កាលពីរសៀលថ្ងៃទី២៩ ខែមេសា ឆ្នាំ២០២១នេះ ឯកឧត្តម អែល សៀត សមាជិកក្រុមប្រឹក្សាខេត្តសៀមរាប និងជាអនុប្រធានសាសនាឥស្លាមខេត្តសៀមរាប បានដឹកនាំក្រុមការងារសាសនិកឥស្លាមខេត្ត នាំយកអំណោយជាកញ្ចប់អាហារសម្រាប់ស្រាយបួសក្នុងខែរ៉ម៉ាឌន ដែលជាអំណោយរបស់សប្បុរសជនម៉ាឡេស៊ី ចែកជូនដល់បងប្អូនសាសនិកឥស្លាមចំនួន២៣គ្រួសារ ដែលរស់នៅក្នុងភូមិគោកគ្រើល ឃុំលាងដៃ ស្រុកអង្គរធំ ខេត្តសៀមរាប ដោយក្នុងមួយគ្រួសារទទួលបានអង្ករ១០គីឡូក្រាម , ប្រេងឆា១ដប , មី៥កញ្ចប់ , ត្រីខ៥កំប៉ុង , ទឹកក្រូច១ដប , ស្ករស ១ឡូក្រាម និងផ្លែល្មើ១កញ្ចប់ ដោយមានការអញ្ជើញចូលរួមពីសំណាក់លោក ប៊ុត គីរី ប្រធានក្រុមប្រឹក្សាស្រុកអង្គរធំ និង លោក ឡុង រដ្ធារក្ស អភិបាលស្រុកអង្គរធំ ព្រមទាំងលោក លោកស្រីសមាជិកក្រុមប្រឹក្សាឃុំលាងដៃផងដែរ ។
ឯកឧត្តម អែល សៀត បានមានប្រសាសន៍ថា គណៈអ៊ីម៉ាំសាសនាឥស្លាមទាំងអស់ក្នុងខេត្ត តែងតែយកចិត្តទុកដាក់ គិតគូរពីសុខទុក្ខក្នុងការរស់នៅរបស់បងប្អូននៅតាមសហគមន៍ខ្មែរឥស្លាមជានិច្ច ហើយនៅក្នុងកាលៈទេសៈដ៏លំបាកនេះ ក្រោមការគិតគូរយ៉ាងយកចិត្តទុក្ខដាក់ពីប្រមុខរាជរដ្ឋាភិបាល ក្នុងការបញ្ចប់ព្រឹត្តិការណ៍២០កុម្ភៈនេះបាន គឺត្រូវទាមទាឲ្យមានការចូលរួមពីសំណាក់បងប្អូនទាំងអស់គ្នា ដើម្បីឲ្យស្ថានភាពបិទខ្ទប់នេះវិលមករកស្ថានភាពធម្មតាវិញ។
ឯកឧត្តមមានប្រសាសន៍ទៀតថា សម្រាប់ការបូជាសពចំពោះអ្នកស្លាប់ដោយសារជំងឺកូវីដ-១៩ នៅកម្ពុជា គឺតម្រូវឲ្យបូជាសពទាំងអស់ តែដោយឡែកខាងសហគមន៍ខ្មែរឥស្លាម សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអនុញ្ញាតឲ្យបញ្ចុះតាមក្រិតក្រមសាសនា ដោយអនុវត្តន៍តាមវិធានការនានារបស់ក្រសួងសុខាភិបាល ដូច្នេះទីតាំងដែលត្រូវបញ្ចុះសពសាសនិកឥស្លាមដែលបានស្លាប់ដោយសារជំងឺកូវីដ-១៩នោះ គឺស្ថិតនៅក្នុងភូមិគោកក្រើល ឃុំលាងដៃ ស្រុកអង្គរធំនេះដែរ ។ ឯកឧត្តមបានសំណូមពរដល់ប្រជាពលរដ្ឋខ្មែរ ក៍ដូចជាសាសនិកឥស្លាមទាំងអស់ សូមមានការអត់ធ្មត់ និងគោរពតាមវិធានការរបស់រាជរដ្ឋាភិបាលឲ្យបានខ្ជាប់ខ្ជួន គឺ ៣ការពារ និង៣កុំ និងអនុវត្តឲ្យបានតាមសេចក្តីសម្រេច ស្តីពីវិធានការដែលត្រូវអនុវត្តក្នុងអំឡុងពេលបិទខ្ទប់ក្នុងភូមិសាស្រ្តមួយចំនួន ក្នុងខេត្តសៀមរាបនិង ដើម្បីទប់ស្កាត់ការឆ្លងរីករាលដាលកូវីដ១៩ និងកាត់ផ្តាច់ នៃការឆ្លងនៃព្រឹត្តិការណ៍ ២០កុម្ភៈផងដែរ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
