អាជ្ញាធរខេត្ដសៀមរាប បានបិទចរាចរណ៍ការចេញ-ចូលជាបណ្តោះអាសន្ន ភូមិគោកតាចាន់ និងភូមិខៀន សង្កាត់គោកចក ក្រុងសៀមរាប ចាប់ពីថ្ងៃទី១១ ខែមេសា ឆ្នាំ២០២១ដើម្បីទប់ស្កាត់ការឆ្លងជំងឺកូវីដ១៩ ឆ្លងចូលសហគមន៍។
លោក នាក់ ណេរ៉ុន អភិបាលរងខេត្ដសៀមរាប មានប្រសាសន៍កាលពីរសៀលថ្ងៃទី១១ខែមេសាឆ្នាំ២០២១នេះថា ការបិទធ្វើចរាចរណ៍ចេញចូលភូមិ គោកតាចាន់ និងខ្វៀនស្ថិតនៅសង្កាត់គោកចកនេះ ក្រោយពេលស្ដ្រីម្នាក់ឈ្មោះ ចាប នី បានឆ្លងមេរោគកូវីដ១៩ មកពីខេត្ដស្វាយរៀង ។ស្ដ្រីឈ្មោះចាប នី ភេទស្រី អាយុ៤៦ឆ្នាំ បានរកឃើញមេរោគកូវីដ១៩ នៅថ្ងៃទី០៩ ខែមេសា ឆ្នាំ២០២១ រូបគាត់រស់នៅភូមិ គោកតាចាន់ សង្កាត់គោកចក ក្រុងសៀមរាប។លោកបានបន្ដថា គណៈបញ្ជាការឯកភាពរដ្ឋបាលខេត្តសៀមរាប សម្រេចបិទ ការចេញ-ចូលជាបណ្តោះអាសន្នភូមិគោកតាចាន់និងភូមិខៀន សង្កាត់គោកចក ក្រុងសៀមរាប ចាប់ពី ថ្ងៃទី១១ ខែមេសា ឆ្នាំ២០២១ នេះតទៅ ដើម្បីទប់ស្កាត់ក្នុងព្រឹត្តិការណ៍ ការឆ្លងរាលដាលជំងឺកូវីដ-១៩ ចូលក្នុងសហគមន៍២០កុម្ភៈ។លោកថា ចំពោះការបិទការចេញ-ចូលបណ្តោះអាសន្ននេះ នឹងដំណើរការ ឡើងវិញ ក្រោយស្ថានភាពការរីករាលដាលជំងឺកូវីដ១៩ មានសភាពធូស្រាល និងវិលមករកប្រក្រតីភាព ឡើងវិញ ដោយរដ្ឋបាលខេត្តនឹងជូនដំណឹងនាពេលក្រោយ។មួយគ្នានេះ ជាមួយគ្នានោះដែរ លោកបន្ថែមថា រដ្ឋបាលខេត្ដសៀមរាប ក៍បានបិទផ្សារភូមិភាគ ស្ថិតនៅខាងមុខអង្គរ ព្រោះស្ដ្រីឆ្លងជំងឺកូវីដ១៩នេះ បានចេញចូលនៅក្នុងផ្សារនោះ។ដោយឡែកមន្ទីរសំរាកព្យាបាល ឆាយលាង ក៏ត្រូវបានបិទផងដែរ បន្ទាប់ពីរកឃើញអ្នកឆ្លងកូវីដ១៩មានជាប់ពាក់ព័ន្ធជាមួយទីតាំងនោះ ។
លោក នាក់ ណេរ៉ុន ក៍បានស្នើរអោយប្រជាពលរដ្ឋ ដែលមានទំនាក់ទំនង ជាមួយអ្នកវិជ្ជមានជំងឺកូវីដ-១៩ ឬ បានចូលទៅកាន់ផ្សារភូមិភាគ និងមន្ទីរសម្រាកព្យាបាល ឆាយ លាង ពីថ្ងៃទី០៤ ដល់ថ្ងៃទី០៩ ខែមេសា ឆ្នាំ២០២១ រួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួន ដោយមិនពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ ប្រសិនបើមានការប្រែប្រួលសុខភាព សូម ផ្តល់ព័ត៌មានមកកាន់លេខទូរស័ព្ទ ០១២ ៩៥៥៤៧៤ ក្នុងការយកសំណាកធ្វើតេស្តស្រាវជ្រាវ។ /០៧៧ ៧៨៩០០៧ ដើម្បីក្រុមការងារចាត់វិធានការ។
សូមជ្រាបថា នៅក្នុងព្រឹត្ដិការណ៍សហគមន៍២០កុម្ភៈ សម្រាប់ខេត្ដសៀមរាប បានរកឃើញអ្នកឆ្លងកូវីដ១៩មានការកើនឡើងរហូតដល់ចំនួន១៣នាក់ ។ក្នុងនោះផងដែរ ក្រោយពីរកឃើញអ្នកឆ្លងជំងឺដ៍សាហាវនេះជាបន្ដបន្ទាប់នោះ អាជ្ញាធរខេត្ដសៀមរាប ក៍បានមានវិធានការបិទមន្ទីរពេទ្យឯកជនជាច្រើនទៀត រួមមាន មន្ទីរ៧៧៧ មន្ទីរសំរាកព្យាបាលសុខភាព មន្ទីរពិគ្រោះជំងឺទូច កូ មន្ទីរពិនិត្យអ្នកជំងឺ ចាវ ចាន់ មន្ទីរសំរាកព្យាបាលឆៃ លាង ជាដើម ព្រមទាំងបានធ្លាប់បានបិទសង្កាត់គោកចក ភូមិគោកត្នោត ក្រុងសៀមរាប ហើយនៅថ្ងៃទី១១ខែមេសាឆ្នាំ២០២១នេះ ក៍សម្រេចបិទភូមិ២ទៀត រូមមានភូមិខ្វៀន និងភូមិគោកចាន់ សង្កាត់ចក ជាបណ្ដោះអាសន្ន ដើម្បីទប់ស្កាត់ការរីកដាលនៃជំងឺកូវីដ១៩ ចូលសហគមន៍បន្ថែមទៀត។រដ្ឋបាលខេត្តសៀមរាប សង្ឃឹមថាប្រជាពលរដ្ឋក្នុងខេត្ត ពិសេសបងប្អូនដែល រស់នៅក្នុងភូមិគោកតាចាន់ និងភូមិខ្វៀន សង្កាត់គោកចក ក្រុងសៀមរាប ចូលរួមអនុវត្តឱ្យបានម៉ឺងមាត់ និងអនុវត្តនូវវិធានការការពាររបស់រាជរដ្ឋាភិបាល និងតាមការណែនាំរបស់ក្រសួងសុខាភិបាល៕
