នាព្រឹកថ្ងែទី១៥ ខែមេសា ឆ្នាំ២០២១នេះ លោក ពិន ប្រាកដ អភិបាលរងខេត្តសៀមរាប បានដឹកនាំក្រុមការងារ រួមមានមន្ត្រីជំនាញនៃមន្ទីរសុខាភិបាលខេត្តសៀមរាប កងកម្លាំងទាំងពីរប្រភេទ ចុះអប់រំផ្សព្វផ្សាយដល់អាជីវករនៅក្នុងផ្សារចំនួនបីរួមមាន៖ ផ្សារលើធំថ្មី ផ្សារសាមគ្គី និងផ្សារទំនើបអង្គរ ដោយណែនាំឲ្យពួកគាត់ពាក់ម៉ាកបានគ្រប់ៗគ្នា និងអនុវត្តនូវវិធានការ ៣កុំ ៣ការពារ របស់រាជរដ្ឋាភិបាល និងក្រសួងសុខាភិបាល។
ក្នុងឱកាសនោះលោក ពិន ប្រាកដ មានប្រសាសន៍ថា សកម្មភាពចុះអប់រំផ្សព្វផ្សាយនេះ ក្រុមការបានធ្វើការនាំដល់អាជីវករលក់ដូរ និងប្រជាជនដែលចេញចូលផ្សារឲ្យពាក់ម៉ាស់បានគ្រប់ៗគ្នា ព្រោះបើសិនជាពលរដ្ឋមិនពាក់ម៉ាសទេហើយមានការឆ្លងហ្នឹងត្រូវបិទផ្សារ។ ជាមួយគ្នានោះដែរក្រុមការងារសង្កេតឃើញថា ប្រជាពលរដ្ឋ និងអាជីវករលក់ដូរបានពាក់ម៉ាស់សឹងតែ៩៥ភាគរយ អ្នកខ្លះការពាក់ម៉ាស់បានត្រឹមត្រូវ និងអ្នកខ្លះទៀតនៅមិនទាន់ត្រឹមត្រូវនៅឡើយ។ លោកអភិបាលរងខេត្ត បន្ថែមថា រដ្ឋបាលខេត្តក៏សូមអំពាវនាវឲ្យបងប្អូនប្រជាពលរដ្ឋបន្តអនុវត្តឲ្យបានខ្ជាប់ខ្ជួន និងកុំមើលស្រាលលើជំងឺដ៏កាចសាហាវនេះ ដោយអនុវត្តវិធានការ ៣កុំ និង ៣ការពារ ឲ្យបានជាប់ជាប្រចាំ៕
អត្ថបទ និងរូបភាព៖ ខេង ឧត្តម
