្ឋមន្ត្រី នៃព្រះរាជាណាចក្រកម្ពុជា គឺ ៣ ការពារ (ត្រូវពាក់ម៉ាស់ ត្រូវលាងដៃជាមួយសាប៊ូ ឬជែល និងត្រូវរក្សាគម្លាតសង្គម ៣កុំ កុំចូលទៅកន្លែងបិទជិតគ្មានខ្យល់ចេញ-ចូល កុំទៅកន្លែងមាន មនុស្សច្រើនកុះករ និងកុំប៉ះពាល់គ្នា។សេចក្តីជូនដំណឹងនេះ បានស្នើរអោយស្នងការនគរបាលខេត្ត មេបញ្ជាការកងរាជអាវុធហត្ថខេត្ត រដ្ឋបាលក្រុងសៀមរាប រដ្ឋបាលស្រុកប្រាសាទបាគង ប្រធានមន្ទីរ -អង្គភាពពាក់ព័ន្ធ មេឃុំ -ចៅសង្កាត់ បងប្អូន ប្រជាពលរដ្ឋ និងសាធារណជន មេត្តាជ្រាប និងចូលរួមសហការអនុវត្តសេចក្តីជូនដំណឹងនេះដោយស្មារតី ទទួលខុសត្រូវខ្ពស់៕
អត្ថបទនិងរូបភាព ៖ លោក ឈិត សាវី
