នៅព្រឹកថ្ងៃទី១៣ ខែមេសា ឆ្នាំ២០២១ លោក ស៊ុ សំអន នាយកសាខាកាកបាទក្រហមកម្ពុជាខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានអញ្ជើញទទួលអំណោយជាសម្ភារៈ ពីធនាគារពាណិជ្ជកម្មក្រៅប្រទេសនៃកម្ពុជា FTB ដោយអំណោយរួមមាន៖ អាកុល ៦០០លីត្រ និងម៉ាស់ ២.០០០បន្ទាស់ ។
ក្នុងនាមប្រធានគណៈកម្មាធិការសាខា លោក ស៊ុ សំអន បានថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសធម៌ របស់គណៈគ្រប់គ្រង និងមន្ត្រីនិយោជិតធនាគារពាណិជ្ជកម្មក្រៅប្រទេសនៃកម្ពុជា FTB ទាំងអស់ ដែលបានយកចិត្តទុកដាក់ចូលរួមចំណែក ក្នុងសកម្មភាពមនុស្សធម៌ ពិសេសចូលរួមប្រយុទ្ធប្រឆាំងនឹងការរីករាលដាលនៃជំងឺកូវីដ-១៩នៅក្នុងប្រទេសកម្ពុជាយើង ដែលជាការព្រួយបារម្ភមិនអាចមើលរំលងបាន។ សកម្មភាពមនុស្សធម៌នេះ គឺជាការចូលរួមរបស់សប្បុរសជន ជាមួយសកម្មភាពមនុស្សធម៌កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។
លោក ស៊ុ សំអន បន្តថា ចំពោះអំណោយទាំងនេះ សាខាកាកបាទក្រហមកម្ពុជាខេត្តសៀមរាប នឹងប្រើប្រាស់ឱ្យចំគោលដៅមនុស្សធម៌ ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការ របស់ចលនាអន្តរជាតិកាកបាទក្រហមអឌ្ឍចន្ទក្រហម៕
