ប្រជាពលរដ្ឋ រួមនិងអាជីវករ ស្ថិតក្នុងនៅផ្សារក្រោម និងក្នុងភូមិវិហារចិន សង្កាត់ស្វាយដង្គំ ក្រុងសៀមរាប ចំនួន ១៥៦នាក់ ត្រូវបានក្រុមគ្រូពេទ្យចុះយកសំណាក ដើម្បីពិនិត្យរកមេរោគកូវីដ-១៩ ក្រោយពីបានរកឃើញថា មានពាក់ព័ន្ធនឹង អាជីវករ មានវិជ្ជមានមេរោគកូវីដ-១៩ ប្រកបរបរលក់គ្រឿងក្រអូបក្នុងផ្សារក្រោម កាលពីថ្ងៃទី១២ ខែមេសា ឆ្នាំ២០២១ នេះបើតាមការចុះផ្សាយរបស់រដ្ឋបាលខេត្តសៀមរាប នៅយប់ថ្ងៃទី១៤ ខែមេសា ឆ្នាំ២០២១។
ដោយឡែក នៅព្រឹកថ្ងៃទី១៥ ខែមេសានេះ រដ្ឋបាលខេត្តសៀមរាប បានបង្ហាញថា មានករណីវិជ្ជមានជំងឺកូវីដ-១៩ ថ្មីម្នាក់ទៀត មានឈ្មោះ ចឿម ផល្លា ភេទស្រី អាយុ៤៥ឆ្នាំ រស់នៅភូមិវត្តស្វាយ សង្កាត់សាលាកំរើក ក្រុងសៀមរាប មានមុខរបរ អ្នកលក់នំកូរ នៅផ្សារក្រោម។
គិតមកដល់ពេលនេះ អ្នកពាក់ព័ន្ធនឹង បុគ្គល អ៊ឹង ខៃលី លក់គ្រឿងក្រអូប ស្ថិតនៅផ្សារក្រោម មានវិជ្ជមានជំងឺកូវីដ-១៩ សរុបចំនួន ៦នាក់ ក្នុងនោះ ៤នាក់ជាគ្រួសារតែមួយ និង២នាក់ទៀត ម្នាក់ជាអ្នកលក់បន្លែ និងម្នាក់ទៀតជាអ្នកលក់នំកូរ នៅផ្សារក្រោម។
ចំពោះករណីវិជ្ជជំងឺកូវីដ-១៩ ក្នុងខេត្តសៀមរាប មានចំនួនសរុប១៨នាក់ គិតត្រឹមព្រឹកថ្ងៃទី១៥ ខែមេសានេះ ក្នុងនោះ ៧នាក់ ជាករណីនាំចូលពីខេត្តក្រៅ និងបានបន្តឆ្លងដោយករណីនាំចូលនេះ ចំនួន១០នាក់ និងបានព្យាបាលសះស្បើយចំនួន ៣នាក់។
ទន្ទឹមនោះ រដ្ឋបាលខេត្តសៀមរាប បាន បិទទីតាំងមួយចំនួនជាបន្តបន្ទាប់ ដូចជាភូមិខ្វៀន ភូមិគោកតាចាន់ ផ្សារភូមិភាគ៤ ក្នុងសង្កាត់គោកចក និងចុងក្រោយនេះគឺការបិទនូវផ្សារក្រោម ភូមិវិហារចិន សង្កាត់ស្វាយដង្គំ និងផ្សារវត្តអធ្វា ក្នុងភូមិកក្រាញ់ សង្កាត់សៀមរាប ក្រុងសៀមរាប។
តាមការបញ្ជាក់របស់ ឯកឧត្តម ក្រុស សារ៉ាត់ ទីប្រឹក្សានៃក្រសួងសុខាភិបាល និងជាប្រធានមន្ទីរសុខាភិបាល នៃរដ្ឋបាលខេត្តសៀមរាប បង្ហាញថា មន្ទីរពិសោធន៍ធ្វើតេស្តលើវត្ថុសំណាករកវារ៉ុសកូវីដ-១៩ នៃមន្ទីរពេទ្យបង្អែកខេត្តសៀមរាប ក្នុង១ថ្ងៃ អាចវិភាគវត្ថុសំណាកបានចំនួន២០០វត្ថុសំណាក។
ជាការអំពាវនាវ រដ្ឋបាលខេត្ត សូមឲ្យបងប្អូនប្រជាពលរដ្ឋក្នុងខេត្តសៀមរាប ដែលពាក់ព័ន្ធ ឬសង្ស័យថាមានពាក់ព័ន្ធនឹងអ្នកជំងឹកូវីដ-១៩ សូមប្រញាប់រួសរាន់មកផ្ដល់សំណាក ដើម្បីធ្វើតេស្ត និងត្រូវធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ សូមបង្កើនការប្រុងប្រយ័ត្នខ្ពស់ចូលរួមអនុវត្តវិធានការការពារ ៣ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ជាពិសេសត្រូវអនុវត្តវិធានការរដ្ឋបាល និងវិធានការចត្តាឡីស័ក។
អត្ថបទ និងរូបភាព៖ លោក ងិន គឹមឡេង និងលោក ជា ស្រស់
កែសម្រួល៖ លោក សេង ផល្លី
