នៅក្នុងកិច្ចប្រជុំរបស់ខ្លួន ក្រុមការងារស្រាវជ្រាវ និងតាមដានបុគ្គលសង្ស័យថាមានផ្ទុកជម្ងឺកូវីដ-១៩ខេត្តសៀមរាប បានដាក់ចេញនូវផែនការពង្រឹងបន្ថែម លើការងារគ្រប់គ្រងទិន្នន័យ ចុះឈ្មោះអ្នកដំណើរនៅច្រកចេញចូលខេត្ត និងការតាមដាន-ស្រាវជ្រាវ រកអ្នកពាក់ព័ន្ធ ដើម្បីធ្វើឲ្យមានប្រសិទ្ធភាព រួមនឹងយន្តការកាត់ផ្កាច់ខ្សែចម្លងចូលសហគមន៍ !
បើទោះជារដ្ឋបាលខេត្តសៀមរាប បានដាក់ឲ្យមានការប្រើប្រាស់កម្មវិធី Wab App ដើម្បីជំនួយបន្ថែមលើប្រសិទ្ធភាព នៃការគ្រប់គ្រងទន្នន័យអ្នកធ្វើដំណើរចេញចូល ឬឆ្លងកាត់ខេត្តសៀមរាប នៅតាមបណ្តាច្រកទាំង២ ( ខាងកើតនៅស្រុកជីក្រែង និងខាងលិចនៅស្រុកក្រឡាញ់) ដោយការប្រុងប្រយ័ត្នយ៉ាងណាក៏ដោយ ក៏ប៉ុន្តែការនាំចូលចម្លងជម្ងឺកូវីដ-១៩ ក្នុងសហគមន៍ នៅតែជាក្តីព្រួយបារម្ភ បើសិនជាពុំមានការចូលរួមពីសំណាក់ អ្នកធ្វើដំណើរទេនោះ។ ការបង្ហាញភាពស្មោះត្រង់ នៃអ្នកដំណើរ ដើម្បីចុះឈ្មោះក្នុងបញ្ជីគ្រប់គ្រងទិន្នន័យ វាពិតជាមានសារប្រយោជន៍ខ្លាំងណាស់ ព្រោះថាកម្មវិធី Wab App វាមានលក្ខណៈពិសេសសម្រាប់ការស្រាវជ្រាវនិងស្វែងរកអ្នកពាក់ព័ន្ធ។
លោក នាក់ ណេរ៉ុន អភិបាលរងខេត្ត និងជាប្រធានក្រុមការងារស្រាវជ្រាវ និងតាមដានបុគ្គលសង្ស័យថា មានផ្ទុកជម្ងឺកូវីដ-១៩ខេត្ត បានលើកបង្ហាញយ៉ាងដូច្នេះ នៅក្នុងកិច្ចប្រជុំពិសេសមួយ ជាមួយសមាជិក នៃក្រុមការងាររបស់ខ្លួន នារសៀលថ្ងៃទី២៨ ខែមេសា ឆ្នាំ២០២១ ដែលរបៀបវារៈនៃកិច្ចប្រជុំនោះ គឺសំដៅទៅលើការបង្កើនប្រសិទ្ធភាពតាមដាន ស្រាវជ្រា រកអ្នកពាក់ព័ន្ធ ក្នុងករណីរកឃើញវិជ្ជមានកូវីដ-១៩ លើកអ្នកដំណើរណាម្នាក់នោះ ឲ្យបានទាន់ពេលវេលា ធានាដល់ការទប់ស្កាត់ឲ្យបានការសាយភាយជម្ងឺកូវីដ-១៩ក្នុងសហគីមន៍។ កិច្ចប្រជុំនេះ បានរកឃើញការឯកភាពគ្នា លើការរៀបចំឲ្យមានក្រុមការងារស្រាវជ្រាវឆ្លើយតបបន្ទាន់ ដើម្បីស្វែងរកអ្នកពាក់ព័ន្ធ ដោយការបែងចែកកំណត់គោលដៅទទួលខុសត្រូវ ដែលជាសំខាន់ចំពោះមុខ គឺក្នុងភូមិសាស្រ្តនៃក្រុងសៀមរាប។
នៅក្នុងកិច្ចប្រជុំនេះ ក៏បានពិចារណាផងដែរទៅលើការអនុវត្តវិធានច្បាប់ ចំពោះជនណាដែលបង្ករឲ្យមានហានីភ័យ និងការចម្លងជម្ងឺកូវីដ-១៩ ក្នុងកាលៈទេសៈដែលវិធានការអប់រំ ពុំមានប្រសិទ្ធភាព ហើយការគំរាមកំហែង ត្រូវបានស្ថិតក្នុងស្ថានភាពដ៏ធ្ងន់ធ្ងរនោះ។ កិច្ចប្រជុំក៏បានទទួលស្គាល់ដែរថា វាជាបញ្ហាដ៏ស្មុគស្មាញ និងមិនទាន់រកចំណុចកណ្តាលណាមួយ ដើម្បីអនុវត្តលើការកំណត់មុខសញ្ញាអ្នកដំណើរដែលត្រូវទទួលកាតព្វកិច្ចចត្តាឡីស័ក១៤ថ្ងៃ និងបានពិចារណាដែរថា តើបណ្ណសម្គាល់ចាក់វ៉ាក់សាំងបង្ការជម្ងឺកូវីដ-១៩ នឹងត្រូវបានប្រើប្រាស់នៅពេលណា និងមានប្រសិទ្ធភាពសម្រាប់ការធ្វើដំណើរប្រកបដោយសុវត្ថិភាពនោះ។ យ៉ាងណាក៏ដោយ កិច្ចប្រជុំបានវាយតម្លៃថា ការងារទាំងអស់នេះ វាមិនស្មុគស្មាញនោះទេ បើសិនជាមានកិច្ចសហការពីសំណាក់ប្រជាពលរដ្ឋអ្នកធ្វើដំណើរ ក្នុងពេលដែលបានចុះឈ្មោះនៅប៉ុស្ថិត្រួតពិនិត្យសុខភាពបឋម នាច្រកព្រំប្រទល់ខេត្តនោះ៕
អត្ថបទ និងរូបភាព៖ ងិន គឹមឡេង ,យូ វង្ស
កែសម្រួល៖ លីវ សុខុន
