នៅថ្ងៃទី១៤ ខែមេសា ឆ្នាំ២០២១ ក្រុមការងារសាលាគណខេត្តសៀមរាប ដឹកនាំដោយព្រះវិជ័យរង្សី បណ្ឌិត ឡាច លាង ព្រះរាជាគណៈថ្នាក់កិត្តិយស ព្រះធម្មធរគណខេត្ត ព្រះអនុគណក្រុងសៀមរាប និងជាព្រះចៅអធិការវត្តទេពពោធិវង្ស រួមដំណើរដោយប្រតិភូសង្សមួយចំនួនក្នុងក្រុងសៀមរាប បាននាំយកគ្រឿងឧបភោគបរិភោគទៅជូនដល់មេភូមិគោកតាចាន់ សម្រាប់ចែករំលែកទៅដល់ ប្រជាការពារប្រចាំការចំនួន៥គោលដៅ នៅភូមិគោកតាចាន់ សង្កាត់គោកចក ក្រុងសៀមរាប ដើម្បីជួយដោះស្រាយជីវភាពក្នុងការការពារទីតាំងដែលត្រូវបានបិទការចេញ ចូលជាបណ្តោះអាសន្ន ដោយសារការឆ្លងមេរោគកូវីដ-១៩ និងចែកជូនគ្រួសារប្រជាពលរដ្ឋក្រ១និងក្រ២ ក្នុងភូមិចំនួន២០គ្រួសារ។ ដោយអំណោយទាំងនោះរួមមាន៖ ថវិកា១លានរៀល អង្ករ៥០០គីឡូក្រាម ភេសជ្ជៈ ត្រីខ មី ទឹកត្រី ទឹកស៊ីអ៊ីវ ត្រីសាច់ បន្លែបង្ការ មួយចំនួនទៀតផងដែរ។
ព្រះវិជ័យរង្សី បណ្ឌិត ឡាច លាង មានសង្ឃដីកាថា គ្រឿងឧបភោគបរិភោគដែលបានមកប្រគល់ជូននាពេលនេះ បានមកពីការប្រគេនរបស់ទាយកទាយិកា និងសប្បុរសជនជិតឆ្ងាយហើយមន្ត្រីសង្ឃសាលាគណខេត្តបានបែងចែកសម្រាប់ចែកជូនគ្រួសារ ឬអាជ្ញាធរមូលដ្ឋានណានីមួយដែលជួបហានិភ័យដោយប្រការផ្សេងៗ សម្រាប់ដោះស្រាយការលំបាកមួយគ្រាៗ ។ ជាមួយគ្នានោះព្រអង្គ ក៍បានជំរុញលើកទឹកចិត្តដល់អ្នកកំពុងធ្វើចត្តាឡីស័កទាំងអស់ ត្រូវតស៊ូ ជំនះ អត់ធ្មត់ អនុវត្តនិងស្នាក់នៅដាច់ដោយឡែកឱ្យខាងតែបាន១៤ថ្ងៃ ទៅតាមការកំណត់និងត្រូវអនុវត្តទៅតាមការណែនាំក្រុមការងារ និងសេចក្តីណែនាំ របស់ក្រសួងសុខាភិបាល ក៍ដូចជាវិធានការ៣ការពារ និង៣កុំរបស់សម្តេចតេជោ សែន នាយករដ្ឋមន្ត្រី បានជាប្រចាំផងដែរ។
អត្ថបទ និងរូបភាព៖ យូ វង្ស
