អ្នកប្រកបរបរដឹកជញ្ជូនភ្ញៀវ រួមមានអ្នកបើកបររ៉ឺម៉កម៉ូតូ ម៉ូតូកង់បី និងខ្លះជាអ្នកបើកបររថយន្តទេសចរណ៍ ក្នុងខេត្តសៀមរាបប្រមាណ១៧០នាក់ បានស្ម័គ្រចិត្ដទទួលការចាក់វ៉ាក់សាំងបង្ការជំងឺកូវីដ-១៩ លើកទី១ ធ្វើឡើងនៅមន្ទីរពទ្យបង្អែកខេត្ដសៀមរាប នៅព្រឹកថ្ងៃទី១៣ ខែមេសា ឆ្នាំ២០២១នេះ ។
តាមការលើកឡើងរបស់ពួកគាត់ បង្ហាញថា ពួកគាត់ពិតជាមានការប្រឈមនឹងការឆ្លងជំងឺកូវីដ-១៩ខ្ពស់ពីភ្ញៀវទេសចរ ខណៈអ្នកទេសចរទាំងនោះ ធ្វើដំណើរពីគ្រប់ទីកន្លែង ពីប្រទេសមួយទៅប្រទេសមួយទៀត។ ការទទួលបានវ៉ាក់សាំងនេះ ទោះបីមិនអាចការពារបាន១០០%ក៍ដោយ វានឹងជួយកាតបញ្ហាប្រឈមធ្ងន់ធ្ងរដល់ពួកគាត់ គ្រួសារ និងសង្គមជាតិផងដែរ។ ពួកគាត់ បានថ្លែងអំណរគុណដល់រាជរដ្ឋាភិបាល ក៏ដូចជាអាជ្ញាធរខេត្ត ដែលបានចាក់វ៉ាក់សាំងបង្ការជំងឺកូវីដ-១៩នេះ ដល់ពួកគាត់។ ពួកគាត់ ក៏បានអំពាវនាវដល់ក្រុមអ្នកមានមុខរបរដូចគ្នានេះ ទៅទទួលវ៉ាក់សាំង ឲ្យបានគ្រប់ៗគ្នា ដើម្បីទប់ស្កាត់ និងលុបបំបាត់ការឆ្លងជំងឺកូវីដ-១៩ ឲ្យបានឆាប់ៗនាពេលខាងមុខនេះ។
លោក ស៊ុន ចំណាន តំណាងក្រុមយុវជនស្ម័គ្រចិត្ដតោះទៅលេងសៀមរាប និងជាអ្នកសម្របសម្រួលការចាក់វ៉ាក់សាំងនេះ លើកឡើងថា ដោយមានការអនុញ្ញាតពីអាជ្ញាធរខេត្ដសៀមរាប ក្រុមយុវជនស្ម័គ្រចិត្ដតោះទៅលេងសៀមរាប ដឹកនាំក្រុមអ្នកធ្វើការសេដ្ឋកិច្ចក្រៅប្រព័ន្ធ ទៅទទួលការចាក់វ៉ាក់សាំងបង្ការជំងឺកូវីដ-១៩នាពេលនេះ។ ជាមួយគ្នានោះ ក្រុមប្រតិបត្ដិករទេសចរណ៍ ក៏នឹងត្រូវបានទទួលការចាក់វ៉ាក់សាំងនេះផងដែរ បន្ទាប់ពីក្រុមអ្នកប្រកបរបរដឹកជញ្ជូនភ្ញៀវ។
លោកបានបន្ដថា ការផ្ដល់វ៉ាក់សាំងនេះ មិនគិតពីនិន្នាការនយោបាយនោះឡើយ។ លោក ក៏បានអំពាវនាវដល់អ្នកពាក់ព័ន្ធសេវាកម្មទេសចរណ៍ ធ្វើការទំនាក់ទំនងជាមួយក្រុមយុវជនស្ម័គ្រចិត្ដតោះទៅលេងសៀមរាប ដើម្បីទទួលបានការចាក់វ៉ាក់សាំងជំងឺកូវីដ-១៩នេះ ឲ្យបានគ្រប់ៗគ្នា។
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
