ថ្លែងសំណេះសំណាលជាមួយអ្នកសារព័ត៌មានចំនួន២០រូបមកពីជាង១០ស្ថាប័ន នៅសាលាខេត្តសៀមរាប នារសៀលថ្ងៃទី២១មខែមេសា ឆ្នាំ២០២១នេះ លោក ពិន ប្រាកដ អភិបាលរងខេត្ត និងតំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្ត បានមានប្រសាសន៍ថា៖ បងប្អូនអ្នកសារព៌ត៌មានទាំងរដ្ឋ និងឯកជន ដែលពុំទាន់បានទទួលការចាក់វ៉ាក់សាំងការពារជំងឺកូវីដ-១៩(រាប់ទាំងគ្រួសារផង) សូមរួសរាន់ទៅទទួលការចុះឈ្មោះនៅមន្ទីរព័ត៌មានខេត្ត។
ដោយឡែកសម្រាប់បងប្អូនអ្នកសារព័ត៌មាន ដែលកំពុងបំពេញភារកិច្ចហើយជួបបញ្ហាពិបាកក្នុងការចេញចូលក្នុងភូមិសាស្ត្រតំបន់បិទខ្ទប់ដើម្បីការពារការឆ្លងជំងឺកូវីដ-១៩នៅខេត្តសៀមរាប រដ្ឋបាលខេត្តកំពុងសម្របសម្រួលធ្វើប័ណ្ណសម្គាល់សម្រាប់ចេញចូលក្នុងការចុះយកព័ត៌មានក្នុងតំបន់នោះ ដោយរង់ចាំប្រមាណជា២ឬ៣ថ្ងៃទៀតទើបរួចរាល់។
ចំពោះ សម្ភារ:អំណោយដែលផ្តល់ជូននៅពេលនេះ លោក ពិន ប្រាកដ បានថ្លែងកោតសរសើរដល់បងប្អូនអ្នកសារព័ត៌មានគ្រប់អង្គភាព ស្ថាប័នទាំងអស់ ក្នុងខេត្តសៀមរាប បានចូលរួមយ៉ាងសកម្មក្នុងការផលិតព័ត៌មាន ក្នុងនោះបងប្អូនអ្នកសរព័ត៌មានមួយចំនួនធំ បានសហការល្អក្នុងការទំនាក់ទំនងជាមួយអាជ្ញាធរខេត្ត អង្គភាព មន្ទីរនានាបំរើឱ្យវិស័យព័ត៌មានក្នុងខេត្តប្រកបដោយក្រមសីលធម៌វិជ្ជាជីវ: ស្របទៅតាមបរិបទ នៃការវីវត្តរីកចម្រើនផ្នែកប្រព័ន្ឋព័ត៌មានវិទ្យា។
ក្នុងនាមអភិបាល នៃគណ:អភិបាលខេត្ត លោក ពិន ប្រាកដ មានប្រសាសន៍ថា៖ គ្រឿងឧបភោគបរិភោគដែលផ្តល់ជូននៅពេលនេះថ្វីត្បិតតែមិនអាចឆ្លើយតបបានទៅនឹងតម្រូវការរបស់បងប្អូនបានក៏ពិតមែន តែនេះបង្ហាញនូវការគិតគូរយកចិត្តទុកដាក់របស់ថ្នាក់ដឹកនាំខេត្ត ចំពោះសុខទុក្ខ និងការលំបាករបស់បងប្អូនអ្នកសារព័ត៌មានក្នុងដំណាក់កាលវបត្តិជំងឺកូវី-១៩កំពុងឆ្លងរីករាលដាលជាសាកល។ លោក អភិបាលរងខេត្តក៏បានសុំការយោគយល់ និងអធ្យាស្រ័យពីសំណាក់បងប្អូនអ្នកសារព័ត៌មាន អង្គភាព ស្ថាប័នព័ត៌មានមួយចំនួនទៀតដែលមិនទាន់បានទទួល សូមរង់ចាំនៅវគ្គបន្ទាប់ រដ្ឋបាលខេត្តនឹងខិតខំកៀងគរសប្បុរសជនបន្តទៀត ដើម្បីបានចាត់ចែងជូនជាជំហានៗទៅតាមលទ្ឋភាពដែលអាចធ្វើបាន។
សូមជំរាបថា៖ រដ្ឋបាលខេត្តបានឧបត្ថម្ភដល់អ្នកសារព័ត៌មានចំនួន ២០រូបមកពីជាង១០ អង្គភាព ស្ថាប័ន ទាំងផ្នែករដ្ឋ និងឯកជន ដោយក្នុងម្នាក់ៗទទួលបាន÷ អង្ករ២០គ.ក្រ, មី ១កេស, ទឹកស៊ីអ៊ីវ ១យួ, ត្រីខ ១យួ, ម៉ាស់២ ដុំ និងអាល់កុលផងដែរ៕
អត្ថបទ និងរូបភាព ៖ លោកយូ វង្ស
កែសម្រួលអត្ថបទ ៖ លោក លីវ សុខុន