គិតត្រឹមរយៈពេល២ថ្ងៃចាប់ពីថ្ងៃទី១៥ ដល់ថ្ងៃទី១៦ ខែមេសា ឆ្នាំ២០២១ ក្រុមការងារនៃយុទ្ធនាការប្រយុទ្ធប្រឆាំង និងទប់ស្កាត់ជំងឺកូវីដ-១៩ ខេត្តសៀមរាប រួមមានមន្ទីរសុខាភិបាលខេត្ត កងកម្លាំងសមត្ថកិច្ច សហការដោយអាជ្ញាធរមូលដ្ឋាន បានបន្តយុទ្ធនាការផ្សព្វផ្សាយ សំដៅឆ្ពោះទៅរកទីប្រជុំផ្សារនានាក្នុងក្រុងសៀមរាប ដើម្បីផ្សព្វផ្សាយពង្រឹងបន្ថែម លើកកម្ពស់ស្មារតីនៃការអនុវត្តវិធានការសុវត្ថិភាព ៣ការពារ និង៣កុំ ដែរជារូបមន្តដ៏ប្រសិទ្ធភាពនៃការប្រយុទ្ធប្រឆាំងជំងឺកូវីដ-១៩ របស់ប្រមុខរាជរដ្ឋាភិបាល។ យុទ្ធនាការនេះបានធ្វើឡើងស្របពេលដែលរដ្ឋបាលខេត្ត បានសម្រេចបិទខ្ទប់សង្កាត់ចំនួន៣ រួមមាន៖ សង្កាត់ស្វាយដង្គំ សង្កាត់សាលាកំរើក និងសង្កាត់សៀមរាប នៃក្រុងសៀមរាបរយៈពេល១៤ថ្ងៃ ដើម្បីគ្រប់គ្រងស្ថានភាពនៃការចម្លងជំងឺកូវីដ-១៩ ដែលកំពុងសាយភាយនៅក្នុងសហគមន៍។
បើតាមលោក មួង ណារិន អនុប្រធានមន្ទីរសុខាភិបាលខេត្ត និងជាតំណាងមន្រ្តីដឹកនាំសកម្មភាពនៃយុទ្ធនាការនេះ បានបញ្ជាក់ថា៖ ច្បាស់ណាស់អ្វីៗទាំងអស់ គ្រប់ផ្នែកនៃសកម្មភាពដែលបានដាក់ចេញដោយរដ្ឋបាលខេត្ត គឺដើម្បីគោលដៅតែមួយ គឺការកាត់ផ្តាច់ខ្សែចម្លងកូវីដ-១៩។ សម្រាប់យុទ្ធនាការនេះ វាជាជ្រុងមួយនៅក្នុងវិធានការ ៣ការពារ និង៣កុំ ក្នុងការរំលឹក និងពង្រឹងការពាក់ម៉ាសឲ្យបានត្រឹមត្រូវទាំងអស់គ្នា ហើយចំពោះជនណាមានការធ្វេសប្រហែលលើវិធានការនេះ នឹងត្រូវការទទួលរងនូវផាកពិន័យជាប្រាក់ផងដែរ។
លោកអនុប្រធានមន្ទីរសុខាភិបាលខេត្ត បានឲ្យដឹងទៀតថា ការចូលរួមរបស់ប្រជាពលរដ្ឋ វាជាកាតព្វកិច្ច និងកត្តាដ៏សំខាន់បំផុត ដែលអាចធ្វើឲ្យប្រសើរឡើងវិញ ចេញពីស្ថានភាពដ៏អាក្រក់នៃវិបត្តិកូវីដ-១៩។ វាក៏ជាការបង្កើតឲ្យមាននូវផលវិបត្តិក្នុងសង្គមជាតិផងដែរ បើសិនជាការរាតត្បាតនៃជំងឺដ៏កាចសាហាវនេះមិនត្រូវបានបញ្ចប់។ លោកក៏បានអំពាវនាវផងដែរថា មិនចំពោះស្ថាប័ន ឬមជ្ឈដ្ឋានណានោះឡើយ ពិសេស គឺបងប្អូនប្រជាពលរដ្ឋសូមចូលរួមទាំងអស់គ្នា ដើម្បីរក្សាលំហ្នឹងជីវភាពរស់នៅក្នុងតំណាក់កាលដ៏លំបាកនេះ ហើយអ្វីដែលត្រូវបារម្ភច្រើនជាងនេះ គឺសុខភាព និងអាយុជីវិតប្រជាពលរដ្ឋ៕
អត្ថបទ និង រូបភាព៖ ងិន គីមឡេង
